ዛካርያሳ ማፃፋ 1

1 ዳርዮስ ካዎትዳ ናምአን ላይን፥ ሆስፑን አጌናን፥ ጎዳ ቃላይ እዶ ናኣ፥ ባራካ ናኣ፥ ናብያ ዛካርያሳኮ ይስ። 2 “ጎዳይ ህንተ ማይዛታ ቦላ ዳሮ ሀንቀትስ። 3 ሽን ሀእ አሳስ ሀይሳዳ ያጋዳ ኦዳ፦ ‘ታኮ ስምተ፤ ታኒ ህንተኮ ስማና’ ያጌስ ኡባፈ ዎልቃማ ጎዳይ። 4 ካሰ ናበት፥ ህንተ አዋታኮ፥ ‘ህንተ ኢታ ኦግያፐነ ኢታ ኦሱዋፐ ስምተ’ ያግድ ኦድን፥ ስኦና እፅድ፥ ባንታ ኢታ ኦግያፐነ ኦሱዋፐ ስሞና እፅዳ፥ ህንተ ማይዛታዳ ሀኖፕተ” ያጌስ ኡባፈ ዎልቃማ ጎዳይ። 5 ህንተ ማይዛት ሀእ አዉን ደኦና? ሄ ናበት መርናዉ ፓፃ ደኦና? 6 ግዶሽን፥ ናበታ፥ ታ አይለታ ባጋራ ታኒ ኦድዳ ኪታትነ ህገት ኡባይ ህንተ ማይዛታ ቦላ ጋክቤኔ? ያትን፥ ኤንቲ ባንታ ናጋራ ፓፅድ፥ “ኡባፈ ዎልቃማ ጎዳይ ኑ ኦግያዳነ ኑ ኦሱዋዳ ኑስ እማና ግዳይሳዳ ባ ኦሱዋ ኦስ” ያግዶሶና። 7 ዳርዮስ ካዎትዳ ናምአን ላይን፥ ሻባፃ ጌተትያ ታማነ እስን አጌናን፥ ላታማነ ኦይዳን ጋላሳን፥ ጎዳ ቃላይ እዶ ናኣ፥ ባራካ ናኣ፥ ናብያ ዛካርያሳኮ ይስ። 8 ታኒ ቃማ ቆንጨን፥ ዞኦ ፓራ ቶግዳ እስ አስ በአስ። እ ዛንጋራን ደእያ ባርሰኔተ ጌተትያ ምታ ጋርሳን ኤቅስ፤ እያፐ ጉየ ባጋራ ዞኦ፥ ዳማነ ቦ ፓራት ደኦሶና። 9 ያትን ታኒ፥ “ታ ጎዳዉ፥ ሀይሳቲ አይቤ?” ያጋዳ ኦይቻስ። ታራ ሃሳያ ኪታንቾይ፥ “ሀይሳቲ አይበኮ ታኒ ነና በሳና” ያግስ። 10 ባርሰኔተ ም ጋርሳን ኤቅዳ ኡራይ፥ “ሀይሳቲ ሳኣ ኡባ ዩይድ ዎቻና መላ ጎዳይ ኪትዳይሳታ” ያግስ። 11 ኤንቲ ባርሰኔተ ም ጋርሳን ኤቅዳ ጎዳ ኪታንቹዋኮ፥ “ኑኒ ሳአ ኡባ ዩይድ ዎችዳ፤ ሳእ ዎፑ ግድ ሳሮ ደኤስ” ያግዶሶና። 12 ሄሳፈ ጉየ፥ ጎዳ ኪታንቾይ፥ “አቤት ኡባፈ ዎልቃማ ጎዳዉ፥ ኔኒ ሀንቀትን ሀእ ላፑን ታሙ ላይ ኩምስ፤ ያትን፥ ኔኒ የሩሳላመነ ይሁዳ ካታማታ ማሮና አዉደ ጋካናዉ ጋምአኔ?” ያግስ። 13 ጎዳይ ታራ ሃሳያ ኪታንቻዋስ ሎኦነ ምንያ ቃላን ዛሮ እሚስ። 14 ታራ ሃሳያ ኪታንቾይ ታኮ፥ “ሀ ቃላ አዋጃ! ኡባፈ ዎልቃማ ጎዳይ፥ ‘ታኒ የሩሳላመስነ ፅዮነስ ዳሮ ምሸታይስ። 15 ኑኒ ሳሮ ደኦስ ግድ ቆፕያ ሀራ ካዎተታ ቦላ ታኒ ዳሮ ሀንቀታስ። ታኒ ታ አሳ ቦላ ጉራ ሀንቀታስ፥ ሽን ኤንቲ አድ ታ ደርያ ቆህዶሶና።’ 16 ሄሳ ግሾ፥ ታኒ የሩሳላመኮ ማሮታን ስማና፤ ታ ኬይ ዛሪድ ያን ኬፀታና፤ የሩሳላመ ካታማ ቦላ ዋ ዎዶሮ የጋና” ያጌስ ኡባፈ ዎልቃማ ጎዳይ። 17 ጉጃዳ ሀይሳዳ ያጋዳ አዋጃ፦ “ታ ካታማታ ዱረተይ ኩምድ ፓላሀና፤ ታኒ ጎዳይ ፅዮነ ዛራ ምንና፤ የሩሳላመ ዛራ ዶራና” ያጌስ ኡባፈ ዎልቃማ ጎዳይ። 18 ታኒ ቆንጨን ኦይዱ ካጨታ በአስ። 19 ታራ ሃሳያ ኪታንቹዋ፥ “ሀይሳቲ አይቤ?” ያጋዳ ኦይቻስ። እ ዛሪድ፥ “ሀ ካጨት ይሁዳ፥ እስራኤለነ የሩሳላመ ላልዳ ካዎተታ” ያግስ። 20 ሄሳፈ ጉየ፥ ጎዳይ ታና ብራታ ቆፅያ ኦይዱ ሂላንቾታ በስስ። 21 ታኒ፥ “ሀይሳቲ አይ ኦናዉ ይዶና?” ያጋዳ ኦይቻስ። እ ዛሪድ፥ “ሀይሳቲ ኦንካ ዛር ደንና መላ ይሁዳ ቢታ ላልዳ ካጨታ ካዉሻናዉነ ይሳናዉ ይዶሶና። ኤንቲ ይሁዳ ቢታ ላላናዉ ባንታ ካጭያ ደንዳ ሀራ ካዎተታ ካጭያ ሾጭድ ሳአን የጋናዉ ይዶሶና” ያግስ።