Zabura 111

¹ Yabi Ubangiji. Zan ɗaukaka Ubangiji da dukan zuciyata a cikin majalisar masu aikata gaskiya da kuma a cikin taro.

² Ayyukan Ubangiji da girma suke; dukan waɗanda suke farin ciki da su suna tunaninsu.

³ Ayyukansa masu ɗaukaka da kuma daraja ne, adalcinsa kuma zai dawwama har abada.

⁴ Ya sa a tuna da abubuwa masu banmamaki nasa; Ubangiji mai alheri ne mai tausayi kuma.

⁵ Yana ba da abinci ga waɗanda suke tsoronsa; yakan tuna da alkawarinsa har abada.

⁶ Ya nuna wa mutanensa ikon ayyukansa, yana ba su ƙasashen waɗansu al’ummai.

⁷ Ayyukan hannuwansa masu aminci ne da kuma gaskiya; dukan farillansa abin dogara ne.

⁸ Tsayayyu ne har abada abadin, ana yinsu cikin aminci da kuma gaskiya.

⁹ Yana ba da ceto ga mutanensa; ya kafa alkawarinsa har abada, tsarki da banrazana ne sunansa.

¹⁰ Tsoron Ubangiji ne mafarin hikima; dukan waɗanda suke bin farillansa suna da ganewa mai kyau. Gare shi ne madawwamin yabo.