ሌወታ ማፃፋ 3

1 እስ አስ እስፈተ ያርሾስ ባ መህያፐ ቦረይ ባይና ኡስ ዎይኮ ዎፋኖ ጎዳ ስን ሺሾ። 2 ያርሻናዉ ኤህዳ መህያ ሁጰን ባ ኩሽያ ዎድ ጌሻ ዱንካንያ ፐንገን ሹኮ። ካህነት፥ አሮና ናይት ሱ ኤክድ ያርሾ በሳ ኦይዱ ማዛንያ ቦላ ዉርፆ። 3 እስፈተ ያርሹዋፈ ፁሳ ያርሾ ኦድ ጎዳስ ሺሾ፤ ሄስካ ኡሎ አሹዋ ካምዳ ሞያ፥ 4 ናምኡ ክላሆታ፥ ኤንታ ቦላ ደእያ ሞያነ ትርያ ፄራ ባጋ ኤኮ። 5 አሮና ናይት ሄሳ ፁሳ ያርሹዋራ እስፈ ያርሾ በሳ ቦላ ደእያ ም ቦላ ዎድ ፁጎ። ሄስ ጎዳስ ፁገትያ ሳዎ ቶንኩ ግያ ያርሾ ግዳና። 6 እስፈተ ያርሾስ ሺቀይ ማጫ ዎይኮ አደ ዶርሰ ግድኮ ቦረይ ባይናባ ግዶ። 7 እስ አስ ዶርሳ ኡርገ ያርሽያባ ግድኮ ሄሳ ጎዳ ስንን ሺሾ። 8 ሄ ዶርሳ ኡርግያ ሁጰን ባ ኩሽያ ዎድ ጌሻ ዱንካንያ ፐንገን ሹኮ። አሮና ናይት ሱ ኤክድ ያርሾ በሳ ኦይዱ ማዛንያ ቦላ ዉርፆ። 9 እስፈተ ያርሹዋፈ ጎዳስ ፁሳ ያርሾ ኦድ ያርሾ፤ ሄስካ ሞዋ፥ ጎይናፐ ብድ ዞኮ መቀ ጋካናዉ ደእያ ሞዋ፥ ኡሎ አሹዋ ካምዳ ሞያ፥ 10 ናምኡ ክላሆታ፥ ኤንታ ካምዳ ሞያ ትርያ ፄራ ባጋ ኤኮ። 11 ካህነይ ሄሳ ጎዳስ ፁሳ ያርሾ ኦድ ያርሾ በሳን ፁጎ። 12 እ ያርሸይ ዴሸ ግድኮ እ ሄሳ ጎዳ ስን ሺሾ። 13 እያ ሁጰን ባ ኩሽያ ዎድ ጌሻ ዱንካንያ ስንን ሹኮ። አሮና ናይት ሱ ኤክድ ያርሾ በሳ ዩሹዋ ዉርፆ። 14 እ ሄ ያርሹዋፈ ኤክድ ጎዳስ ፁሳ ያርሾ ኦድ ያርሾ፤ ሄስካ ኡሎ አሹዋ ካምዳ ሞያ ኡባ፥ 15 ናምኡ ክላሆታ፥ ኤንታ ካምዳ ሞያ ትርያ ፄራ ባጋ ኤኮ። 16 ካህነይ ሄሳ ጎዳስ ሳዎ ቶንኩ ግያ ያርሾ ኦድ ያርሾ በሳን ፁጎ። ሞ ኡባይ ጎዳባ። 17 ህንተ ሞነ ሱ ሞፕተ። ሄስ ህንተስነ ያና የለተይ ደእያ በሳ አዉንካ ናግያ ዎጋ ግዶ።