Salmos 20

1 Rejexavaia ára tove Senhor tanembovai. Jacó Ruete rery tandereraa jepe reĩ atã aguã py. 2 Tombou nderepyarã guenda iky’a e’ỹ va’e gui. Sião gui ma voi topena ndere. 3 Ta’ima’endu’a ixupe guarã reme’ẽ va’e ha’e javi re, tojou porã mba’emo ixupe reapy rã. 4 Tome’ẽmba ndepy’a re reipotaa oĩ va’e, tojapopa rejapoxe va’e ha’e javi. 5 Ha’e gui ma ndepo’aka ramo ore kuery rovy’a ‘rã mboraei rupi, Nhanderuete rery rupi roupi ‘rã imoiny bandeira. Ixupe Senhor tomoingo renhemboayvua ha’e javi. 6 Aỹ ma xee aikuaa Senhor ogueraa jepe ‘rãa huvixarã omoĩ va’ekue. Ombovai ‘rã o’amba iky’a e’ỹ va’e gui, ha’e rami vy opo py oexa uka ‘rã opo’akaa. 7 Amongue ma ojerovia ‘rã mba’eyru re, amboae kuery ma kavaju re ‘rã ojerovia. Ha’e rã nhande kuery ma Senhor Nhanderuete rery anho jarovy’a. 8 Ha’e kuery ma ojero’a vy ho’apa ‘rã. Ha’e rã nhande kuery ma nhapu’ã ‘rã jakuapy. 9 Senhor, embopo’aka ke oreruvixave. Rojapukai ramo orembovai.