कुरीन्थियो 10

1 मी उ पौलुस जो तुमारा सामने अच्छो हइ, पर पीच्छा पीछे तुमारा तरफ हिम्मत करुस हइ. तुम खे मसीह की नम्रता, अरु कोमलता का करण समझुस हइ. 2 मी या प्रार्थना करुस हइ, कि तुमारा सामने मेझे कडक होन कि हिम्मत करणु नी पडे. जसो मी केत्ता पर जो हम, आंग, जसो चलनआला समझस हइ, वीरता दिखान को बिचार करुस हइ. 3 क्युकि अगर हम आंग मे चलस फिरस हइ, ते भी अंगार का जसो नी लडु 4 क्युकि हमारी लडैइ, हथियार शारीरिक नी, पर गड् खे ढाक देन का लिये परमेश्‍वर का वजेसे सामर्थी हइ. 5 हम कल्पनाहोन खे, अरु हर एक उची बात खण्डन जो परमेश्वर की पैछान का खीलाप मे उठस हइ. हर एक भावना खे कैद करी मसीह कि आज्ञा करी बनैइ देस हइ. 6 अरु तैयार र्‍हेस हइ कि जब तुमारी आज्ञा माननो पूरी हुइ जायेका ते हर एक प्रकार की आज्ञा नी मानन को दंड मीले हे. 7 तुम या बातहोन खे देखस हइ, जो आखहोन का सामने हइ, अगर कोय को अपना पर यो भरोसो हइ, कि मी मसीह को हइ, ते यो भी जानी ले कि जसो उ मसीह को हइ, ओसो ही हम भी हइ. 8 क्युकि अगर मी उ अधिकार का बारे मे अरु भी घमण्ड दिखायु, जो प्रभु ने तुमारो बिगाडन का लिये नी पर उन्नती का लिये हम, दियो हइ, ते लजानको नी. 9 यो मी येका लिये बोलुस हइ, कि चिठ्ठीहोन, का वजेसे तुम डरानआला नी ठैरायु. 10 क्युकि वे बोलस हइ, “ओकी चिठ्ठीहोन ते गम्भीर अरु प्रभाकुलाली हइ. पर जब देखस हइ, ते बोलस हइ उ आंग को नीर्बल अरु वक्तव्य मे हलको जानी पडस हइ." 11 येका लिये जो असो बोलस हइ, कि उ यो समझ रख्येका कि जसो पीछे चिठ्ठीहोन मे हमारो वचन हइ, ओसो ही तुमारा सामने हमारा काम भी हुये. 12 क्युकि हम या हिम्मत नी कर्‍हे कि हम अपना आप खे उनका साथ गिन्या या उनसे अपना खे मील्यो का जो अपनी बड्यैइ करस हइ, अरु अपना आप खे नाप तोलिका खुद को न्याय करस हइ. 13 हम तो हद से बाहेर घमण्ड कभी नी कर्येका पर वाइ हद तक जो परमेश्वर ने हमारा लिये ठैइऱ्यो दी हइ, अरु ओमे तुम भी अय गए हइ अरु ओका जसो घमण्ड भी कर्ये. 14 क्युकि हम अपनी हद से बाहेर अपना आप, बडानो नी चाह्ये का जसो कि तुम तक नी पहुचन की दशा मे होतो, क्युकी मसीह को सुसमाचार सुनाता हुये तुम तक पहुची गा हइ. 15 अरु हम हद से बाहेर दुसरा की मेहनत पर घमण्ड नी कर्ये. पर हम, आस हइ, कि जो-जो तुमारी आस बडतो जाह्ये त्यो-त्यो हम अपनी हद जसो तुमारा करण अरु भी बडता जाह्ये. 16 कि हम तुमारी हद से आगे बडी, सुसमाचार सुनायो का अरु यो नी, कि हम दुसरा की हद, अंदर बन्या बनाया काम होन पर घमण्ड कर्ये. 17 पन जसो शास्त्र मे लीखो हइ ,जेखे घमण्ड करणो हइ, उ प्रभु को काम पर घमण्ड करीये. 18 क्युकि जो अपनी बड्यैइ करस हइ, उ नी, पर जेकी बड्यैइ प्रभु करस हइ, उ ग्रहण कर्यो जास हइ.