ማዝሙረ ማፃፋ 69

1 ሃ ታዉ ቆ ጋክዳ ግሾ፥ አቤት ፆሳዉ፥ ታና አሻ። 2 ኤቅያ በሲ ባይና ጪሞን ምተታስ፤ ጪሞ ሃ ግዶ ገላስ፤ ሃ ዙለይ ታ ቦላራ አስ። 3 ማዶ ደማናዉ ዋሳሸ ዳቡራስ፤ ታ ኮቶኖይ መልስ። ታ ፆሳ ፄልሽን፥ ታ አይፈይ ተልጁምስ። 4 ታና ጮ እፀይሳት ታ ሁጰ ብናናፐ ዳሮ፤ ዎርዶን ታና ሞርከይሳትነ ይሳናዉ ኮየይሳት ዳሮ፤ ታ ካይሶቶናባ ዛራ ግዶሶና። 5 አቤት ፆሳዉ፥ ታ ኤያተ ነ ኤራሳ፤ ታ ባላይ ኔፐ ጌምቤና። 6 አቤት ኡባፈ ዎልቃማ ጎዳዉ፥ ነና ኡፋይሳን ናገይሳት ታ ጋሶን ዬላቶፖ። አቤት እስራኤለ ፆሳዉ፥ ነና ምንድ ኮየይሳት ታ ጋሶን ካዉዮፎ። 7 ታ ነ ግሾ ጫሸ ዳንዳአስ፤ ታ ሶምኦይ ዬላ ማእዳይ ነ ግሾሳ። 8 ታኒ ታ እሻታስ እማ፥ ታ አየ ናይታስ አላጋ ግዳስ። 9 ታኒ ነ ኬስ ምሸትያ ምሻይ ታና ታማዳ ፁጌስ፤ ነና ጫይያ ጫሻይ ታ ቦላ ዎስ። 10 ታኒ ፆማን ታና ካዉሽዳ ዎደ፥ ታና ጫይዶሶና። 11 ታኒ ካዮ ማኦ ማእዳ ዎደ፥ ኤንታዉ ካሳስ አታስ። 12 ካታማ ፐንገን ኡተይሳታስ ዝግርሳስ አታስ፤ ማተይሳት ታባ የ ከስዶሶና። 13 ሽን ጎዳዉ፥ ታ ነና ዎሳይስ፤ አቤት ፆሳዉ፥ ነ ዶስያ ዎደ፥ ነ መርና ሲቁዋን፥ ነ አቶተን ታዉ ዛሮ እማ። 14 ስልሞን ምተቶናዳ ታና አሻ፤ ታ ሞርከታፐ ታና አሻ፥ ጪሞ ሃን ምተተፈ ታና አሻ። 15 ድኦ ሃይ ታና ሙኮፎ፤ ጪሞ ሃይ ታና ምቶፎ፤ ዝቃ ኦላይ ባ ዶና ታ ቦላ ጎርዶፎ። 16 አቤት ጎዳዉ፥ ነ መርና ሲቁዋ ሎኦተን፥ ታዉ ዛሮ እማ፤ ነ ግታ ማሮታን ታኮ ስማ። 17 ነ አይልያፈ ነ ሶምኡዋ ገንፋ፤ ታኒ ኡንአን ደእያ ግሾ ታዉ ኤለ ዛሮ እማ። 18 ታኮ ሺቃ፤ ታና ዎዛ፤ ታ ሞርከታፐ ታና ላአ ከሳ። 19 ታ ጫሻ፥ ዬላነ ካዉሻተ ነ ኤራሳ፤ ታ ሞርከታ ኡባ ነ በኣሳ። 20 ጫሻይ ታና ሀርጋንቾ ኦስ፤ ታዉ ቃትያ አስ ኮያስ። ሽን እስ አስካ ደማብከ፤ ታና ምንያ አስ ፄላስ፤ ሽን በንትቤና። 21 ታ ካን ጪየ ዋላክዶሶና፤ ታ ሳሙዋስ ጫላ ኡሽ እምዶሶና። 22 ኤንታ ጋይታይ ኤንታዉ ፅሄ ግዶ፤ ኤንታ ያርሾይ ኤንታዉ ፅሄ ግዶ። 23 ፄሎናዳ ኤንታ አይፈይ ጎዘቶ፤ ኤንታ ዞኮይ ኩኖ። 24 ነ ሀንቁዋ ኤንታ ቦላ ትጋ፤ ሱልያ ነ ሸነይ ኤንታ የደ። 25 ኤንታ ካምበይ ካይስ ግዶ፤ ኤንታ ዱንካንያን ደእያ አስ ዮ። 26 ነ ሴርዳይሳታ ኤንቲ የደዶሶና፤ ነ ማዱንፅስዳይሳታ ኤንቲ ዬሶሶና። 27 ኤንቲ ናጋራ ቦላ ናጋራ ጉጃና መላ አጋጋ፤ ነ ማሮተፈ ኤንታ አይብካ ጋኮፎ። 28 ኤንቲ ደኦ ማፃፋፐ ቁሸቶ፤ ፅሎ አሳራ ማዝጋበቶፎ። 29 ታ ዋየንነ ኡንአን ደአይስ፤ አቤት ፆሳዉ፥ ታና አሻዳ፥ ሳሮ በሳን ዎ። 30 ታኒ ፆሳ ሱን ማዝሙረን ጋላታና፤ ጋላታ እሞን እያ ግታያና። 31 ሄስ ቦራ ያርሾፈ፥ ዎይኮ ካጫማ ኮርማ ያርሾፈ፥ አድ፥ ጎዳ ኡፋይሴስ። 32 ናቀትዳይሳት ሄሳ በአና፤ ኡፋይታና፤ ህንተኖ፥ ፆሳ ኮየይሳቶ፥ ህንተ ዎዛናይ ምነቶ። 33 ጎዳይ ማንቆታ ስኤስ፤ ቃሾ ኬን ደእያ ባ አሳ ካና። 34 ሳሎይ፥ ሳእነ አባይ፥ እያ ግዶን ደእያ ዎፅ ቃፅያ ኡባይ ጎዳ ጋላቶ። 35 ፆሳይ ፅዮነ አሻና፤ ይሁዳ ካታማ ዛሪድ ኬፃና፤ አሳይ ያን ዳናነ ቢታይካ ኤንታባ ግዳና። 36 እያ አይለታ ናይት ሄ ቢታ ላታና፤ እያ ሱን ዶሰይሳት ያን ዳና።