ZEGAR HAW 137

1 Yrykawhu Mawiron ywy rehe har iwyr rehe zaneapyk mehe, Zazai’o Zeruzarez rehe zanema’enukwaw mehe zane. 2 Ximuzaiko zanewioràwiràn irir her ma’e Ywyra a’e pe har rehe. 3 A’e ywy rehe har zanereraha imunehew pyr romo wà. — Pezegar nehe, i’i zanewe wà. Nezewe uze’eg wà. — Pemuzàg zegar haw Xiàw parer nehe, i’i zanewe wà. 4 Amo ae ywy rehe zanereko mehe Nazapuner kwaw Tupàn Tuweharupi Wiko Ma’e pe zegar haw imuzàgaw rehe zane. 5 Aze hereharaz newi nehe, o Zeruzarez, Tuwe namupu pixik kwaw hewioràwiràn nehe. 6 Aze nahema’enukwaw katu kwaw nerehe nehe, tuwe napuner pixik kwaw hezegar haw rehe nehe, Aze nahema’enukwaw kwaw hemurywete kar arer ikàg wera’u ma’e hereko haw rehe. 7 O Tupàn Tuweharupi Wiko Ma’e, nema’enukwaw Enom izuapyapyr wanemiapo kwer ikatu ‘ym ma’e rehe nehe. Iaiw ma’e uzapo Zeruzarez heityk awer ‘ar rehe wà. Nema’enukwaw waze’eg rehe nehe. — Peityk tàpuz Zeruzarez pe har wamumaw pà upaw rupi pe wà nehe, i’i wà. 8 Mawiron, amo nemumaw putar wà nehe. Urereityk pe pe. Amo peneityk putar nezewegatete a’e wà nehe no. Hurywete putar peneityk àràm wà nehe. 9 Upyhyk putar kwarer pena’yr wà nehe, kuzàtàigwer penazyr wà nehe no. Ukamikamik putar itahu rehe wà nehe.