IYONA 2

1 E tuwo Iyonayana íyana sinaena goi ikawanoi Yauwe ina Yaubada yaina 2 idigo kana, ‘Guna kategeda goi Yauwe atumadadem, e kukatumapugu. Same 120:1 Ámasa dadavina goi apodeda vaita manuna, e guna kawanoi kunove. 3 Boi kulavegu asou ana dimówana tututu goi, e négwasa ilataoigu be nakae im kaivaya gagaidi sikautumgu. 4 Tuwo yau guna nuwonúwana kagu, “Matam goi bogina kuvatapiyegu.” Go tuwo nava bei im Vada Kimaasabaina agitemnei. 5 Asou négwasa ituko ima nukotogu goi, nakae dimówana ilataoigu, e dodouna dabagu ipaimi. 6 Asou ana niku unana toina goi. Ana kaigigita aliupa ikaaiyaka ikaubodegu, tauna deri nakae akaaiyaka. Go Yauwe, guna Yaubada, ámasa goi ma yawoigu kwabimneigu. 7 E guna lotówana alotowo bego akámasa go, Yauwe anuwookavate. Tuwo akawanoiyem, e guna kawanoiyana ituko iwo im Vada Kimaasabaina goi kunovegu. 8 Avatauwa neta siinumisa tokwalu geya basabasaidimo yaidi goi, e Yauwe ina lokata geya sibabaneyeta. 9 Go yau sem magu vesi kaauyaguna bei yoguyogu akasale kom yaim. Kaga boi akaatotuli moitamo nakae bei aguinuwe. ¡Ada yava Yauwe goi ima!’ Same 3:8 10 E iyanayana kina Yauwe ilovinae Iyona ilagobe. Tuwo moitamo ilagobe ina mamaya goi itowo.