ኤርምያሳ ማፃፋ 42

1 ቶራ ሞጮናት ኡባይ፥ ቃራያ ናአይ ዮሃን፥ ሆሻያ ናአይ አዛርያስ አሳ ኡባይ፥ ጉፈ ግታ ጋካናዉ፥ 2 ናብያ ኤርምያሳኮ ይድ፥ “ኑ ነና ኦይችያባ ኑስ ኦርክ። አትዳ ኑ ግሾ ጎዳ ነ ፆሳ ዎሳርክ። ኑ ካሰ ዳሮ፤ ሽን ሀእ ነ በኤይሳዳ ጉ አሳ ፃላል አትዳ። 3 ኑ ብያ ኦግያነ ኑ ኦናባ እ ኑና በሳና መላ ጎዳ ነ ፆሳ ኑ ግሾ ዎሳ” ያግዶሶና። 4 ናበይ ኤርምያስ ዛሪድ፥ “ሎኦ፤ ህንተ ኦይሻዳ፥ ጎዳ ህንተ ፆሳ ታ ዎሳና፤ ህንተፈ አይኮካ ቆሶና እ ኦድያባ ኡባ ህንተዉ ኦዳና” ያግስ። 5 ኤንቲ ዛሪድ፥ ኤርምያሳኮ፥ “ጎዳይ ነ ፆሳይ ነ ባጋራ ኑና ኪትያባ ኡባ ኑ ፖሎና እፅኮ፥ ጎዳይ ባ ሁጰን ኑ ቦላ ቱማነ አማነትዳ ማርካ ግዶ። 6 ኑ ዶስያባ ግድን፥ እፅያባ ግድን፥ ኑ ነና እያኮ ኪትያ ጎዳይ፥ ኑ ፆሳይ ኪትያባ ኑ ኦና። ኑ እያዉ ኪተትኮ፥ ኑስ ኡባባይ እንጀ ግዳና” ያግዶሶና። 7 ታሙ ጋላሳፐ ጉየ፥ ጎዳ ቃላይ ኤርምያሳኮ ይስ። 8 ቃራያ ናኣ ዮሃና፥ እያራ ደእያ ቶራ ሞጮናታነ አሳ ኡባ፥ ጉፈ ግታ ጋካናዉ ፄግድ፥ 9 ህንተ ዎሳ ታ እያኮ ሺሻና መላ ህንተ ታና ኪትዳ ጎዳይ እስራኤለ ፆሳይ ሀይሳዳ ያጌስ። 10 " ‘ታ ካሰ ህንተ ቦላ ኤህዳ ኢታባይ ታና አዛንዳ ግሾ፥ ህንተ ሀ ቢታን ኡትኮ፥ ታ ህንተና ኬፃናፐ አትሽን፥ ላልከ፤ ቶካናፐ አትሽን፥ ሾድከ። 11 ህንተ ሀእ ያይያ ባብሎነ ካዋስ አይኮካ ያዮፍተ። ህንተና እያ ኩሸፐ አሻናዉ ታ ህንተራ ደእያ ግሾ ያዮፍተ። 12 ታ ህንተዉ ቃታና፤ ያታዳ እ ህንተዉ ቃትድ፥ ህንተና ህንተ ቢታ ዛራና መላ ኦና’ ያጌስ ጎዳይ። 13 “ግዶሽን፥ ህንተ ጎዳስ፥ ህንተ ፆሳስ ኪተቶና እፅድ፥ ሀ ቢታን ኡቶኮ ጊኮ፥ 14 ቃስ ህንተ፥ ‘ኦላ ዎረነ ኦላስ ፑንያ ሞይዘ ስኦናነ ኮሽ ባይና ግብፀ ብድ፥ ያን ዳና’ ጊኮ፥ 15 ህንተኖ፥ ይሁዳን አትዳ አሳዉ፥ ጎዳይ ግያባ ስእተ። ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ህንተ ግብፀ ብድ፥ ያን ዳናዉ ቆፋ ቃችኮ፥ 16 ህንተ ያይዳ ኦላይ ግብፀን ህንተና ኦይካና፤ ህንተ ህርግዳ ኮሻይ ህንተና ካልድ ባና፤ ህንተ ያን ግብፀን ሀይቃና። 17 ግብፀ ብድ ዳናዉ ቆፋ ቃችዳ አሳ ኡባይ ኦላን ዎይኮ ኮሻን ዎይኮ ቦሻን ሀይቃና። ታ ኤንታ ቦላ ኤህያ ኢታፐ እሶይካ ከስ ኤከና ዎይኮ አተና’ ያጌስ። 18 “ኡባፈ ዎልቃማ ጎዳይ፥ እስራኤለ ፆሳይ፥ ‘የሩሳላመን ደኤይሳታ ቦላ ታ ሀንቆይነ ታ ይሎይ ጉክዳይሳዳ፥ ህንተ ግብፀ ገልያ ዎደ ህንተ ቦላ ታ ሀንቆይ ሄሳዳ ጉካና። ህንተ ዳጋማስ፥ ጫሻስ፥ ባደስነ ሚቻስ አታና፤ ሀ በሳ ዛሪድ በኤከታ’ ያጌስ። 19 “ይሁዳን አትዳይሳቶ፥ ጎዳይ ህንተኮ፥ ‘ግብፀ ቦፕተ!’ ያግስ። ታ ሀች ህንተኮ፥ ‘ናገትተ’ ገይሳ ስእተ። 20 ህንተ ታኮ፥ ‘ኑ ግሾ ጎዳ ኑ ፆሳ ዎሳ፤ እ ነዉ ኦድያባ ኡባ ኑስ ኦዳ፤ ኑ ኦና’ ያግድ፥ ታና ጎዳኮ፥ ህንተ ፆሳኮ፥ ኪትደታ፤ ሄሳን ግታ ባላ ባልደታ። 21 ታ እ ግዳባ ኡባ ሀች ህንተዉ ኦዳስ። ሽን ጎዳይ ህንተ ፆሳይ ታ ባጋራ ህንተዉ ኪትዳ ቃላስ ኪተቶና እፅደታ። 22 ህዛ፥ ሀይሳ ስእተ፤ ህንተ ብድ ዳናዉ ኮይያ ቢታን ህንተ ኦላን፥ ኮሻንነ ቦሻን ሀይቅድ ዉራና” ያግስ።