Salmos 110

1 Senhor aipoe’i xeruvixa pe: “Eguapy ke aiporu kuaa regua re, nderovaigua kuery ndepy guýry amoĩ peve”, he’i. 2 Sião tetã gui Senhor omboaxa ‘rã po pygua ndepo’aka aguã. Ha’e vy aipoe’i ‘rã: “Ndepo’aka ke nderovaigua kuery re”, he’i ‘rã. 3 Ha’e gui ma ndepo’akaa ára ndevygua kuery ojexa ukapa ‘rã ndere ouxea’i rami. Ndevygua kunumigue ma iky’a e’ỹ va’e py onhemonde reve ‘rã ikuai, aje’ive’i yxapy ojekuaa va’e rami. 4 Senhor ouraague ndoguerovai ‘rã: “Ndee ma sacerdote reĩ raka’e rã peve guarã, Melquisedeque reko rami ndereko va’e vy”, he’i rire. 5 Senhor reiporu kuaa regua re oĩ va’e ma ipoxya ára omou’ũmba ‘rã huvixave kuery. 6 Ombopaga ‘rã yvy regua kuery, omonyẽ ‘rã te’õgue anho. Nhoakã omou’ũmba ‘rã yvy jave re. 7 Oikoa rupi yxyry oĩ va’e gui oy’u ‘rã oiny, ha’e gui oakã omopu’ã ju ‘rã ovy.