ኤርምያሳ ማፃፋ 48

1 ሞአበ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፤ “እ ያና ግሾ፥ ናቦ ካታማ አየ! ቅራታይማ ካታማይ ዬላታናነ፤ ኦይከታና፤ ኤንታ ሚፃይ ካዉያና፤ መቀረታና። 2 ህዛፐ ሞአበ ጬቆይ ያና፤ ሀሰቦና ካታማ አሳይ ሞአበ ቦላ፥ ‘ሃይተ፥ ሀ ቢታ ይሳና’ ያግድ ኢታባ ማቀትስ። ነኖ፥ ማድማና ካታመ፥ ማሽ ነና የደና ግሾ ስእ ጋ። 3 ሆሮናይማ አሳይ፥ ‘ዮይነ ኩንደ፥ ጋክስ’ ግድ ዋስያ ዋሱዋ ስእተ! 4 ሞአበይ መቀረታና፤ እያ ናይት ዬክያ ዬሁዋ ስእተ! 5 ኤንቲ ዬክሸ፥ ሉህታ ፑደ ከያና፤ ሆሮናይማፐ ዱገ ዎሸ፥ ዮ ዋሱዋ ስአና። 6 እሶይ እሶይ፥ ‘ባቃትተ፤ ህንተ ሸምፕዉ አሽተ፤ መላ ቢታን ደእያ አሮኤራዳ ዱማትተ፥ ህንተ ሸምፑዋ አሽተ’ ያጋና። 7 ኔኒ ነ ዎልቃንነ ነ ዱረተን ጬቀትዳ ግሾ፥ ነካ ድኤታና። ካሞሽካ ባ ካህነታራነ ሀላቃታራ፥ ድኤትድ ባና። 8 ጎዳይ ኦድዳይሳዳ፥ ካታማ ኡባ ይሰይስ ያና። እስ ካታምካ አተና፤ ዛንጋራይነ ደምባ ኡባይ ያና። 9 ሞአበይ ፓልድ አታና መላ ቀፈ እምተ። እ ካታማይ ያና ላትያ አስካ ደመና። 10 ጎዳ ኦሱዋ ቀል ግድ ኦያ ኡራይ ባደትዳይሳ ግዶ። ሱ ጉሶና መላ ባ ማሻ ተቅያ ኡራይ ባደትዳይሳ ግዶ! 11 “ሞአበይ ያላጋተፈ ዶምድ፥ እንጀን ደእዳ አሳ መላ፤ እ ሀራ ቢታ ድኤትቤና። ሞአበይ ኦቶፐ ኦቶን ትገቶናነ ቃፆና፥ ማልኦይ ላመቶናነ ሳዎይ አጎና፥ ኡትድ ደእዳ ዎይነ ኡሻ መላ። 12 ታኒ ኦቱዋ ጉፓንይሳታ ኪትያ ዎደይ ያና። ኤንቲ እያ ጉሳና፤ ኦቱዋፐ ፂዞ ይሳና፤ ኦቱዋ መንረና። 13 እስራኤለ አሳይ ባ አማነትዳ፥ ቤተለን ደእያ ኤቃን ካዉይዳይሳዳ ሞአበይ ባ ፆሳ ካሞሻን ካዉያና። 14 “ህንተ፥ ‘ኑ ዎልቃማ አስነ ምኖ ኦላንቾ’ ግድ አይስ ጬቀተቲ? 15 ሄኮ፥ ሞአበይነ ያን ደእያ ካታማት ይዶሶና። እያ ያላጋ አደ ናይት ሹከታናዉ ዱገ ብዶሶና” ያጌስ፥ ካዎይ፥ ኡባፈ ዎልቃማ ጎዳይ። 16 ሞአበ ዮይ ማታትስ፤ እያ ላለተ ዎደይ ኤለስድ ጋክስ። 17 እያ ዩሹዋን ደእያ አሳይ፥ እያ ግታተ ኤርያ ኡባይ፥ “ምኖ ግድዳ ካዎተ ፃምአይ ዋንድ መቅዴ?” ቦንቸትዳ ፃምአይ ዋንድ ትንቸትዴ? ያግድ ዘሌልተ። 18 “ህንተኖ፥ ድቦና ካታማን ደኤይሳቶ፥ ህንተ ቦንቾ በሳፈ ዎድ፥ መላ ቢታን ኡትተ። ሞአበ ይሰይስ ህንተ ቦላ ያና፤ ህንተ ሚፃ ኡባ ላላና። 19 አሮኤራ ካታማን ደኤይሳቶ፥ ኦገ ዶናን ኤቅድ ፄልተ፤ ከስ ኤክድ ባቃትያ አደታነ ማጫሳ፥ ‘አይበ ከይዳይ?’ ያግድ ኦይችተ። 20 ኤንቲ፥ ‘ሞአበይ ኩንድዳ ግሾ ካዉይስ፤ እያዉ ዬክተነ ዘሌልተ። ሞአበ ይዳይሳ ግሾ አርኖና ሻፋ ማታን አዋጅተ’ " ያግድ ዛራና። 21 “ገዘን ደእያ ሆሎና፥ ያሳ፥ መፋታ፥ 22 ድቦና፥ ናቦ፥ ቤት-ድብላታይማ፥ 23 ቅራታይማ፥ ቤት-ጋሙላ፥ ቤት-ማኦና፥ 24 ቅርዮታነ፥ ባሶራ ካታማታ ቦላነ ማታንነ ሃሆን ደእያ ሞአበ ካታማታ ቦላ ፕርድ ይስ። 25 ሞአበ ካጨይ ቃንፀትስ፤ እያ ቀሰይ መቅስ።" 26 ጎዳ ቦላ ኦቶርትዳ ግሾ፥ ሞአበ ኡሽድ ማይተ። ባ ጮሻ ቦላ ጎንዶረቶ፤ አሳ ኡባይ እያ ቦላ ቀልቅሶ። 27 ካሰ ነ እስራኤለ ቦላ ቀልቅሳብኪ? እያባ ሃሳያ ዎደ ካዳ ሁጰ ቃዳይ እስራኤለይ ካይሶታራ ኦይከትዳ ግሾዬ? 28 ህንተኖ፥ ሞአበን ደኤይሳቶ፥ ካታማፐ ከይድ፥ ሹቻ ሆምኦን ደእተ። አፎ ዶናን ባዉ ኬ ኬፅያ ሆለ መላ ግድተ። 29 ሞአበይ ዳሮ ኦቶርትስ፤ ሞአበይ አይ መላ ባ ጋና ጋቢስዳኮ፥ ጬቀትያኮ፥ ኦቶርትያኮ፥ አይ መላ ባና ቁ ኦያኮ፥ ታ ስአስ። 30 ታ ኤንታ ጬቁዋ ኤራይስ፤ ሽን አይኮካ ማደና፤ ኤንታ ኦቶሮይ አይኮካ ኦና። 31 ሄሳ ግሾ፥ ታ ሞአበስ ዋሳስ፤ ቅር-ሄሬሳ አሳስ ካዮታዳ ዬካይስ። 32 ህንተኖ፥ ሰባማ አሳዉ፥ ያእዜራ አሳስ ዬከይሳፈ አዳ ህንተዉ ዬካይስ። ህንተ ታሸይ ዳይድ፥ ማፅነ አባ ፕንድ፥ ያእዜራ ጋክዳ ዎይነ መላ፤ ሽን ህንተ ዎይነ አይፍያነ ዉርጩዋ ቦንቀይሳት ይድ ይስዶሶና። 33 ኡፋይስነ ሎኦባይ አይፍያ ሞአበ ቢታፈ ኤከትስ። ዎይነ ጉምእያ በሳፈ ዎይነይ ጎጎናዳ ተቃስ። ኦንካ እልልሸ ዎይነ ጉምኤና። ስኤትያ ግርስ ደእኮካ ኡፋይሳ ግርስ ግደና። 34 ኤንቲ ሀሰቦናንነ ኤልያላን ዋስያ ዋሶይ ያሃፃ ጋካናዉ ስኤቴስ። ዞኣራፐ ብድ ሆሮናይማነ ኤግላት-ሻልሻ ጋካናዉ ስኤቴስ። ሀር አቶሽን፥ ንምርማ ሃይ መልስ። 35 ታኒ ሞአበፐ ቃ በሳታን ጎይነሳታነ ባንታ ፆሳታስ እፃነ ጩይሰይሳታ ይሳና። 36 “ኤንቲ ካሰ ደምዳ ዱረተይ ሀእ ይዳ ግሾ፥ ታ ዎዛናይ ሞአበስነ ቅር-ሄሬሳ አሳስ ሱሱልኤዳ ዬካስ። 37 ኤንቲ ባንታ ሁጵያነ ባንታ ቡቻ ሜድዶሶና፤ ባንታ ኩሽያ ቃንፅድ ማዱንፅስዶሶና፤ ባንታ ፄሳን ካዮ ማኦ ዳንጭዶሶና። 38 ታኒ ሞአበ ኦንካ ኮዮና ኦቶዳ መንዳ ግሾ፥ ሞአበታ ኬ ቦላንነ ዳባባን ዬሆፐ አትሽን፥ ሀራባይ ባዋ” ያጌስ ጎዳይ። 39 ሞአበይ አይብ መቆ መቅደ! እያ አሳይ አይብ ዋሶ ዋስ! ሞአበ ዋን ዬላትድ፥ ባ ዞኩዋ ዛርዴ? ሄሳ ግሾ፥ ሞአበይ ባ ዩሹዋን ደእያ ኡባስ ሚቻስነ ዳጋማስ አትስ። 40 አርጋን ባ ቀፍያ ምጭድ የይሳዳ ሞርከይ ሞአበ ቦላ ያና። 41 እያ ካታማት ኦይከታና፤ እያ ሚፃት ኤከታና። ሄ ጋላስ ሞአበ ምኖ ኦላንቾታ ዎዛናይ እቀ ኦይክዳ ማጫሳ ዎዛና መላ ኡንኤታና። 42 ሞአበ ታ ቦላ ማካልዳ ግሾ ያና፤ ህዛፐ ጉየ ካዎተ ግድድ ዴና። 43 ሞአበ አሳዉ፥ ያሽ፥ ኦልነ ፅሄይ ህንተና ናጌስ። 44 ዳጋንያባፐ ባቃትያ ኦንካ ኦላን ኩንዳና፤ ኦላፈ ከይያ ኦንካ ፅሄን ኦይከታና። ታኒ ሞአበ ሴርያ ዎደ ሄሳ ኦና። 45 “ባቃትድ ብዳይሳት ዎልቃ ይድ፥ ሀሰቦና ካታማ ኩያን ኤቅዶሶና። ሀሰቦና ካታማፐ ታም፥ ካዎይ ስሆነይ ደእዳ ኬፈ ላጮይ ከይድ፥ ሞአበ ቢታነ ያን ደእያ ማካላንቾ አሳ ምስ። 46 ሞአበ አሳዉ፥ ህንተና አየ! ካሞሻ ጌተትያ ኤቃ ፆሳ ጎይነይሳት ይዶሶና፤ ኤንታ አደ ናይትነ ማጫ ናይት ድኤትድ ብዶሶና። 47 ግዶሽን፥ ዉርሰን ታኒ ሞአበ ዛራዳ ኦራና” ያጌስ ጎዳይ። ሞአበ ቦላ ኦደትዳ ፕርዳይ ሀይሳን ዉርስ።