ትቶ ኪታ 2

1 ሽን ኔኒ ሱረ ትምርትያ ጳልቆና ትምርተ ታማርሳናዉ በሴስ። 2 ጭማ አደት ባንታና ሃረይሳታ፥ ዎፑ ግዳይሳታ፥ ቦንቸትዳይሳታ፥ አማኖን፥ ሲቆንነ ዳንዳአን፥ ምኖ ግዳና መላ ዞራ። 3 ሄሳዳካ፥ ጭማ ማጫሳይ ባንታ ዱሳን ጌሻታ፥ ዝግሮናይሳታ፥ ዎይነ ኡሻን ሃረቶናይሳታነ ሎኦባ ታማርሰይሳታ ግዳና መላ ታማርሳ። 4 ኤንቲ ሄሳዳ ሀንኮ ያላጋ ማጫሳይ ባንታ አዝናታነ ባንታ ናይታ ሲቃና መላ ታማርሳናዉ ዳንዳኦሶና። 5 ፆሳ ቃላይ ቦረቶና መላ ባንታና ሃረይሳታ፥ ጌሻታ፥ ባንታ ሶን ኦይሳታ፥ ኬሀታነ ባንታ አዝናታስ ኪተተይሳታ ግዳና መላ ያላጋ ማጫሳ ታማርሶና። 6 ሄሳዳካ፥ ዶን አደት ባንታና ሃራና መላ ዞራ። 7 ኔኒ ነ ሁጰን ሎኦ ኦሶ ኡባን ኤንታዉ ሌምሶ ግዳ። ኔኒ ነ ትምርትያን ኤቅዳይሳነ አማነትዳይሳ ግዳ። 8 ኑ ሞርከት ኑና ዝግራናዉ ጋሶያባይ ኤንታዉ ይን ኤንቲ ዬላታና መላ ኔኒ ቦረቶና ሎኦ ኦዳ ኦዴታ። 9 አይለት ኡባባን ባንታ ጎዳታስ ኪተታና መላ ኤንታ ኡፋይሳና መላነ ኤንታራ ፓላሞና መላ ዞራ። 10 ኤንቲ ባንታ ጎዳታፐ ካይሶቶፖ። ሄስካ፥ ኑና አሽያ ፆሳ ትምርተይ፥ ኡባ ኦገን ዶሰትዳይሳ ግዳና መላ ባንታ ኦያ ኦሱዋን አማነተይሳታ ግደይሳ በሳና መላ ኤንታ ዞራ። 11 አሰ አሽያ ፆሳ አ ኬሀተይ አሳ ኡባስ ቆንጭስ። 12 ሄ አ ኬሀተይ፥ ኑ ናጋራነ ሀ አላምያ አሙዋ አግድ፥ ሀ ዎድያን ኑና ሃርድ፥ ቱማ አያና ደኡዋንነ ፅሎተን ዳና መላ ኑና ታማርሴስ። 13 ኑኒ አንጀትዳ ኡፋይሳ ግድዳ ግታ ፆሳነ ኑና አሽያ የሱስ ክርስቶሳ ቦንቾ ቆንጨ ናጎስ። 14 ኢታ ኦሶ ኡባፈ ኑና ዎዛናዉነ ሎኦባ ኦናዉ አሞትያ ባ ጌሻ አስ ከሳናዉ ኑ ግሾ ባና አድ እሚስ። 15 ኔኒ ሀይሳ ታማርሳ፤ ኩመ ማታን ዞራ፥ ሴራ፤ ኦንካ ነና ካፖ።