ZEGAR HAW 142

1 Aze’eg Tupàn Tuweharupi Wiko Ma’e pe hepytywà àwàm henoz pà ihe. — Hepytywà pe nehe, a’eahy izupe. 2 Aze wyzài ma’e na’ikatu kwaw ihewe, amume’u izupe. Aze amo ikatu ‘ym ma’e uzeapo ihewe, amume’u izupe. 3 Aze apytu’u wewera’i hema’ereko haw iapo re, A’e ae ukwaw ikatu ma’e ihewe iapo kar haw a’e. Heàmàtyry’ymar uzapo hepyhyk àwàm Herape rupi wà. 4 Ame’e hezeake. Naexak kwaw hepytywà har. Naheta kwaw hepyro har wà. Naheta kwaw herehe uzekaiw ma’e wà. 5 O Tupàn Tuweharupi Wiko Ma’e, ahapukaz newe hepytywà àwàm henoz pà ihe. O Tupàn, ereiko herehe uzekaiw ma’e romo ne. Naputar kwaw amo ma’e hereko haw ihe. Xo ne zo uruputar ihe. 6 Herenu pe hepytywà àwàm henoz mehe nehe, Ta’e hemàno àwàm uhem etea’i ihewe xe. Hepyro pe heàmàtyry’ymar wanuwi nehe, Ta’e ikàg wera’u ihewi a’e wà xe. 7 Hemunyryk kar pe ma’erahy heremipuraraw wi nehe. Amume’u putar nekatu haw neremiaihu wazemono’og mehe ihe nehe, Ta’e nekatu ihewe tuweharupi ne xe.