ಮತ್ತಾಯ 19

1 ಯೇಸುನಿ ಹ್ಯಾ ಗುಶ್ಟಿ ಸಾಂಗ್‌ಲ್ಯಾ ಪರತ್ ಗಲಿಲಾಯಾತ್ನಿ ಯೊರ್ದಾನ್ ನ್ಹಚೆ ಪಲಿಕ್ಲೆ ಯುದಾಯಾ ಸಿಮತ್ ಗೆಲಾ. 2 ಯೇಸುಚೆ ಮಾಗ್ನಿ ಖುಬ್ ಲೊಕ ಗಿಲಿತ. ತ್ಯನಿ ತ್ಯಾ ರೊಗಿನಾ ಬರಿಕಿಲಿತ. 3 ಥೊಡ ಫರಿಸಾಯ್ ಯೇಸುಪ ಯವುನ್ ತ್ಯಲಾ ಚು಼ಕಿತ್ ದರಾಯಾಸಾಟಿ, “ಕಚಾಬಿ ಯಕಾ ಕಾರ್ನಾನಿ ಯಕಾನಿ ಆಪ್ಲೆ ದನ್ಗರಿಲಾ ಸುಡುನ್ ದಿಯಾಚಿ ಶಾರ್ಕ ಕ್ಯಾ? ಮನ್ಹುನ್ ಇರ್ಚಾಲ್ಯಾಲ್ಯಾಲಾ. 4 ತ್ಯನಿ, “ಮನುಕ್ಷಾಲಾ ಉತ್ಪನ್ ಕೆಲ್ಯಾಲ್ಯಾನಿ ಆಂದಿಸ್ ತ್ಯನಾ ಬಾಪಯಿ ಆನಿ ಬಾಯಿಲ್ಮಾನುಸ್ ಕೆಲ್ಯಾ, 5 ತ್ಯಲಾಸ್ ದೇವಾನಿ, ಬಾಪಯಿ ಆಪ್ಲೆ ಆಯಿ ಬಾಲಾ ಸುಡುನ್ ಆಪ್ಲೆ ದನ್ಗರಿ ಸಂಗ ರಾನ್ಹಾರ್. ತಿ ದೊಗ ಯೆಕ್ ವ್ಹನಾರ್, ಮನ್ಹುನ್ ತುಮಿ ವಾಚಿವ್ಲ ನಾಹಿಸಾ ಕ್ಯಾ? 6 ಮನ್ಹುನ್ ತಿ ದೊಗ ಹಿತ್ನಿ ಮೊರ‍್ಹ ದೊಗ ನವ್ಹತ ಯೇಕುಸ್ ತ್ಯನಾ ದೊಗಾನಾ ದೇವಾನಿ ಯೇಕ್ ಕೆಲ್ಯಾತ. ಮನ್ಹುನ್ ಕುಟಲ್ಯಾಸ್ ಮಾನ್ಸಾನಿ ತ್ಯನಾ ಫಾಕಾಚಿ ನಾಹಿತ” ಮನ್ಹುನ್ ಉತ್ತರ್ ದಿಲಾ. 7 ಫರಿಸಾಯಾಂಚಾನಿ, “ತಸ ಜಾ಼ಲ್ಯಾ ಯಕಾನಿ ಶೊಡ್ ಸುಟಿಚ಼ ಪತ್ರ ಲಿವುನ್ ದಿವುನ್ ಸುಡುನ್ ದಿಯಾಚ಼ ಮನ್ಹುನ್ ಮೊಶೆನಿ ಆಪ್‌ಲ್ಯಾ ಧರ್ಮಶಾಸ್ತಾರಾತ್ ಸಾಂಗ್ಲ ಕಾ? ಮನ್ಹುನ್ ಇಚಾರ್ಲ. 8 ಯೇಸುನಿ, “ತುಮಿ ದೇವಾಚ಼ ಸಿಕಿವ್ನ ಮನಾತ್ ಗೇತ್ಲ ನಾಹಿಸಾ ಮನ್ಹುನ್ ತುಮ್ಚೆ ದನ್ಗರಿನಾ ಸುಡುನ್ ದಿಯಾಚಾ ಮೊಶೆನಿ ಸುಟ್ನುಕ್ ದಿಲಿ. ಫನ್ ದನ್ಗರಿಲಾ ಸೊಡಾಚಿ ಪೈಲ ನವ್ಥ. 9 ಮಿ ತುಮಾನಾ ಸಾಂಗಾಚ಼ ಕ್ಯಾ ಮಂಜೆ, ಆಪ್ಲೆ ದನ್ಗರಿಲಾ ಸುಡುನ್ ದುಸ್ರಿಲಾ ಲಗಿನ್ ವ್ಹತ್ಯಾಲಾ ರಾಂಡ್‌ ಸಂಗತ್ ಕರ್ತ್ಯಾಲಾ ವ್ಹನಾರ್. ಪೈಲಿ ದನ್ಗರ್ ದುಸ್‌ರ‍್ಯಾ ಸಂಗ ರಾಯ್ಲಿತ ತ್ಯನಿ ತಿಲಾ ಸುಡುನ್ ದುಸರಿಲಾ ಲಗಿನ್ ವ್ಹವಾವ” ಮನ್ಹುನ್ ಉತ್ತರ್ ದಿಲಾ. 10 ತವಾ ತ್ಯಚಾ ಶಿಶಾಂಚಾನಿ ಯೇಸುಲಾ, “ಯಕಾನಿ ಆಪ್ಲೆ ದನ್ಗರಿಲಾ ಸುಡುನ್ ದಿಯಾ ಹ್ಯ ಯಾಕುಸ್ ಕಾರನ್ ಜಾ಼ಲ್ಯಾವ, ಲಗಿನ್ ಜಾ಼ಲ್ಯಾ ನಸ್‌ಲ್ಯಾವಸ್ ಬರ ಮನ್ಲ. 11 ತ್ಯಲಾ ಯೇಸುನಿ, “ಲಗ್ನಾಚೆ ಹೆ ಗುಶ್ಟಿತ್ ಹ್ಯ ಖರ ಪರ್ತೇಕ್ ಜಾ಼ನ್ ಗಿಹ್ಯಾ ವ್ಹಯಿತ್ ನಾಹಿ. ಹ್ಯ ಗಿಹ್ಯಾಲಾ ದೇವಾನಿ ಕುನಾಲಾ ಬರಾ ಮನ್ಹುನ್ ಕೆಲ್ಯಾ ತ್ಯಲಾ ತ್ಯವ್ಡಸ್ ವ್ಹನಾರ್. 12 ಥುಡಿ ಲಗಿನ್ ವ್ಹಯಾ ನಸಾಲಾ ದುಸ್ರಿ ದುಸ್ರಿ ಕಾರ್ನ ಹಾತ್ತ. ಜ಼ಲಾಮ್‌ಲ್ಯಾ ದರ್ನಿ ಥುಡಿ ಹಿಜ್ಡಿ ವ್ಹವುನ್ ಆಸ್‍ಥ್ಯಾತ. ಆನಿ ಥುಡಿ ದುಸ್‌ರ‍್ಯಾಂಚಾಪ್ನಿ ಹಿಜ್ಡಿ ವ್ಹವುನ್ ರಾಥ್ಯಾತ. ದುಸ್ರಿ ಥುಡಿ ಪರಲೊಕ ರಾಜಾ ಸಾಟಿ ಲಗಿನ್ ಕರುನ್ ಗಿಹಿತ್ ನಾಹಿತ. ಫನ್ ಲಗಿನ್ ವ್ಹನಾರಾ ಲಗ್ನಾಚೆ ಗುಶ್ಟಿತ್ ಹ್ಯ ಸಿಕಿವ್ನ ಗಿಹ್ಯಾ ವ್ಹಯಿ” ಮನ್ಹುನ್ ಉತ್ತರ್ ದಿಲಾ. 13 ಮಂಗ್ ಲೊಕ್ ಯೇಸುಚೆ ಜ಼ವಳ್ ಯವುನ್ ಆಪ್‌ಲ್ಯಾ ಬಾರಿಕ್ ಮುಲಾನಾ ಆನುನ್ ತ್ಯಂಚಿ ಸಾಟಿ ಹಾತ್ ಥಿವುನ್ ಮಾಗ್ನ ಕರಾಯಾ ವ್ಹಯಿ ಮನ್ಹುನ್ ತ್ಯಚಿಪ ಮಂಥ್ಯಾತ. ಹ್ಯ ಬಗ್‌ಲ್ಯಾಲ್ಯಾ ಶಿಶಾಂಚಾನಿ ಬಾರಿಕ್ ಮುಲಾನಾ ತ್ಯಚಿಪ ಆನುನಕೊಸಾ ಮನ್ಹುನ್ ದಪ್‌ಕ್ಯಾವ್‌ತ್ಯಾತ. 14 ಫನ್ ಯೇಸುನಿ, “ಬಾರಿಕ್ ಮುಲಾನಾ ಮಾಜಿಪ ಸೊಡಾ ತ್ಯನಾ ಆಡ್ಯಾವು ನಕೊಸಾ. ಕಾ ಮಂಜೆ ದೇವಾಚ಼ ರಾಜೆ ಹ್ಯಾ ಬಾರಿಕ್ ಮುಲಾ ಶಾರ್ಕ ಆಸ್‌ಲ್ಯಾಲ ಲೊಕಾಂಚ಼ಸ್” ಮನ್ಲಾ. 15 ಮಂಗ್ ಯೇಸುನಿ ಆಪ್ಲ ಹಾತ್ ಮುಲಾವ್ನಿ ಥಿವುನ್ ಆಶಿರ್ವಾದ್ ಕೆಲಾ. ಮಂಗ್ ತಿಥ್ನಿ ಗೆಲಾ. 16 ಯಕಾನಿ ಯೇಸುಚೆ ಜ಼ವಳ್ ಯವುನ್, “ಸಿಕಿವ್ನಾರ‍್ಯಾ ಮಿ ಶಾಶ್ವತ್ ಜೀವ್ ಗಿಹ್ಯಾ ಕ್ಯಾ ಚಾ಼ಂಗ್ಲ ಕಾಮ್ ಕರಾಯಾ ವ್ಹಯಿ? ಮನ್ಹುನ್ ಇಚಾರ್ಲ. 17 ಯೇಸುನಿ, “ಚಾ಼ಂಗ್ಲೆ ಗುಶ್ಟಿತ್ ತು ಮನಾ ಇಚಾರಾಚ಼ ಕಾ? ದೇವ್ ಯಕ್ಲಾಸ್ ಚಾ಼ಂಗ್ಲಾ. ಫನ್ ತು ಶಾಶ್ವತ್ ಜೀವ್ ಗಿಹ್ಯಾ ವ್ಹಯಿ ಮನ್‌ಲ್ಹಾಸ್ಥ ಹ್ಯಾ ದೇವಾಚಾ ಹುಕ್ಮಾ ಶಾರ್ಕಾ ಚಾ಼ಲ್” ಮನ್ಹುನ್ ಮನ್ಲಾ. 18 ತ್ಯೊ ಮಾನುಸ್, “ಕಚಾ಼ ದೇವಾಚಾ಼ ಹುಕುಮ್?ಮನ್ಲಾ. ಯೇಸುನಿ, “ಖುನ್ ಕರಾಚಾ಼ ನಾಹಿ, ವೆಬಿಚಾರ್ ಕರಾಚಾ಼ ನಾಹಿ, ಚು಼ರಿ ಕರಾಚಿ ನಾಹಿ, ಲಬಾಡ್ ಸಾಕ್ಷಿ ಸಾಂಗಾಚಿ ನಾಹಿ. 19 ತುಜೆ ಆಯಿ ಬಾಲಾ ಮರ‍್ಯಾದ್ ದಿಯಾ ವ್ಹಯಿ ಆನಿ ತುಜಿ ತು ಮಾಯಾ ಕರ್ತ್ಯಾಚೆಗತ್ ಸೆಜಾ಼ರ‍್ಯಾಂಚಿ ಮಾಯಾ ಕರಾಯಾ ವ್ಹಯಿಸ್” ಮನ್ಲಾ. 20 ತ್ಯೊ ಪ್ಯೊರ್ಗಾ, “ಮಿ ಹ್ಯ ಸಗ್ಳ ಕರ್ತ್ಯಾಲೊ ಹಾ. ದುಸ್ರ ಕ್ಯಾ ತರಿ ಕರಾಯಾ ವ್ಹಯಿ ಕ್ಯಾ? ಮನ್ಹುನ್ ಇಚಾರ್ಲ. 21 ಯೇಸುನಿ, “ತು ಸಗ್ಳಾ ಪುರ್ನ ವ್ಹಯಾ ವ್ಹಯಿಸ್ತ ಜಾ಼ವುನ್ ತುಜಿ ಆಸ್ಥಿ ಸಗ್ಳಿ ಇಕುನ್, ಆಲ್ಯಾಲ ಪೈಸ ಸಗ್ಳ ಗರಿಬಾನಾ ದೇ. ತವಾ ತುಲಾ ಪರಲೊಕಾತ್ ಮುಟಿ ಆಸ್ಥಿ ಗಾವ್ನಾರ್. ಮಂಗ್ ಮಾಜೆ ಮಾಗ್ನಿ ಯೇ ಮನ್ಹುನ್ ಉತ್ತರ್ ದಿಲಾ. 22 ಹ್ಯ ಐಕುನ್ ತ್ಯೊ ಖುಬ್ ದುಃಖಾನಿ ಗೆಲಾ. ಕಾ ಮಂಜೆ ತ್ಯೊ ಮೊಟಾ ಸಾವ್ಕೋರ್ ಜಾ಼ಲ್ಥಾ. 23 ತವಾ ಯೇಸುನಿ ಆಪ್‌ಲ್ಯಾ ಶಿಶಾನಾ, “ಮಿ ತುಮಾನಾ ಖರ ಸಾಂಗ್ತೊ. ಸಾವ್ಕೋರ್ ಆಸ್‌ಲ್ಯಾಲಾ ಸ್ವರ್ಗಾಚಾ ರಾಜಾತ್ ಜಾ಼ಯಾಚ಼ ಖುಬ್ ಕಠಿನ್. 24 ವ್ಹಯ್, ಸಾವ್ಕೋರ್ ಆಸ್‌ಲ್ಯಾಲಾ ದೇವಾಚಾ ರಾಜಾತ್ ಜಾ಼ಯಾಚಾವ್ನಿ ಹೂಟ್ ಸೂಚಾ ಡೊಳ್ಯಾತ್ನಿ ಜಾ಼ಯಾಚ಼ ಸಲ್ಪ ಮನ್ಹುನ್ ಮಿ ತುಮಾನಾ ಸಾಂಗ್ತೊ” ಮನ್ಲಾ. 25 ಶಿಶಾಂಚಾನಿ ಹ್ಯ ಐಕುನ್ ಖುಬ್ ಆಜಾಬ್ ವ್ಹವುನ್, “ತಸ ಜಾ಼ಲ್ಯಾವ ಕುನಾಚಿ ರಕ್ಷಣೆ ವ್ಹನಾರ್? ಮನ್ಹುನ್ ಇಚಾರ್ಲ. 26 ಯೇಸುನಿ ಆಪ್‌ಲ್ಯಾ ಶಿಶ್ಯಾಂಚಿಕ್ಡ ನದಾರ್ ಥಿವುನ್, “ಹ್ಯ ಮಾನ್ಸಾಲಾ ವ್ಹಯಿತ್ ನಸ್‌ಲ್ಯಾಲ ಕಾಮ್. ಫನ್ ದೇವಾಲಾ ಸಗ್ಳ ವ್ಹತ್ತ” ಮನ್ಹುನ್ ಸಾಂಗ್ಲ. 27 ಪೇತ್ರಾನಿ ಯೇಸುಲಾ, “ಆಮಿ ಆಮಾನಾ ಆಸ್‌ಲ್ಯಾಲ ಸಗ್ಳ ಸುಡುನ್ ತುಜೆ ಮಾಗ್ನಿ ಆಲಾವ್. ಆಮಾನಾ ಕ್ಯಾ ಗಾವ್ನಾರ್” ಮನ್ಲಾ. 28 ಯೇಸು ಶಿಶಾನಾ ಆಸ ಮನ್‍ಲ್ಹಾ: ಮಿ ತುಮಾನಾ ಖರ ಸಾಂಗ್ತೊ. ನವಿ ದುನಿಯಾ ಕರ್ನಾರ್ ತವಾ ಮಾನ್ಸಾಚಾ಼ ಲ್ಯೊಕ್ ಆಪ್‌ಲ್ಯಾ ಮೊಟ್ಯಾ ಸಿಂಹಾಸನಾವ ಬಸ್ನಾರ್. ಮಾಜೆ ಮಾಗ್ನಿ ಆಲ್ಯಾಲ ತುಮಿ ಸಗ್ಳ ಸಿಂಹಾಸನಾವ ಬಸುನ್ ಇಸ್ರಾಯಲಾತಲ್ಯಾ ಬಾರಾ ಕುಳ್ಯಾಂಚಾ಼ ನ್ಯಾಯಿ ನಿವಡ್ನಾರ್. 29 ಮಾಜೆ ಮಾಗ್ನಿ ಯಯಾಲಾ ಆಪ್ಲ ಘರ್, ಭನ್ಹಿ ಬಾವ್ಹಾನಾ, ಆಯಿ ಬಾಲಾ, ಪೊರಾನಾ ಆನಿ ಆಸ್ಥಿ ಶೊಡ್‌ಲ್ಯಾಲ ಪರ್ತೇಕ್ ಜಾ಼ನ್ ಆಪ್ನು ಶೊಡ್‌ಲ್ಯಾಲ್ಯಾವ್ನಿ ಆಗಾವ್ ಗೇನಾರ್. ನಾಹಿತ ಶಾಶ್ವತ್ ಜೀವ್ ಗೇನಾರ್. 30 ಫನ್ ಆಂದಿಚಾತ್ಲ ಖುಬ್ ಜಾ಼ನ್ ಮಾಗ್ಲ ವ್ಹನಾರ್; ಮಾಗ್ಲ ಖುಬ್ ಜಾ಼ನ್ ಆಂದಿಚ಼ ವ್ಹನಾರ್.