ሌወታ ማፃፋ 18

1 ጎዳይ ሙሰኮ ሀይሳዳ ያግስ፤ 2 “እስራኤለ አሳስ ሀይሳዳ ያጋዳ ኦዳ፤ ታኒ ጎዳ፥ ህንተ ፆሳ። 3 ህንተ ካሰ ደእዳ ግብፀ አሳይ ኦይሳዳ ኦፕተ፤ ዎይኮ ሀእ ታኒ ህንተና ገልስያ ካናነ ቢታ አሳይ ኦይሳዳ ኦፕተ፤ ኤንታ ዎጋ ካሎፍተ። 4 ህንተ ታ ኪታ ኦተ፤ ታ ዎጋ ናግተ፤ ታኒ ጎዳ፥ ህንተ ፆሳ። 5 ታ ኪታነ ታ ዎጋ ናግተ፥ ህንተ ሄሳ ኦኮ ደኦን ዳና። ታኒ ጎዳ። 6 “ህንተፈ ኦንካ ባ ማታ ዳቦራ ፃሎፎ። ታኒ ጎዳ። 7 “ነ አይዉ ፃላዳ ነ አዋ ካዉሾፋ። እያ ነ አይዉ ግድያ ግሾ እዮ ፃሎፋ። 8 “ነ አዋ ማችዉ ፃላዳ ነ አዋ ካዉሾፋ። 9 “ነ ምችዉ ፃሎፋ፤ ሶን የለትዳ ዎይኮ ካረን የለትዳ ነ አዋ ናእዉ ዎይኮ ነ አየ ናእዉ ፃሎፋ። 10 “ነ ናኣ ናእዉ ዎይኮ ነ ናኤ ናእዉ ፃላዳ ነ ነና ካዉሾፋ። 11 “ነ ምቾ ግድያ ግሾ ነ አዋ ማቸ ናእዉ ፃሎፋ። 12 “ነ አዋ ምችዉ ፃሎፋ፤ እያ ነ አዋስ ማታ ዳቦ። 13 “ነ አየ ምችዉ ፃሎፋ፤ እያ ነ አየስ ማታ ዳቦ። 14 “ነ አዋ እሻ ማችዉ ፃሎፋ፤ እያ ነ አዋ እሻ ማችዉ። 15 ነ ናኣ ማችዉ ፃሎፋ፤ እያ ነ ናኣ ማችዉ። 16 “ነ እሻ ማችዉ ፃላዳ ነ እሻ ካዉሾፋ። 17 “አይዉነ እ ናእዉ ፃሎፋ፤ እ ናኤ ናእዉ ዎይኮ እ ናኣ ናእዉ ፃሎፋ። ኤንቲ እዉ ማታ ዳቦ ግድያ ግሾ፥ ሄስ ኢታ ቱና። 18 “ነ ማችያ ፓፃ ደእሽን፥ ነ ማቸ ምችዉ ዳዉፋ። 19 “ኩሸ መቶራ ደእያ ማጫስ ፃሎፋ። 20 “ኔኒ ቱኖና መላ ነ ሾሩዋ ማችዉ ፃሎፋ። 21 “ነ ፆሳ ሱንይ ጫየቶና መላ ነ ናይታፐ እሱዋ ታማን ፁጋዳ፥ ሞሎካ ግያ ኤቃስ ያርሾ ኦዳ እሞፋ። ታኒ ጎዳ። 22 “ፆሳ ስንን እፀትዳባ ግድያ ግሾ ማጫሳራ ጋሄተይሳዳ አደራ ጋሄቶፋ። 23 “ኔኒ ቱኖና መላ መሄራ ጋሄቶፋ፤ ማጫስ መሄራ ጋሄታናዉ መሄ ስን አፎ። ሄስ ዎጋን ባይናባ። 24 “ታኒ ህንተ ስንፈ የደያ ካዎተት ሄ ኦሶታን ቱንዳ ግሾ፥ ህንተ ሄ ኦሶታን ኤንታ መላ ቱኖፕተ። 25 ሀር አቶሽን፥ ቢታይካ ቱንዳ ግሾ፥ እያ ናጋራ ግሾ ታ እያ ሴራስ። ቢትያ ባናን ደኤይ አሳ ጩታሱ። 26 ሽን ህንተ ታ ህግያነ ታ ኪታ ናግተ። ህንተና ግድን ዎይኮ ህንተ ግዶን ደእያ አላጋ ቢታ አሳ ግድን ኦንካ ሄሳ መላ ቱና ኦሶ ኦፕተ። 27 “ህንተፈ ካሰ ሀ ቢታን ደእዳ አሳይ ሄሳ መላ ቱናባ ኦዳ ግሾ፥ ቢትያ ቱናሱ። 28 ህንተ ሀ ቢታ ቱንስኮ፥ ህንተፈ ካሰ ደእዳ ካዎተታ ሀ ቢትያ ጩትዳይሳዳ ህንተናካ ጩቶና መላ ናገትተ። 29 ሄሳታ ዳንያ ቱና ኦሶታፐ እሱዋካ ኦያ አስ ደእኮ፥ ሄ ኡራይ ባ አሳ ግዶፈ ኩረቶ። 30 ሄሳ ግሾ፥ ህንተፈ ካሰ ደእዳ አሳት ኦዳ ቱና ኦሶታ ኡባ ኦድ ህንተ ቱኖና መላ ታ ኪታ ናግተ፤ ታኒ ጎዳ፥ ህንተ ፆሳ” ያግስ።