Salmos 24

1 Senhor mba’e ae itui yvy ha’e opa mba’e hexe ikuai va’e, yvy regua kuery ha’e javi guive. 2 Mba’eta ha’e onhono raka’e ye’ẽ áry rupi, yy oxyry va’e áry omombyta. 3 Marã ramigua tu ha’eve Senhor pegua yvyty re oẽ aguã? Marã ramigua nda’u ha’eve henda iky’a e’ỹ va’e py oiko aguã? 4 Opo py ojejavy e’ỹ va’e, ipy’a ky’a e’ỹ va’e, tuuete ramigua ovare e’ỹ va’e re onhe’ẽ nogueroma’endu’ai va’e, neĩ ndoura rivei va’e. 5 Ha’e va’e kuery re ma ou ‘rã Senhor omoingo porãa, ha’e ramo Nhanderuete heraa jepea po gui ojopy ‘rã teko porã. 6 Ha’e rami ikuai ixupe ojapukai va’e kuery, Jacó Ruete oekaa rupi ikuai va’e. 7 Peipe’a ke okẽ ikuai va’e, peipe’apave okẽ guaxu marã e’ỹ, Huvixave hexakãmba va’e oike aguã. 8 Mava’e tu Huvixave hexakãmba va’e? Senhor imbaraete ha’e ipo’akapa va’e, Senhor joe opu’ãa rupi ipo’aka va’e. 9 Peipe’a ke okẽ ikuai va’e, peipe’apave okẽ guaxu marã e’ỹ, Huvixave hexakãmba va’e oike aguã. 10 Mava’e tu Huvixave hexakãmba va’e? Senhor ixondaro reta va’e, ha’e ae Huvixave hexakãmba va’e.