ዮሃንሳ ዎንገላ 2

1 ሄን ጋላስ ጋልላ ቢታን ቃና ካታማን ያጋኖይ ያጋነትስ። የሱሳ አይያ ሄ ያጋኑዋን ደአዉሱ። 2 የሱሲካ ባ ታማረታራ እስፈ ሄ ያጋኑዋ ፄገትስ። 3 ዎይነ ኡሻይ ዉርን፥ የሱሳ አይያ የሱሳኮ፥ “ኤንታዉ ዎይነ ኡሻይ ዉርስ” ያጋሱ። 4 የሱሲ ዛሪድ፥ “ታ አየ፥ ነ ሀይሳን ገሎፓ? ታ ዎደይ ቡሮ ጋክቤና” ያግስ። 5 የሱሳ አይያ ኦሳንቾታኮ፥ “እ ህንተዉ ኦድያባ አይብባ ግድኮካ ኦተ” ያጋሱ። 6 አይሁደት ባንታ ጌሾ ዎጋስ ጎኤትያ ኡሱፑን ሹቻ ባት ሄ በሳን ደኦሶና። እስ እስ ባይ ናምኡ ዎይኮ ሄ ፁጋ ኦይኬስ። 7 የሱሲ ኦሳንቾታኮ፥ “ባታን ሃ ኩንተ” ያግስ። ኤንቲ ባታስ ዶና ጋካናዉ ሃ ኩንዶሶና። 8 የሱሲ ኤንታኮ፥ “ሀእ ዱቅድ ያጋኑዋ አዋተን ፖልሰይሳስ እምተ” ያግስ። ኤንቲ እያዉ ኤፍድ እምዶሶና። 9 ያጋኑዋ አዋተን ፖልሰይስ ዎይነ ኡሽ ላመትዳ ሃ ጋንፅ ኤክድ አዉፐ ይዳኮ ኤርቤና፥ ሽን ሃ ኩንዳ ኦሳንቾት ኤሮሶና። ያጋኑዋ አዋተን ፖልሰይስ ማችዉ ኤከይሳ ፄግድ፥ 10 “ኦንካ ሎኦ ዎይነ ኡሻ አሳ ኮይሮትድ ኡሼስ። ያትድ አሳይ ኡይ ካልዳፐ ጉየ፥ ቅራርያ እሜስ። ሽን ኔኒ ሎኦ ዎይነ ኡሻ ሀኖ ጋካናዉ ዎ አጋዳሳ” ያግስ። 11 የሱሲ ሀ ኮይሮ ማላታ ጋልላ ቢታን ቃና ካታማን ኦስ፤ ሄሳን ባ ግታተ በስስ። እያ ታማረት እያ አማንዶሶና። 12 ሄሳፈ ጉየ፥ የሱሲ ባ አየራ፥ ባ እሻታራነ ባ ታማረታራ እስፈ ቅፍርናሆማ ካታማ ብድ ጉ ጋላስ ጋምእስ። 13 አይሁደት ቦንችያ ፓስካ ባኣለ ጋላሳይ ማታትን የሱሲ የሩሳላመ ብስ። 14 ብድ ፆሳ ኬን ቦራታ፥ ሚዛታ፥ ዶርሳታነ ሆለታ ባይዘይሳታነ ባንታ ኦይድያን ኡትድ ሚሸ ላመይሳታ ደምስ። 15 እ ፁርቃፈ ዶቅድ አሳ ኡባ ኤንታ መሄታራ ፆሳ ኬፈ ጎድድ ካረ ከስስ። ሚሸ ላመይሳታ ፃርጴዛታካ አ የግድ ኤንታ ሚሽያ ላልስ። 16 ሆለ ባይዘይሳታ፥ “ሀ ሆለታ ሀይሳፈ ከስተ፤ ታ አዋ ኬ ግያ ኦፍተ” ያግስ። 17 እያ ታማረት ጌሻ ማፃፋን፥ “ታኒ ነ ኬስ ምሸትያ ምሻይ ታና ታማዳ ፁጌስ” ጌተትድ ፃፈትዳይሳ አኬክዶሶና። 18 ሄሳፈ ጉየ፥ አይሁደት ዛሪድ፥ “ነ ሀይሳ ኦናዉ ነዉ ማት ደኤይሳስ ኑና አይ ማላታ ኦዳ በሳኔ?” ያግዶሶና። 19 የሱሲ፥ “ሀ ፆሳ ኬ ላልተ፤ ታኒ ሄ ጋላሳን ዛራዳ ኬፃና” ያግስ። 20 ቃስካ አይሁደት፥ “ሀ ፆሳ ኬ ኬፃናዉ ኦይታማነ ኡሱፑን ላይ ኤክስ፥ ሽን ኔኒ ሄ ጋላሳን ኬፃኔ?” ያግዶሶና። 21 ሽን የሱሲ ኦድያ ፆሳ ኬይ ባ አሳተባ። 22 ሄሳ ግሾ፥ የሱሲ ሀይቆፐ ደንድዳፐ ጉየ እያ ታማረት እ ሄሳ ግዳይሳ አኬክዶሶና። ቃስ ኤንቲ ጌሻ ማፃፋን ፃፈትዳይሳነ የሱሲ ኦድዳይሳ አማንዶሶና። 23 የሱሲ ፓስካ ቦንችያ በሳን የሩሳላመን ደእሽን፥ እ ኦዳ ማላታታ በእድ ዳሮ አሳይ እያ አማንዶሶና። 24 ሽን የሱሲ አሳ ኡባ ኤርያ ግሾ ኤንታ አማንበና። 25 አሳ ዎዛናን ደእያባ እ ባ ሁጰን ኤርያ ግሾ አሳባ ኦንካ እያዉ ኦዳና መላ ኮሽቤና።