Zabura 114

¹ Sa’ad da Isra’ila ya fito daga Masar, gidan Yaƙub daga mutane masu baƙon harshe,

² Yahuda ya zama wuri mai tsarki na Allah, Isra’ila mallakarsa.

³ Teku ya kalla ya kuma gudu, Urdun ya juye da baya;

⁴ duwatsu suka yi tsalle kamar raguna, tuddai kamar tumaki.

⁵ Me ya sa, ya teku, kika gudu, Ya Urdun, ka juya baya,

⁶ ku duwatsu, kuka yi tsalle kamar raguna, ku tuddai, kamar tumaki?

⁷ Ki yi rawar jiki, ya duniya, a gaban Ubangiji, a gaban Allah na Yaƙub,

⁸ wanda ya juye dutse ya zama tafki, dutse mai ƙarfi zuwa maɓulɓulan ruwa.