ናህመ ማፃፋ 10

1 ማታመ ዎዳ አሳ ሱንይ፥ ቢታ አይስያ ናህመይ፥ ሀካልያ ናአይ፥ ካህነታፐ፥ ሰደቅያሳ፥ 2 ሳራያ፥ አዛራ፥ ኤርምያሳ፥ 3 ፓስኮራ፥ አማረ፥ ማልካ፥ 4 ሀፁሳ፥ ሳባና፥ ማሉካ፥ 5 ሀርማ፥ ማረሞታ፥ ኦባዳ፥ 6 ዳነላ፥ ግነቶና፥ ባሮካ፥ 7 ማሱላማ፥ አብያ፥ ምያምና፥ 8 ማኣዛ፥ በልጋያነ ሻማያ። 9 ሌወታፐ፥ አዝናታ ናኣ እያሱ፥ ሄናዳዳ ኮች ግድዳ ብኑያ፥ ቃድምኤላነ 10 ኤንታራ ኦያ ሳባና፥ ሆድያ፥ ቃልፃ፥ ፓላያ፥ ሀናና፥ 11 ምካ፥ ራሆባ፥ ሀሳባያ፥ 12 ዛኩራ፥ ሳራባ፥ ሳባና፥ 13 ሆድያ፥ ባናነ ባንና። 14 ሀላቃታፐ፥ ፓሮሳ፥ ፓሀት-ሞአባ፥ ኤላማ፥ ዛታ፥ ባና፥ 15 ቡና፥ አዝጋዳ፥ በባያ፥ 16 አዶና፥ ብግዋያ፥ አድና፥ 17 አፄራ፥ ህዝቅያሳ፥ አዙራ፥ 18 ሆድያ፥ ሀሱማ፥ በሳያ፥ 19 ሀርፋ፥ አናቶታ፥ ነባያ፥ 20 ማግጳሳ፥ ማሱላማ፥ ኤዝራ፥ 21 ማሰዛቤላ፥ ሳዶቃ፥ ያዱአ፥ 22 ፓላፃ፥ ሀናና፥ አናያ፥ 23 ሆሰ፥ ሀናና፥ ሀሱባ፥ 24 ሀሎሄሳ፥ ፕልሀ፥ ሶበቃ፥ 25 ረሁማ፥ ሀሳብና፥ ማሰያ፥ 26 አክያ፥ ሀናና፥ አናና፥ 27 ማሉካ፥ ሀርማነ ባአና። 28 አትዳ አሳይ፥ ካህነት፥ ሌወት፥ ፐንግያ ናገይሳት፥ ዛማረት፥ ፆሳ ኬ ኦሳንቾት፥ ፆሳ ህግያስ ኪተታናዉ ባንታና አይሁደ ግዶና ደረታፐ ሻክዳ ኡባይ፥ ኤንታ ማቸት፥ አኬካናዉ ዳንዳእያ ኤንታ አደ ናይትነ ማጫ ናይት፥ 29 ባንታና ካለይሳታራ እስፈ ጫቅዶሶና። ኤንቲ ፆሳ አይልያ ሙሰ ባጋራ ፆሳይ እምዳ ኑ ጎዳ፥ ፆሳ ኪታ፥ ህግያነ ዎጋ ናጋናዉ ቃንገንነ ጫቆን ቃላ ገልዶሶና። 30 ኤንቲ ሀይሳዳ ያግድ ጫቅዶሶና፤ “ኑ ማጫ ናይታ አይሁደ ግዶና አደ ናይታስ እሞኮ፤ ኤንታ ማጫ ናይታ ኑ አደ ናይታስ ማቾ ኦድ ኤኮኮ። 31 “አይሁደ ግዶና አሳት ካ ግድን ዎይኮ ሀራባ ሳምባታ ጋላስ ዎይኮ ሀራ ባኣለ ጋላስ ባይዛናዉ ኤህኮ ኤንታፈ ሻሞኮ። ላፑን ላይ ጋክያ ዎደ ዎደ ኑ ቢታ ጎዮኮ፤ ኑኒ ታልእዳ አጩዋ አቾኮ። 32 “ፆሳ ኬ ኦሱዋስ ኦይዱ ግራመ ብራ ላይን ላይን ቃንፆና እማና። 33 ሄስካ፥ ጎዳ ስንን ዎያ ኡይስ፥ ጋላስ ጋላስ ያርሸትያ ካ ያርሹዋስ፥ ፁሳ ያርሹዋስ፥ ሳምባታ ጋላሳን፥ አጌና ፄሮን፥ ላይን ደእያ ሀራ ባለታን፥ ጌሻ ያርሾታስ፥ እስራኤለ አሳ ናጋራ አቶተስ ያርሸትያ ያርሹዋስነ ኑ ፆሳ ኬ ኦሱዋስ ኮሽያ ኡባ ኩንናሳ። 34 “ኑ፥ ካህነት፥ ሌወትነ ሀራ አሳ ኡባይ፥ ላይን ላይን ኦሰትያ ጋላሳን፥ ህግያን ፃፈትዳይሳዳ ጎዳ፥ ኑ ፆሳ ያርሾ በሳን ኤፅያ ም እስ እስ ኮቻይ አዉደ ኤሀናዉ በሲያኮ ኤራናዉ ሳማ የግዳ። 35 “ካ ኑ ሺሽያ ዎደነ ዱማ ዱማ ም አይፍያ ኑ ማፅያ ዎደ ባይራ ፆሳ ኬ ኤሀና። 36 “ህግያን ፃፈትዳይሳዳ ኑኒ ኮይሮ የለትያ ኑ አደ ናይታ፥ ቃስ ኑ ሚዛት፥ ኑ ዶርሳትነ ኑ ዴሻት የልያ ኮይሮ ማራታ ፆሳ ኬን ኦያ ካህነታኮ ኤህድ ፆሳስ ዱማያና። 37 “ኑኒ ኑ ቢታን ካፅዳ ካፈ ኮይሩዋ፥ ኑ ም ኡባ አይፍያ፥ ዎይንያነ ዛይትያ እሞታ ኦድ፥ ፆሳ ኬን ኦያ ካህነታኮ ኤሀና። ሌወት ኑ ደእያ ካታማታ ጎሻን አይፍያባፐ አስራታ ኤክያ ግሾ፥ ኑ ቢታይ አይፍያባፐ አስራታ ኤሀና። 38 ሌወት አስራታ ሺሽያ ዎደ፥ አሮና ያራ ግድዳ ካህነት ኤንታራ እስፈ ግዳናዉ በሴስ። ሌወት አስራታ ሺሽዳፐ ጉየ፥ አስራታፐ አስራታ ከስድ ኑ ፆሳ ኬ ኤህድ፥ ሚሸ ዎያ ክፍልያን ዎ። 39 እስራኤለ አሳይነ ሌወት ካ፥ ዎይንያነ ሻማሆ ዛይተ እሞታ ጌሻ ሚሸት ኡትያ በሳነ ካህነት፥ ፐንግያ ናገይሳትነ ዛማረት ሸምፕያ ክፍልያ ኤሆ። “ኑኒ ፆሳ ኬ ኡባካ አጎኮ” ያግድ ጫቅዶሶና።