ማዝሙረ ማፃፋ 73

1 ቱማ ፆሳይ እስራኤለስ ሎኦ፤ ዎዛና ጌሻታስ እ ኬሀ። 2 ሽን ታ ቶሆይ በታናዉ ጉ አትስ፤ ታ ታንጎይ ሀልፃናዉ ማትስ። 3 ሄስ ሀንዳይ ኢታ አሳትነ ኦቶራንቾት፥ ዱረትሽን ታኒ በአዳ ቃናትዳ ግሾሳ። 4 ኤንታ ዋየይ ጋኮና ግሾ፥ ኤንታ አሳተይ ፓያነ ምኖ። 5 ኤንቲ ሀራ አሳዳ ዋየቶኮና፤ ሀራ አሳዳ መቶን ሾጨቶኮና። 6 ሄሳ ግሾ፥ ኦቶሮይ ኤንታዉ ቆ አሌቆ መላ፤ ቡቀ አፍላዳ ማእዶሶና። 7 ኤንታ ዎዛናይ ኢታባ ፑልቴስ፤ ኤንታ ቆፋይ ኢታ ሀልቾን ኩምስ። 8 ኤንቲ ቀልቅሶሶና፤ ኢታባ ሃሳዮሶና፤ ባንታ ኦቶሩዋን ሀራታ ኡንኤሶና። 9 ባንታ ዶና ፆሳ ቦላ ዶዮሶና፤ ባንታ እንፃርሳ አሳ ቦላ አዱሶሶና። 10 ሀር አቶሽን፥ ፆሳ አሳይ ኤንታኮ ስማና፤ ኤንቲ ኦድያባ ኤሶን አማናና። 11 ኤንቲ፥ “ፆሲ አይኮ ኤሪ? ኡባፈ ቃ ፆሳስ ኤራተ ደኢ?” ያጎሶና። 12 ህዛ ኢታት ሀይሳ መላ፤ ኡባ ዎደ እንጀትን ደኦሶና፤ ኤንቲ ጉጅ ጉጅ ዱረቶሶና። 13 ህዛ ታኒ ታ ዎዛና ጌሻተን ናግዳይ፥ ፅሎተ በሳናዉ ታ ኩሽያ ሜጨትዳይ መላ። 14 ጋላሳ ኩመ ታኒ መቶን ሾጨታስ፤ ዎንታ ዎንታ ሴረታስ። 15 ታኒ ኢታ አሳታዳ ኦደትዳኮ፥ ነ አሳስ አማነቶና አታናሽን። 16 ታኒ ሀ ኡባ ኤራናዉ ቆፕያ ዎደ፥ ታዉ ዴፆ ግድስ። 17 ሄስካ ታኒ ፆሳ ኬ ገላና ጋካናዉነ ኢታ አሳታ ዉርሰ ቃዳ አኬካና ጋካናሳ። 18 ቱማ ኔኒ ኤንታ ሀልፅያ በሳን ኡትሳዳሳ፤ ኤንቲ ኩንድድ ያና መላ ኦሳ። 19 ኤንቲ ኤለስድ ይዶሶና፤ ዳጋማን እሶይ አቶና ዉርዶሶና። 20 አሙሆይ ባርክያ ዎደ ባለተይሳዳ፥ አቤት ጎዳዉ፥ ኔኒ ደንድያ ዎደ፥ ኤንቲ ዶገታና። 21 ታኒ ይሎትዳ ዎደነ ታ ዎዛናን ጫመትዳ ዎደ፥ 22 አኬኮና ኤያ አስ ግዳስ፤ ነ ስንን መሄ ግዳስ። 23 ሽን ታኒ ኡባ ዎደ ኔራ ደአይስ፤ ታ ኡሻቻ ኩሽያ ኔኒ ኦይካዳሳ። 24 ነ ዞርያን ታና ካለሳ፤ ዉርሰን ታና ቦንቾን ኤካሳ። 25 ታዉ ሳሎን ኔፐ አትሽን፥ ሀር ኦን ደኢ? ታኒ ኔፐ አትሽን፥ ሳአን ሀራ አሞትከ። 26 ታ ዎልቃይነ ታ ዎዛናይ ዳቡራናዉ ዳንዳኤስ፤ ሽን ፆሳይ ታ ዎዛና ምኖተነ መርናዉ ታና ጋክዳ ሳማ። 27 ኔፐ ሃከይሳት ያና፤ ነና ካደይሳታ ኡባ ነ ዉርሳና። 28 ሽን ታዉ ፆሳኮ ሺቆይ ሎኦ፤ እያ ኦሶ ኡባ ታኒ ኦዳና መላ፥ ኡባ ሃርያ ጎዳ ቆሰትድ አትያ በሰ ኦስ።