ማርቆሳ ዎንገላ 14

1 ፓስካ ባኣለ ቦንችያ ጋላስነ ኡይ ባኣለ ቦንችያ ጋላስ ጋካናዉ ናምኡ ጋላስ አትስ። ካህነ ሀላቃትነ ህገ አስታማረት አስ ኤሮና የሱሳ ኦይክድ ዎያ ኦገ ኮዮሶና። 2 “አሳይ ኦሽ ከሶና መላ ፓስካ ቦንችያ ጋላሳን ሄሳ ኦኮ” ያግዶሶና። 3 የሱሲ ብታነ ካታማን ባሮ ሀርጋንቾ ግድዳ ስሞና ሶን ግብራ ቦላ ኡትዳሽን፥ እስ ማጫስያ አልባስፅሮሳ ሹቻፈ ኦሰትዳ ጵልቃፀ ኩመ ናርዶሰ ጌተትያ ዳሮ አልኦ ሽቶ ኤካዳ ያሱ። ሄ ጵልቃፀ መንዳ ሽቱዋ የሱሳ ሁጰን ትጋሱ። 4 ሄ በሳን ደእያ አሳፐ እሶት እሶት ሀንቀትድ፥ “ሀ ሽቶይ መላ ጮ ኢተይ አይብሴ? 5 ሀ ሽቱዋ ሄ ፄቱ ድናረን ባይዝድ፥ ሚሽያ ማንቆታስ እማናዉ ዳንዳኤቴስ” ያግድ ባንታ ግዶን ኦደትዶሶና። ያትድ፥ ሄ ማጫስዉ ዳሮ ቦርዶሶና። 6 ሽን የሱሲ “ሀ ማጫስዉ አይኮካ ጎፕተ፤ እዮ አይስ ዋይሰቲ? እያ ታዉ ሎኦባ ኦሱ። 7 ማንቆት ኡባ ዎደ ህንተራ ደኦሶና። ህንተ ኮይዳ ዎደ አዉደካ ህንተ ኤንታ ማዳናዉ ዳንዳኤታ፥ ሽን ታኒ ኡባ ዎደ ህንተራ ደእከ። 8 እያ ባ ዳንዳእዳይሳ ኦሱ፤ ቃስ ታና ሞጎስ ጊግሳናዉ ካሰታዳ ሽቶ ትያሱ። 9 ታኒ ህንተዉ ቱማ ኦዳይስ፤ ሳአ ኡባን ዎንገላ ኦድያ በሳ አዉንካ፥ አሳይ እዮ አኬካና መላ ሀ እያ ኦዳይስ ኦደታና” ያግስ። 10 ታማነ ናምኡ ታማረታፐ እሶይ አስቆሮታ ይሁዳ ጌተተይስ የሱሳ ካህነ ሀላቃታስ አድ እማናዉ ኤንታኮ ብስ። 11 ኤንቲ ሄሳ ስእዳ ዎደ ኡፋይትድ፥ “ኑኒ ነዉ ሚሸ እማና” ያግዶሶና፤ ይሁድ የሱሳ አድ እማናዉ እንጀ ዎደ ኮዬስ። 12 ኡይ ምያ ጋላስ ቦንችያ ኮይሮ ጋላስ፥ ፓስካ ካ ማናዉ ማራዘ ሹክያ ዎደ፥ የሱሳ ታማረት እያኮ፥ “ፓስካ ቦንችያ ጋላስ ኔኒ ማና ካ ኑኒ አዉ ብድ ጊግስኖ?” ግድ ኦይችዶሶና። 13 የሱሲ ባ ታማረታፐ ናምአታ ሀይሳዳ ያግድ ኪትስ፦ “ካታማ ቢተ፤ ህንተ ብሽን፥ ኦቶራ ሃ ቶክዳ እስ ኡራይ ህንተራ ጋሄታና፤ እያ ካልተ። 14 እ ብድ ገልያ ኬ ጎዳ፥ ‘አስታማረይ ኔኮ፥ “ታኒ ታ ታማረታራ ፓስካ ማናዉ እማ ክፍለይ አዉኔ?” ያጌስ’ ያግተ። 15 ጎዳይ ህንተና ፖቅያ ቦላ ደእያ ጊግድ ኡትዳ ዳልጋ ክፍለ በሳና፤ ሄሳን ጊግስተ” ያግስ። 16 ሄ ናምኡ ታማረት ከይድ፥ ካታማ ብዶሶና፤ የሱሲ ኤንታዉ ኦድዳይሳዳ ደምድ፥ ፓስካ ካ ጊግስዶሶና። 17 ሳአይ ኦማርስያ ዎደ የሱሲ ታማነ ናምኡ ታማረታራ ያ ብስ። 18 ኤንቲ ኡትድ ካ ምሽን፥ የሱሲ ኤንታኮ፥ “ታኒ ህንተዉ ቱማ ኦዳይስ፤ ህንተፈ እሶይ ታራ መይስ፥ ታና አድ እማና” ያግስ። 19 እያ ታማረት ዳጋምድ፥ ባንታ ሁጰን ሁጰን፥ “ቱማ ታነሻ?” ያግድ እያ ኦይችዶሶና። 20 የሱሲ ዛሪድ፥ “ሄ ኡራይ፥ ህንተ ታማነ ናምአታፐ እሱዋ፤ እ ታራ እስፈ ቱሻናዉ ባ ኡይ ሻተን የደይሳ። 21 አሳ ናአይ፥ ጌሻ ማፃፋይ ሀይቃና ግዳይሳዳ ሀይቃና፥ ሽን አሳ ናአ፥ አድ እምያ ኡራ አየ! ሄ ኡራይ የለቶና አትዳኮ እያዉ ሎኦሽን” ያግስ። 22 ኤንቲ ምሽን፥ የሱሲ ኡይ ኤክድ፥ ፆሳ ጋላትስ፤ ሄ ኡይ መንድ፥ ባ ታማረታስ እምሸ፥ “ሄእተ፥ ሀይስ ታ አሹዋ” ያግስ። 23 ፁአ ኤክድ፥ ፆሳ ጋላትድ፥ ኤንታዉ እምን ኡባይካ ሄ ፁአፐ ኡይዶሶና። 24 የሱሲ፥ “ሀይስ ኦራ ጫቁዋን ዳሮ አሳ ግሾ ጉክያ ታ ሱ። 25 ታኒ ህንተዉ ቱማ ኦዳይስ፤ ታኒ ፆሳ ካዎተን ኦራ ዎይነ ኡያና ጋላስ ጋካናዉ ዛራዳ ሀ ዎይንያፐ ኡይከ” ያግስ። 26 ማዝሙረ የፅዳፐ ጉየ፥ ሻማሆ ዙማ ቦላ ብዶሶና። 27 የሱሲ ኤንታኮ፥ “ህንተ ኡባይ ታና የግ አግድ ባቃታና፤ ጌሻ ማፃፋይ፥ " ‘ፆሳይ ዉደ አዋ ሾጫና፥ ዶርሳት ኡባይ ላለታና’ ያጌስ። 28 ሽን ታኒ ሀይቆፐ ደንድዳፐ ጉየ፥ ህንተፈ ስንታዳ ጋልላ ባና” ያግስ። 29 ጰፅሮስ ዛሪድ፥ “ኤንቲ ኡባይ ነና የግ አግድ ባቃትኮካ፥ ታ ነና አግከ” ያግስ። 30 የሱሲ ጰፅሮሳኮ፥ “ታኒ ነዉ ቱማ ኦዳይስ፤ ሀች ቃማ ኩቶይ ናምኡ ቶሆ ዋሳናፐ ስን ኔኒ ታና ሄ ቶሆ ካዳና” ያግስ። 31 ሽን ጰፅሮስ ካሰይሳፈ ምንድ፥ “ታኒ ሀር አቶሽን፥ ኔራ እስፈ ሀይቅያኮካ፥ ነና ካድከ” ያግስ። ቃስ ሀራት ኡባትካ ሄሳዳ ግዶሶና። 32 ጌታሰማነ ጌተትያ በሳ ብዶሶና፤ የሱሲ ባ ታማረታኮ፥ “ታኒ ፆሳ ዎሳዳ ስማና ጋካናዉ ህንተ ሀይሳን ኡትሽተ” ያግስ። 33 የሱሲ ጰፅሮሳ፥ ያይቆባነ ዮሃንሳ ባራ ኤክድ ብስ፤ ዳሮ ዋየትስነ ኡንኤትስ። 34 ቃስ ኤንታኮ፥ “ታኒ ሀይቃና ጋካናዉ አዛናስ፥ ሀይሳን ጋምእሽተ፤ ስኮፍተ” ያግስ። 35 ጉ ስን ሺቅድ፥ ሳአን ጉፋንድ፥ ዳንዳኤትያባ ግድኮ፥ ሄ ዋይያ ሳተይ ባፐ አና መላ፥ ፆሳ ዎስስ። 36 ቃስ፥ “አባ፥ ታ አዋዉ፥ ኡባባይ ነዉ ዳንዳኤቴስ፥ ሀ ዋየ ፁኣ ታፐ ድጋ። ሽን ነ ሸነይ ሀኖፐ አትሽን፥ ታ ሸነይ ሀኖፖ” ያግስ። 37 የሱሲ ባ ታማረታኮ ስም ይድ፥ ኤንቲ ስክዳሽን ደምድ፥ ጰፅሮሳኮ፥ “ስሞና፥ ስካዲ? ኔኒ እስ ሳተካ ባርካዳ ናጋናዉ ዳንዳአብኪ? 38 ፓጨን ህንተ ገሎና መላ ባርክድ ናግተነ ፆሳ ዎስተ። ህንተዉ ሎኦ አሞይ ደኤስ፥ ሽን ህንተ ዳቡራንቾ አስ” ያግስ። 39 ቃስካ ብድ ካሰይሳዳ ፆሳ ዎስስ። 40 ባ ታማረታኮ ጉየ ስሚድ ያ ዎደ፥ ስክዳሽን ደምስ። ኤንታ አይፍያ ስኮይ ጎዝ ዎዳ ግሾ፥ እያኮ አይ ኦደትያኮካ ኤሮኮና። 41 ሄን ኤንታኮ ይድ፥ “ሀእ ጋካናዉካ ስከትነ ሸምፐቲ? ህዛ፥ ግዳና፤ ሳተይ ጋክስ፤ በእተ! አሳ ናአይ፥ ናጋራንቾ አሳስ አድ እመታና ዎደይ ጋክስ። 42 ደንድድ የተ፤ በእተ፥ ታና አድ እማናይስ ጋክስ” ያግስ። 43 የሱሲ ሄሳ ቡሮ ኦድሽን፥ ታማነ ናምኡ እያ ታማረታፐ እሶይ፥ ይሁድ፥ ኤለስድ ጋክ ዎስ። ቃስ ካህነ ሀላቃት፥ ህገ አስታማረትነ ጭማት ኪትን፥ ማሻነ ፃምአ ኦይክዳ ዳሮ አሳይ እያራ እስፈ ይዶሶና። 44 የሱሳ አድ እማናይስ ሄ ዳሮ አሳስ፥ “ታኒ ዬርያ ኡራይ እያ፤ እያ ኦይክድ፥ ሎይ ናግድ ኤፍተ” ያግድ ማላ ኦድ ዎስ። 45 ይሁድ ጋክ ዎዳ መላ የሱሳኮ ሺቅድ፥ “አስታማርያዉ” ያግድ የሱሳ ዬር ኤክስ። 46 ሄ ዳሮ አሳይ የሱሳ ኦይክዶሶና። 47 ሽን ማታን ኤቅዳይሳታፐ እሶይ ባ ማሻ ሾድድ ካህነ ሀላቃ አይልያ ሾጭድ፥ እያ ሀይ ቃንፅድ ሆልስ። 48 የሱሲ ዛሪድ፥ ሄ ሺቅዳ ዳሮ አሳኮ፥ “ታና ፓንጋ ከስድ፥ ፓንጋ ኦይከይሳዳ ኦይካናዉ ማሸነ ፃምአ ኦይክድ ይደቲ? 49 ታኒ ፆሳ ኬን ታማርሳሸ፥ ጋላስ ጋላስ ህንተራ ደእያ ዎደ ታና ኦይክቤከታ፥ ሽን ጌሻ ማፃፋይ ግዳይስ ፖለታናዉ በሴስ” ያግስ። 50 እያ ታማረት ኡባይ እያ የግ አግድ ባቃትዶሶና። 51 ላፃና ፃላላ ማእዳ እስ ናአተ ኡራይ የሱሳ ካለይሳ አሳይ ኦይክስ። 52 ሽን ሄ ኡራይ ላፃና የግ አግድ፥ ፅረ ካሎ ባቃትስ። 53 አሳይ የሱሳ ካህነ ሀላቃ ሶ ኤፍዶሶና። ያን ካህነ ሀላቃት፥ ጭማትነ ህገ አስታማረት ሺቅድ ደኦሶና። 54 ጰፅሮስ ካህነ ሀላቃ ዛባ ጋካናዉ ሃሆን እያ ካል ብድ ያን ናገይሳታራ ኡትድ ታማ ካዬስ። 55 ካህነ ሀላቃትነ ሺቅዳ አሳ ኡባይ የሱሳ ዎናዉ እያ ቦላ ማርካ ኮይዶሶና፥ ሽን አይኮካ ደምቦኮና። 56 ዳሮ አሳት እያ ቦላ ዎርዶ ማርካትዶሶና፥ ሽን ኤንታ ማርካተይ እስኖ ግድቤና። 57 እስ እስ አሳት ደንድ ኤቅድ የሱሳ ቦላ፥ “እ፥ ‘ታኒ አስ ኬፅዳ ሀ ፆሳ ኬ ላላዳ፥ አሳ ኩሸን ኬፀትቦና ሀራ ፆሳ ኬ ሄ ጋላሳ ግዶን ኬፃና’ ግሽን ኑኒ ስእዳ” ያግድ ዎርዶ ማርካትዶሶና። 59 ግዶሽን፥ ኤንታ ማርካተይ ሄሳንካ እስኖ ግድቤና። 60 ካህነ ሀላቃይ አሳ ኡባ ስንን ደንድ ኤቅድ፥ “ሀይሳቲ ነና ሞትያ ሞቱዋስ ነ ዛርያባይ ባዌ?” ያግድ የሱሳ ኦይችስ። 61 ሽን የሱሲ ስእ ግስ፤ አይኮካ ዛርቤና። ካህነ ሀላቃይ፥ “አንጀትዳ ፆሳ ናአይ፥ ክርስቶስ ነነዬ?” ያግድ ዛር ኦይችስ። 62 የሱሲ ዛሪድ፥ “ኤ ታና፥ ህንተ አሳ ናአይ፥ ዎልቃማ ፆሳፈ ኡሻቻ ባጋራ ኡትዳሽን ቃስ ሳሉዋ ሻራራ ይሽን በአና” ያግስ። 63 ካህነ ሀላቃይ ባ ማኡዋ ፔድ፥ “ኑና ሀራ ማርካ አይ ኮሺ? 64 ህንተ እያ ጫሻ ስእደታ፤ ህንተ ቆፋይ አይቤ?” ያግስ። ኤንቲ ኡባይ፥ “እ ሀይቃናዉ በሴስ” ያግድ እያ ቦላ ፕርድዶሶና። 65 ኤንታፈ እሶት እሶት እያ ቦላ ጩተ ኦይክዶሶና። እያ አይፍያ ጎዝድ ባቅሸ፥ “ነና ደችዳይ ኦኔ? አነ ኑስ ኦዳ!” ያግዶሶና። ናገይሳት እያ ኤክ ኤፍድ ጋራፍዶሶና። 66 ጰፅሮስ ካህነ ሀላቃ ዛባን ጋርሳ ባጋራ ደእሽን፥ ካህነ ሀላቃ ጋንዶታፐ እስንያ ያ ያሱ። 67 ጰፅሮስ ታማ ካየይሳ ደማዳ፥ ትሽ ኦ ፄላዳ፥ “ነካ ናዝረተ የሱሳራ ደኣሳ” ያጋሱ። 68 ሽን ጰፅሮስ፥ “ነ ገይስ አይበኮ ታ ኤርከ፥ ታዉ አኬከተና” ያግድ ካድስ። ያግ ስሚድ፥ ዛጎ ከይያ ዎደ ኢራካ ኩቶይ ዋስስ። 69 ሄ ጋንድያ ጰፅሮሳ በአዳ፥ እያ ማታን ኤቅዳ አሳታኮ፥ “ሀ ኡራይካ ኤንታራ ደኤስ” ጋዳ ዛራ ኦዳሱ። 70 ሽን ጰፅሮስ ቃስካ ካድስ። ጉ ጋምእሽን፥ ማታን ኤቅዳ አሳት ናምአን ጰፅሮሳኮ፥ “ኔኒ ጋልላ ቢታ አስ ግድያ ግሾ ቱማ ኤንታራ ደኣሳ” ያግዶሶና። 71 ሽን ጰፅሮስ፥ “ታኒ ህንተ ግያ ኡራ ኤርከ!” ያግድ ባና ባደነ ጫቆ ኦይክስ። 72 ኤለስድ ኩቶይ ናምአን ዋስ አግስ። ጰፅሮስ፥ የሱሲ እያኮ፥ “ኔኒ ኩቶይ ናምኡ ቶሆ ዋሳናፐ ስን ሄ ቶሆ ታና ካዳና” ግዳይሳ አኬክድ ዳሮ ዬክስ።