ዛካርያሳ ማፃፋ 4

1 ሄሳፈ ጉየ፥ ታራ ሃሳያ ኪታንቾይ ስሚድ ይድ፥ ስክዳ አስ ባርክያ መላ ታና ባርክስስ። 2 እ ታኮ፥ “ኔኒ አይ በአይ?” ያግስ። ታኒ ዛራዳ፥ “ታኒ ዎርቃ ፃላላፐ ኦሰትዳ ፆምፐ ዎያ ኮጫ በአይስ፤ እያ ፄራን ዛይተ ፃሮይ ደኤስ። ቃስ እያ ቦላ ላፑን ፆምፐት ደኦሶና፤ ሄ ላፑን ፆምፐታስ ላፑን ላፑን ፒቀት ደኦሶና። 3 ሄ ፆምፕያ ዎያ ኮጫ ማታን ናምኡ ሻማሆ ምት ደኦሶና። ኤንቲ ዛይተ ፃሩዋፐ ኡሻቻ ባጋራነ ሀድርሳ ባጋራ ደኦሶና” ያጋስ። 4 ታራ ሃሳያ ኪታንቹዋ፥ “ታ ጎዳዉ፥ ሀይስ አይቤ?” ያጋዳ ኦይቻስ። 5 ኪታንቾይ ዛሪድ፥ “ሀይሳቲ አይበኮ ኤርኪ?” ያግስ። ታኒ ዛራዳ፥ “ታ ጎዳዉ፥ ታኒ ኤርከ” ያጋስ። 6 እ ታኮ፥ “ዛሩባበላስ ጎዳይ ኦድዳ ቃላይ ሀይሳ፤ ‘ታ አያናናፐ አትሽን፥ ዎልቃን ዎይኮ ምኖተን ግደና’ ያጌስ ኡባፈ ዎልቃማ ጎዳይ። 7 ግታ ዙማዉ፥ ኔኒ አይቤ? ኔኒ ዛሩባበላ ስንን ልች ግዳ ደምባ ግዳና። ዛሩባበል ፆሳ ኬ ኬፅ ፖልድ፥ ዉርሰ ሹቻ ከስያ ዎደ አሳይ፥ ‘ሀሹ! ሀሹ ፖለትስ’ " ያጋና። 8 ቃስካ ጎዳ ቃላይ ታኮ ሀይሳዳ ያግድ ይስ። 9 “ፆሳ ኬ ባሱዋ ዛሩባበላ ኩሸት ባስዶሶና፤ እያ ኩሸት ኬፅድ ፖላና። ሄሳፈ ጉየ፥ ኡባፈ ዎልቃማ ጎዳይ ታና ህንተኮ ኪትዳይሳ ህንተ ኤራና። 10 ሀ ጉ ዶመ ካያ ኦንካ ጉየፐ ኡፋይታና፤ ኤንቲ ዛሩባበላ ኩሸን ቱምብያ በአና። ሀይሳቲ ላፑን ፆምፐት ቢታ ኡባ ዩይድ ፄልያ ጎዳ አይፈታ” ያግስ። 11 ታኒ ኪታንቹዋ ዛራዳ፥ “ሀ ፆምፐ ዎያ ኮጫፐ ኡሻቻ ባጋራነ ሀድርሳ ባጋራ ደእያ ሀ ናምኡ ሻማሆት አይቤ?” ያጋዳ ኦይቻስ። 12 ጉጃዳካ፥ “ዛይተይ ኤንታፈ ጎግያ ናምኡ ዎርቃ ፒቀታ ማታን ደእያ ናምኡ ሻማሆ ም ታሸት አይቤ?” ያጋዳ ኦይቻስ። 13 እ ዛሪድ፥ “ሀይሳቲ አይበኮ ኔኒ ኤርኪ?” ያግስ። ታኒ ዛራዳ፥ “ታ ጎዳዉ፥ ታኒ ኤርከ” ያጋስ። 14 እ ዛሪድ፥ “ሀይሳቲ ሳአ ኡባ ጎዳስ ኦያ ናምኡ ትየትዳ አሳታ” ያግስ።