Nɨawari 1

1 ‘Aixɨa kani’itɨarieka tewi kemɨ’ane ‘axamemɨte’u’iyari wa’ɨxatsi mɨka’enie, meta ‘axamemɨteyurie wahuyeta mɨka’umie meta ‘axamemɨteniniuki wahamatɨa mɨkayuxewiriya, 2 matsi Yawé ‘aitsikayatsie pɨta muyutemawieritɨa, miku’eriwa tukarikɨ meta tɨkarikɨ. 3 Mɨkɨ kɨye hepaɨ kani’aneni hatetsita muka’iteɨtsie hepaɨ kepauka tukarieya maye’axe kaniukaxuxuawereni xawariyari hatsuaku pɨkatiyɨnare. Naimekɨ kemɨtiyuriene ‘aixɨa pɨtikuyɨne. 4 Peru, ‘axamemɨte’u’iyari xatsi ’eka miku’enitsitɨane hepaɨ mekani’aneneni. 5 ‘Ayumieme kepauka ‘axateyuruwamete memetahɨawarieni mepanutaxɨriyani, meta ‘aixɨa memɨtekakɨ memayuxeɨrie mana ‘axamemɨteyurie mepɨkahepitɨarieni. 6 Yawé ‘aixɨa memɨte’u’iyari wahuye kani’ɨwiyani, ‘axamemɨteyurie matsi wahuye kanitatɨmaiyariemɨkɨ.