ሶፎናሳ ማፃፋ 1

1 አሞነ ናአይ እዮስያስ ይሁዳን ካዎትዳ ዎደ ሶፎንያሳኮ ይዳ ጎዳ ቃላይ ሀይሳ። ሶፎንያስ ኩሻ ናኣ፤ ኩሽ ጋዳላ ናአ፤ ጋዳል አማረ ናአ፤ አማረይ ህዝቅያሳ ናኣ። 2 “ታኒ ቢታ ቦላ ደእያባ ኡባ ይሳና። 3 አሰነ መሄ፥ ሳሎ ካፎታነ አባ ሞሎታ ይሳና። ኢታ አሳታ ሽራ የጋና፤ አሳ ዛረ ቢታ ቦላፈ ይሳና” ያጌስ ጎዳይ። 4 “ይሁዳንነ የሩሳላመን ደእያ ኡባ ሴራናዉ ታ ኩሽያ ደንና። ባኣለ ኤቃ ጎይነይሳታነ እያ ሀጋዝያ ካህነታ ሄ በሳፈ ይሳና። 5 ኬ ቦላ ከይድ አዋስ፥ አጌናስነ ፆልንቶታስ ጎይነይሳታ ታኒ ይሳና። ጎዳ ጎይንሸነ እያ ሱንን ጫቅሸ ሞሎካ ጌተትያ ኤቃ ሱንን ጫቀይሳታ ታኒ ይሳና። 6 ታና ካሎ አግድ ጉየ ስምዳይሳታ፥ ታና ኮይቦናይሳታነ ታና ኦይችቦናይሳታ ታኒ ይሳና” ያጌስ ጎዳይ። 7 ጎዳ ጋላሳይ ማትዳ ግሾ፥ ኡባ ሃርያ ጎዳ ስንን ስእ ጊተ! ጎዳይ ያርሹዋ ጊግስስ፤ ቃስ ባ ፄግዳ እማታ ጌሽስ። 8 “ጎዳ ያርሹዋ ጋላስ ሀላቃታ፥ ካዋ ናይታነ አላጋ ቢታ ማኦ ማእዳ ኡባ ታኒ ሴራና። 9 ሄ ጋላስ አላጋ ቢታ አሳታዳ፥ ኤቃ ጎይነይሳታነ ባንታ ጎዳ ኬ ጌላተንነ ጭሞን ኩንይሳታ ታኒ ሴራና” ያጌስ ጎዳይ። 10 “ሄ ጋላስ ሞሎ ፐንግያ ባጋራ ዋሶይ፥ ካታማስ ናምአን ሻሁዋን ዬሆነ ዙማታ ቦላ ግታ ዶምኤ ግርስ ስኤታና። 11 ህንተኖ፥ ካታማስ ጋርሳ ባጋን ደኤይሳቶ፥ ዬክተ። ያን ዛልእያ ኡባይ ይዶሶና፤ ብራ ኦይክዳይሳት ሀይቅ ዉርዶሶና። 12 ሄ ጋላስ ታኒ ፆምፐ ኦይዳ የሩሳላመ ግዱዋ ኮያና። ህርግ ባይና ዎ ኡትድ ባንታ ዎዛናን፥ ‘ጎዳይ ሎኦካ ኢታካ’ ገይሳታ ታኒ ሴራና። 13 ኤንታ ሻሎይ ቦንቀታና፤ ኤንታ ኬይ ላለታና። ኤንቲ ኬ ኬፃና፥ ሽን ሄ ኬን ዶኮና፤ ዎይነ ቶካና፥ ሽን ሄ ዎይንያ ኡዮኮና” ያጌስ ጎዳይ። 14 “ጎዳ ግታ ጋላሳይ ማትስ፤ ኤለስድ ጋክስ። ጎዳ ጋላሳይ ጫሞ ጋላስ፤ ሄ ጋላስ ምኖ ኦላንቾትካ ዋሶ ጎቻና። 15 ሄ ጋላሳይ ሀንቆ ጋላስ፥ ሄ ጋላሳይ መቶነ ኡንአ ጋላስ፥ ዮነ ላለተ ጋላስ፥ ማነ ጫጋና ጋላስ፥ ሻራነ ሳካና ማ ጋላስ ግዳና። 16 ሄ ጋላሳይ ድረትዳ ካታማታ ቦላ፥ አዱሳ ግምበታ ቦላ ኦላ ሞይዘይ ፑነታና፤ ጊገታ ግያ ዋሶይ ስኤታና። 17 ኤንቲ ታና ቆህዳ ግሾ፥ ቆቀዳ ታታፋና ጋካናዉ፥ ኤንታ ቦላ መቶ ኤሀና። ኤንታ ሱይ ድኦዳ ጎጋና፤ ኤንታ አሀይ ፕቶዳ የገታና። 18 ጎዳ ሀንቆ ጋላስ ኤንታ ብራይነ ኤንታ ዎርቃይ ኤንታ አሸና። እ ሳአን ደእያ ኡባ ቆፖና ይሳና፤ ቢታ ኡባይ እያ ሀንቁዋ ታማን ሜተታና” ያጌስ ጎዳይ።