ማዝሙረ ማፃፋ 35

1 ጎዳዉ፥ ታራ ባፀተይሳታራ ነ ባፀታ፤ ታና ኦለይሳታ ነ ኦላ። 2 ጎንዳለነ ቶራ ኦይካዳ፥ ታና ማዳናዉ ደንዳ። 3 ታና ጎደይሳታ ቦላ ነ ቶራነ ማሻ ደን፤ ታኮ “ታ ነና አሸይሳ” ያጋ። 4 ታ ሸምፑዋ ዎናዉ ኮየይሳት፥ ዬላቶ፤ ካዉዮ። ታ ቦላ ኢታባ ማቀተይሳት፥ ካዉይድ ጉየ ስሞ። 5 ጎዳ ኪታንቾይ ኤንታ የደያ ዎደ፥ ኤንቲ ጫርኮን ላለትያ ሱላዳ ሀኖ። 6 ጎዳ ኪታንቾይ ኤንታ ጎድያ ዎደ፥ ኤንታ ኦገይ ማነ ሀል ግዶ። 7 ጋሶይ ባይና ታና ኦይካናዉ ፅሄ ዎሶና፤ ታና ኩንድሳናዉ ኦላ ቦኮሶና። 8 ኤሮና ደእሽን ኤንታ ቦላ ዮይ ዮ፤ ኤንቲ ዎዳ ፅሄይ ኤንታ ኦይኮ፤ ኤንቲ ቦክዳ ኦላን ኩንድድ ዮ። 9 ሄ ዎደ ታኒ ጎዳን ኡፋይታና፤ እ አሽዳ ግሾ ሀሹ ጋና። 10 ታ ኩመ አሳተይ ነና፥ “ጎዳዉ፥ ነ መል ኦኔ? ማንቁዋ ዎልቃማ ኩሽያፐ ከሳ ኤካሳ፤ መቶታንቹዋነ ኡንኤትዳይሳ፥ ቦንቀይሳታ ኩሸፐ አሻሳ” ያጋና። 11 ዎርዶ ማርካተይሳት ታ ቦላ ደንዶሶና፤ ታ ኤሮናባን ታና ሞቶሶና። 12 ታ ሎኦ ኦዳ ግሾ ኢታ ዛርዶሶና፤ ታና ብዛ ኦዶሶና። 13 ሽን ኤንቲ ሀርግዳ ዎደ ታኒ ካዮ ማኦ ማአስ፤ ታ አሳተ ፆማን ዳቡርሳስ፤ ታ ዎሳይ ዛሮ ደሞና አትስ። 14 ታና ካዉሻዳ ዳቦስ ዎይኮ እሻስ ዬከይሳዳ ዬካስ። እስ አስ ባ አየስ ካዮተይሳዳ ታ ሁጵያ ኦይካዳ ዬካስ። 15 ሽን ታኒ በትዳ ዎደ ኡፋይትድ ሺቅዶሶና፤ ጋሶይ ባይና ታና ዋድ፥ አጎና እፅዶሶና። 16 ኢታ አሳት ኦይሳዳ ኤንቲ ታና ቀልቅስዶሶና፤ ይሎትድ ባንታ አቻ ጋርጭዶሶና። 17 ጎዳዉ፥ ኔኒ አዉደ ጋካናዉ፥ ስእ ጋዳ ፄላይ? ኤንታ ኢታ ኦሱዋፐ ታና አሻ፤ ታ አልኦ ሸምፑዋ ሀ ጋሞታፐ ዎስሳ ኤካ። 18 ሄ ዎደ ግታ ሺቆን ታ ነና ጋላታና፤ ዳሮ አሳይ ደእያ በሳን ነና ቦንቻና። 19 ጋሶይ ባይና ታና ሞርከይሳት ኡፋይቶፎ፤ ታና ጮ እፀይሳት ታ ቦላ ቃምኦቶፖ። 20 ኤንቲ ሳሮባ ሃሳዮኮና፤ ስእ ግድ ደእያ አሳ ቦላ ኦዳ ፃፆሶና። 21 ኤንቲ ባንታ ዶና ታ ቦላ ዶይድ፥ “ሀይሳ በአ፥ ነ ኦዳይሳ ኑኒ ኑ አይፈን በእዳ” ያጎሶና። 22 ጎዳዉ፥ ኔኒ ሄሳ በአዳሳ፤ ስእ ጎፓ። ጎዳዉ፥ ታፐ ሃኮፋ። 23 ታ ፆሳዉ፥ ታ ጎዳዉ ታ ግሾ፥ ደንዳ፤ ባርካ፤ ታ ዶና ግዳዳ ሞተታ። 24 ታ ጎዳዉ፥ ታ ፆሳዉ፥ ፅሎተን ታዉ ፕርዳ፤ ታ ሞርከታ ኡፋይሶፋ። 25 ኤንቲ ባንታ ዎዛናን፥ “ሀሹ፥ ኑ አሞይ ፖለትስ፤ ኑኒ እያ ምትዳ” ጋና መላ ኦፋ። 26 ታ ዋያን ኡፋይተይሳት፥ ዬላቶ፥ ካዉዮ፤ ታ ቦላ ጬቀተይሳት ዬላነ ካዉሸ ማኦ። 27 ታ ፆኑዋ ዶሰይሳት ኡፋይቶ፤ እልሎ፤ ሀሹ ያጎ። “ኡባ ዎደ ባ አይልያ ሳሮተን፥ ኡፋይትያ ጎዳይ ቁ ቁ ጎ” ያጎ። 28 ታ እንፃርሳይ ነ ፅሎተነ ነ ጋላታ፥ ጋላሳ ኩመን ኦዴስ።