ማቶሳ ዎንገላ 26

1 የሱሲ ሀ ትምርትያ ኡባ ዉርስዳ ዎደ ባ ታማረታኮ፥ 2 “ናምኡ ጋላሳፐ ጉየ፥ ፓስካ ባኣለ ቦንችያ ጋላስ ግደይሳ ኤሬታ። ሄ ጋላስ አሳ ናእ ማስቃለ ቦላ ካቀታናዉ አሳ ኩሸን አድ እመታና” ያግስ። 3 ሄ ዎደ ካህነ ሀላቃትነ ጭማት፥ ቃያፋ ጌተትያ ካህነ ሀላቃ ኬን ሺቅድ፥ 4 አስ ኤሮና የሱሳ ኦይክድ፥ ዎናዉ ማቀትዶሶና። 5 ሽን ኤንቲ፥ “አሳይ ኦሽ ከሶና መላ ግድ፥ ፓስካ ቦንችያ ጋላስ ሄሳ ኦኮ” ያግዶሶና። 6 የሱሲ ብታነ ካታማን ባሮ ሀርግዳ ስሞና ሶን ደኤስ። 7 የሱሲ እማቱዋ ቦላ ደእሽን እስ ማጫስያ አልባስፅሮሳ ብልቃፀ ኩመ ዳሮ አልኦ ሽቶ ኤካ ያዳ የሱሳ ሁጰን ትጋሱ። 8 ሽን የሱሳ ታማረት ሄሳ በእድ ሀንቀትድ፥ “ሀ ሽቶይ ጮ ኢተይ አይብሴ? 9 ሀ ሽቶይ አልኦ ጋተን ባይዘትድ፥ ሚሸይ ማንቆታስ እመታናዉ ዳንዳኤቴስ” ያግዶሶና። 10 የሱሲ ኤንቲ ገይሳ ኤርድ፥ ኤንታኮ፥ “ሀ ማጫስዉ አይስ ዋይሰቲ? እያ ታዉ ሎኦባ ኦሱ። 11 ማንቆት ኡባ ዎደ ህንተራ ዳና። ሽን ታኒ ህንተራ ኡባ ዎደ ደእከ። 12 እያ ሀ ሽቱዋ ታ ቦላ ትግዳይስ ታና ሞጋናዉ ጊግሳናሳ። 13 ታኒ ህንተዉ ቱማ ኦዳይስ፤ ቢታ ኡባን ሀ ዎንገላይ ሳባከትያ በሳን አዉንካ፥ አሳይ እዮ ሀሳያና መላ እያ ኦዳይስ ኦደታና” ያግስ። 14 ሄ ዎደ ታማነ ናምኡ የሱሳ ታማረታፐ እሶይ፥ አስቆሮታ ይሁዳ ጌተተይስ ካህነ ሀላቃታኮ፥ 15 ብድ፥ “ታኒ ህንተዉ የሱሳ አ እምኮ፥ ህንተ ታዉ አይ እማኔ?” ያግድ ኤንታ ኦይችስ። ኤንቲ ዞረትድ ሀስታሙ ብራ ሳንትመ እምዶሶና። 16 ሄሳፈ ጉየ፥ ይሁድ የሱሳ አድ እማናዉ እንጀትያ ዎደ ዎቼስ። 17 ኡይ ባኣለ ቦንችያ ኮይሮ ጋላስ፥ የሱሳ ታማረት እያኮ ይድ፥ “ፓስካ ቦንችያ ጋላስ ኔኒ ማና ካ ኑኒ አዉን ጊግስኖ?” ያግዶሶና። 18 የሱሲ ኤንታኮ፥ “ካታማን ደእያ አድያኮ ብድ፥ ‘አስታማረይ፥ ታዉ ዎደይ ጋክዳ ግሾ፥ ታ ታማረታራ ፓስካ ቦንችያ ጋላሳ ነ ሶን አና ያጌስ’ ያግተ” ያግስ። 19 እያ ታማረት የሱሲ ባንታና ኪትዳይሳዳ ኦድ፥ ፓስካ ባኣለ ጋላስ ማና ካ ጊግስዶሶና። 20 ሳአይ ኦማርስያ ዎደ፥ የሱሲ ታማነ ናምኡ ሀዋረታራ ካ ማናዉ ኡትስ። 21 ኤንቲ ምሽን፥ የሱሲ ኤንታኮ፥ “ታኒ ህንተዉ ቱማ ኦዳይስ፤ ህንተፈ እስ ኡራይ ታና አድ እማና” ያግስ። 22 ኤንቲ ዳሮ ዳጋምድ፥ እሶይ እሶይ፥ “ጎዳዉ፥ ቱማ ታነሻ?” ግድ እያ ኦይችዶሶና። 23 የሱሲ ዛሪድ፥ “ባ ኩሽያ ታራ እስፈ ሻትያን የደይስ እ ታና አድ እማና። 24 አሳ ናአይ፥ ፆሳ ቃላን እያዉ ፃፈትዳይሳዳ ሀይቃና። ሽን አሳ ናኣ አድ እምያ ኡራ አየ! ሄ ኡራይ የለቶና አትዳኮ እያዉ ሎኦሽን” ያግስ። 25 እያ አድ እማናዉ ደእያ ይሁድ ዛሪድ፥ “አስታማርያዉ፥ ኔኒ ገይ ታነዬ?” ያግስ። የሱሲ ዛሪድ፥ “ኔኒ ነ ሁጰን ጋዳሳ” ያግስ። 26 ኤንቲ ምሽን፥ የሱሲ ኡይ ኤክድ ፆሳ ጋላትስ። ሄ ኡይ መንድ ባ ታማረታስ እምድ፥ “ሄእተ፥ ሚተ፥ ሀይስ ታ አሹዋ” ያግስ። 27 ፁኣ ኤክድ፥ ፆሳ ጋላትስ። ኤንታዉ እምድ፥ “ኡባይ ሀይሳፈ ኡይተ። 28 ሀይስ ዳሮ አሳ ናጋራ አቶተስ መላ ጉክያ ታ ሱ። ሀ ሱይ ፆሳይ ህንተራ ገልያ ጫቁዋ ምንይሳ። 29 ሽን ታኒ ህንተዉ ኦዳይስ፤ ታኒ ታ አዋ ካዎተን ኦራ ዎይነ ኡሻ ህንተራ ኡያና ጋላሳ ጋካናዉ ናምአን ሀ ዎይነ ኡሻ ኡይከ” ያግስ። 30 ጋላታ ማዝሙረ የፅዳፐ ጉየ፥ ሻማሆ ዙማ ብዶሶና። 31 ሄ ዎደ የሱሲ ኤንታኮ፥ " ‘ፆሳይ ሄንንቹዋ ሾጫና ዶርሳትካ ላለታና’ ጌተትድ ፆሳ ቃላን ፃፈትዳይሳ መላ ሀች ቃማ ህንተ ኡባይ ታና አግድ ባቃታና። 32 ሽን ታኒ ሀይቆፐ ደንድዳፐ ጉየ ህንተፈ ስንታዳ ጋልላ ባና" ያግስ። 33 ጰፅሮስ ዛሪድ፥ “ኤንቲ ኡባይ ነና አግድ ባቃትኮካ፥ ታኒ ነና አግከ” ያግስ። 34 የሱሲ ጰፅሮሳኮ፥ “ታኒ ነዉ ቱማ ኦዳይስ፤ ሀች ቃማ ኩቶይ ዋሳናፐ ስን ኔኒ ታና ሄ ቶሆ ካዳና” ያግስ። 35 ጰፅሮስ ዛሪድ፥ “ታኒ ኔራ እስፈ ሀይቆፐ አትሽን፥ ነና ኡባካ ካድከ” ያግስ። ሀንኮ እያ ታማረት ኡባይካ ሄሳዳ ግዶሶና። 36 ያትድ፥ የሱሲ ባ ታማረታራ ጌታሰማነ ጌተትያ በሳ ብድ፥ ኤንታኮ፥ “ታኒ ህን ባዳ ፆሳ ዎሳሻና፥ ህንተ ሀይሳን ኡትተ” ያግስ። 37 ጰፅሮሳነ ዛብድዮሳ ናይታ ናምአታ ባራ ኤክ ብድ ዳሮ አዛኖነ ኡንኤተ ዶምስ። 38 ቃስካ ኤንታኮ፥ “ታኒ ሀይቆስ ጋያ ኡንአ ኡንኤታስ። ሀይሳን ታራ ጋምእተነ ምንድ ናግተ” ያግስ። 39 ጉ ስን ብድ ቢታን ጉፋንድ፥ “ታ አዋዉ፥ ዳንዳኤትያባ ግድኮ ሀ ዋየ ፁኣ ታፐ ድጋ። ሽን ነ ሸነይ ሀኖፐ አትሽን፥ ታ ሸነይ ሀኖፖ” ያግድ ፆሳ ዎስስ። 40 የሱሲ ባ ታማረታኮ ስም ይድ ኤንቲ ስክዳሽን ደምስ። ጰፅሮሳኮ፥ “ህንተ እስ ሳተኮካ ስኮና ታራ ምናናዉ ዳንዳእቤከቲ? 41 ፓጨን ህንተ ገሎና መላ ባርክድ ናግተነ ፆሳ ዎስተ። ህንተዉ ሎኦ አሞይ ደኤስ፥ ሽን ህንተ ዳቡራንቾ አስ” ያግስ። 42 የሱሲ ቃስ ናምአን ብድ፥ “ታ አዋዉ፥ ታኒ ሀ ዋየ ፁአፐ ኡዮና ደእሸ አናዉ ዳንዳኤቶናባ ግድኮ ነ ሸነይ ሀኖ” ያግድ ፆሳ ዎስስ። 43 ቃስካ ስም ያ ዎደ እያ ታማረታ አይፍያ ስኮይ ጎዝን፥ ዝንእዳሽን ደምስ። 44 ቃስካ ኤንታ አግድ፥ ብድ ካሰ ቃላ ዛር ሄን ዎስስ። 45 ሄሳፈ ጉየ፥ ባ ታማረታኮ ይድ፥ “ሀእ ጋካናዉ ስከትነ ሸምፐቲ? ሄኮ፥ አሳ ናእ፥ ናጋራንቾታ ኩሸን አድ እመትያ ሳተይ ጋክስ። 46 ደንድድ የተ፥ ታና አድ እመይስ ሀይስሽ ጋክስ” ያግስ። 47 የሱሲ ቡሮ ሄሳ ሃሳይሽን፥ ታማነ ናምኡ ታማረታፐ እሶይ፥ ይሁድ ጋክ ዎስ። ካህነ ሀላቃትነ ደርያ ጭማት ኪትዳ ዳሮ አሳት ማሸነ ፃምአ ኦይክድ እያራ እስፈ ይዶሶና። 48 የሱሳ አድ እምያ ይሁድ ሄ ዳሮ አሳኮ፥ “ታኒ ዬረይስ ህንተ ኮየይስ እያ፥ እያ ኦይክተ” ያግድ ማላ እም ዎስ። 49 ኢራካ የሱሳኮ ሺቅድ፥ “አስታማርያዉ፥ ሳሮ ደአይ” ያግድ እያ ዬርስ። 50 የሱሲ እያኮ፥ “ታ ላግያዉ፥ ኔኒ ኦናባ ኦ አጋ” ያግስ። ሄሳፈ ጉየ፥ ሺቅድ፥ የሱሳ ኦይክዶሶና። 51 የሱሳራ ደኤይሳታፐ እሶይ ባ ማሻ ሾድድ ካህነ ሀላቃ አይልያ ሾጭድ፥ እያ ሀይ ቃንፅድ የግስ። 52 ሽን የሱሲ፥ “ነ ማሻ ጉየ ሾሁዋን ዛራ። አይስ ጊኮ፥ ማሻ ሾድያ ኡባይ ማሻን ሀይቃና። 53 ታ፥ ታ አዋ ዎስያኮ ዳሮ ሙኩሉን ታይበትያ ኪታንቾታ የዳናዉ ዳንዳኦናባ ነዉ ዳኒ? 54 ያትን፥ ፆሳ ቃላን ሄሳዳ ሀናናዉ በሴስ ጌተትዳይስ ዋንድ ፖለታኔ?” ያግስ። 55 ሄ ሳትያን፥ የሱሲ ሄ ሺቅዳ ዳሮ አሳኮ፥ “ታና ፓንጋ ኦድ ኦይካናዉ ማሻነ ፃምአ ኦይክድ ይደቲ? ታኒ ፆሳ ኬን ጋላስ ጋላስ ታማርሳሸ ህንተራ ደእያ ዎደ ታና ኦይክቤከታ። 56 ሽን ሀይስ ኡባይ ሀንዳይስ ናበት ፆሳ ቃላን ፃፍዳይስ ፖለታና መላሳ” ያግስ። ሄ ዎደ እያ ታማረት ኡባይ እያ አግድ ባቃትዶሶና። 57 የሱሳ ኦይክዳይሳት ካህነ ሀላቃ ቃያፋኮ እያ ኤፍዶሶና። ያን ህገ አስታማረትነ ቢታ ጭማት ሺቅድ ደኦሶና። 58 ሽን ጰፅሮስ ካህነ ሀላቃ ዛባ ጋካናዉ ሃሆን እያ ካልስ። እያ ዉርሰይ ሻከታና ጋካናዉ ዛባ ገልድ ናገይሳታራ ኡትስ። 59 ካህነ ሀላቃትነ ሺቅዳ አሳ ኡባይ የሱሳ ዎናዉ እያ ቦላ ዎርዶ ማርካ ኮይዶሶና። 60 ዳሮት ይድ እያ ቦላ ዎርዶ ማርካ ማርካትዶሶና፥ ሽን አይኮካ ደምቦኮና። ጉየፐ ናምኡ አሳት ይድ፥ 61 “ሀ ኡራይ፥ ‘ታኒ ፆሳ ኬ ላላዳ ሄ ጋላሳን ዛራ ኬፃናዉ ዳንዳአይስ’ ያግስ” ያግዶሶና። 62 ካህነታ ሀላቃይ ደንድ ኤቅድ የሱሳኮ፥ “ሀይሳቲ ነና ሞትያ ሞቱዋስ ኔኒ ዛርያባይ ባዌ?” ያግስ። 63 ሽን የሱሲ ስእ ግስ። ቃስካ ካህነ ሀላቃይ፥ “ታኒ ነና ደኦ ፆሳ ሱንን ኦይካይስ፤ ኔኒ ፆሳ ናኣ ክርስቶሳ ግድኮ ኑስ ኦዳ” ያግስ። 64 የሱሲ ዛሪድ፥ “ኔኒ ነ ሁጰንካ ጋዳሳ። ሽን ታኒ ህንተዉ ኦዳይስ፤ ህዛፐ ጉየ፥ አሳ ናአይ ዎልቃማ ፆሳ ኡሻቻ ባጋን ኡትዳሽን፥ ቃስ ሳሎ ሻራራ ይሽን ህንተ በአና” ያግስ። 65 ሄ ዎደ ካህነ ሀላቃይ ዳሮ ይሎትድ ባ ማኡዋ ፔድ፥ “ሀይሳ በእተ ፆሳ ጫይስ! ኑና ሀራ ማርካ አይ ኮሺ? እ ሀእ ጫይዳይሳ ህንተ ስእደታ። 66 ህንተ ቆፋይ አይቤ?” ያግስ። ኤንትካ፥ “እያዉ ሀይቆ በሴስ” ያግድ ዛርዶሶና። 67 ያትን፥ ኤንቲ እያ ሶምኦን ጩትድ ደችዶሶና። ሀራት እያ ባቅድ፥ 68 “ክርስቶሳ! ነና ደችዳይ ኦኔ? አነ ኑስ ኦዳ” ያግዶሶና። 69 ጰፅሮስ ዛባን ኡትዳሽን፥ እስ አይልያ እያኮ ያዳ፥ “ኔንካ ጋልላ የሱሳራ እስፈ ደኣሳ” ያጋሱ። 70 ሽን እ ኤንታ ኡባ ስንን ሄ አይለኮ፥ “ኔኒ ግያባይ አይበኮ ታኒ ኤርከ” ያግድ ካድስ። 71 ቃስ ብድ ድርሳ ፐንገኮ ጋክሽን ሀራ አይልያ እያ በአዳ፥ ያን ደእያ አሳኮ፥ “ሀ ኡራይ ናዝረተ የሱሳራ ደኤስ” ያጋሱ። 72 ጰፅሮስ ናምአን ጫቅድ፥ “ታኒ ሄ ኡራ ኤርከ!” ያግስ። 73 ጉ ጋምእሽን፥ ያን ኤቅዳ አሳት ጰፅሮሳኮ ይድ፥ “ነካ ቱማ ኤንታራ እስፈ ደኣሳ፤ ኔኒ ነ ኦዳን ኤረታሳ” ያግዶሶና። 74 ሄሳፈ ጉየ፥ ጰፅሮስ፥ “ታኒ ሄ ኡራ ኤርከ!” ያግድ፥ ባና ባደነ ጫቆ ዶምስ። ሄ ዎደ ኢራካ ኩቶይ ዋስ አግስ። 75 የሱሲ እያኮ፥ “ኔኒ ኩቶይ ዋሳናፐ ስን ታና ሄ ቶሆ ካዳና” ግዳይሳ ጰፅሮስ አኬክድ፥ ካረ ከይድ ኢታ ዬሆ ዬክስ።