ማቶሳ ዎንገላ 4

1 ሄሳፈ ጉየ፥ ፃላሄይ የሱሳ ፓጫና መላ ጌሻ አያናይ የሱሳ መላ ቢታ ኤፍስ። 2 ኦይታሙ ቃማነ ኦይታሙ ጋላስ ፆምዳፐ ጉየ ኮሻትስ። 3 ፃላሄይ የሱሳኮ ይድ “ኔኒ ፆሳ ናአ ግድኮ፥ አነ ሀ ሹቻት ኡይ ግዳና መላ ኪታ” ያግስ። 4 የሱሲ ዛሪድ፥ " ‘አስ ፆሳ ዶናፐ ከይያ ቃላ ኡባን ደኤስፐ አትሽን፥ ኡይ ፃላላን ዴና’ ጌተትድ ፆሳ ቃላን ፃፈትስ" ያግስ። 5 ካልድካ፥ ፃላሄይ የሱሳ ጌሻ ካታማ ኤፍድ፥ ፆሳ ኬ ሁጵያ ከስድ፥ 6 “ኔኒ ፆሳ ናአ ግድኮ፥ አነ ዱገ ሳአን ኩንዳ። " ‘ነ ቶሆይ ሹቻን በቶና መላ፥ ባንታ ኩሽያን ነና ደንና መላ፥ ፆሳይ ባ ኪታንቾታ ነ ግሾ ኪታና’ ጌተትድ ፆሳ ቃላን ፃፈትስ” ያግስ። 7 የሱሲ እያኮ፥ “ቃስካ፥ ‘ፆሳ ቃላን ነ ጎዳ፥ ነ ፆሳ ፓጮፋ’ ያገትድ ፃፈትስ” ግድ ዛርስ። 8 ዉርሰን ፃላሄይ የሱሳ እስ ዎልቃማ ዙማ ሁጰ ከስድ አላምያ ካዎተታ ኤንታ ቦንቹዋራ እስፈ በስድ፥ 9 “ነ ታዉ ኩንዳዳ ጎይንኮ ታ ነዉ ሀ ኡባ እማና” ያግስ። 10 የሱሲ ዛሪድ፥ “ሀ ፃላህያዉ፥ ታፐ ሃካ! ‘ነ ጎዳ፥ ነ ፆሳ ጎይና፥ እያ ፃላላ ሀጋዛ’ ጌተትድ ፆሳ ቃላን ፃፈትስ” ያግስ። 11 ሄሳፈ ጉየ፥ ፃላሄይ አግድ ብስ፤ ኪታንቾት ይድ እያ ሀጋዝዶሶና። 12 የሱሲ፥ ዮሃንስ ቃሸቶይሳ ስእዳ ዎደ ጋልላ ቢታ ብስ። 13 ናዝረተ ካታማ አግድ ዛብሎናንነ ንፍታለመ ሄራን፥ አባ ማታን ደእያ ቅፍርናሆማ ካታማ ብድ ያን ደእስ። 14 ሄስ ሀንዳይ ናብያ እሳያሳ ዶናን፥ 15 “ዛብሎና ቢታን፥ ንፍታለመ ቢታን፥ ዮርዳኖሰ ሻፋፐ ሄፍንን፥ አባ ኦግያ ጋፃን ደእያ፥ አይሁደ ግዶና ደረይ ደእያ ጋልላን፥ 16 ማን ደእያ ደረይ፥ ዎልቃማ ፖኦ በእስ። ሀይቆ ኩያ ቢታን፥ ደኤይሳታስ ፖኦይ ከይስ” ያግድ ኦደትዳ ቃላይ ፖለታና መላሳ። 17 ሄ ዎደፐ ዶምድ የሱሲ፥ “ፆሳ ካዎተይ ማታትዳ ግሾ ህንተ ናጋራፐ ስምተ” ያግድ ቃላ ሳባኬስ። 18 የሱሲ ጋልላ አባ ማታራ አሸ ናምኡ እሻታ፥ ጰፅሮሳ ጌተትያ ስሞናነ እያ እሻ እንድርያሳ በእስ። ኤንቲ ሞሎ ኦይከይሳታ ግድዳ ግሾ ባንታ ግትያ አባን የጎሶና። 19 የሱሲ ኤንታና፥ “ሃ ዪተ፤ ታና ካልተ፤ ታኒ ህንተና አሰ ኦይ ታማርሳና” ያግስ። 20 ኤንትካ፥ ኤለስድ ባንታ ግትያ የግ አግድ የሱሳ ካልዶሶና። 21 የሱሲ ያፐ ቡሮ ገደ ስን አሸ ሀራ ናምኡ እሻታ፥ ዛብድዮሳ ናይታ፥ ያይቆባነ ዮሃንሳ በእስ። ባንታ አዋ ዛብድዮሳራ እስፈ ዎጎሉዋ ግዶን ባንታ ግትያ ጊግሰይሳታ ፄግስ። 22 ኤንትካ፥ ኤለስድ ባንታ ዎጎሉዋነ ባንታ አዋ አግድ የሱሳ ካልዶሶና። 23 የሱሲ አይሁደ ዎሳ ኬታን ታማርስሸ፥ ሳሎ ካዎተ ዎንገላ ኦድሸነ ዱማ ዱማ ሀርግያፈ አሳ ፓሸ ጋልላ ቢታ ኡባን ዩይስ። 24 ሄሳፈ ደንዶይሳን እያ ሱንይ ሶረ ቢታ ኡባን ከይስ። ዱማ ዱማ ሀርገን ኦይከትዳይሳታነ ዋየተይሳታ፥ ቱና አያናን ኦይከትዳይሳታ፥ ሾጭ የግያ ሀርገን ኦይከትዳይሳታነ፥ ጉንዳታ እያኮ ኤህዶሶና፤ እካ ኤንታና ፓስ። 25 አሳይ ጋልላፐ፥ ታሙ ካታማታፐ፥ የሩሳላመፐ፥ ይሁዳፐነ ዮርዳኖሰ ሻፋ ሄፍንን ደእያ ቢታፈ ይዳ ዳሮ አሳይ እያ ካልዶሶና።