ኤርምያሳ ማፃፋ 40

1 ካዋ ናገይሳታ ሀላቃይ ናቡዛርዳን ኤርምያሳ ራማን ብርሽድ ስምን፥ ጎዳ ቃላይ ኤርምያሳኮ ይስ። ናቡዛርዳን የሩሳላመፐነ ይሁዳፐ ድእድ፥ ባብሎነ ኤፋናዉ ቃችዳ አሳ ግዶን ኤርምያስ ሳንላታን ቃሸትድ ደኤስ። 2 ካዋ ናገይሳታ ሀላቃይ ኤርምያሳ ዱማ ከስድ፥ ሀይሳዳ ያግስ፦ “ጎዳይ ነ ፆሳይ፥ ዮ ሀ ቢታ ቦላ ኤሀናይሳ ኦድስ። 3 እ ኤሀና ግዳይሳዳ ሀእ ኦስ፤ ጎዳ ቦላ ህንተ ናጋራ ኦዳ ግሾነ እያዉ ኪተቶና እፅዳ ግሾ ሀይስ ኡባይ ሀንስ። 4 ሄኮ፥ ሀእ ታ ነ ኩሸን ደእያ ሳንላታ ብርሻዳ ነና የዳስ። ታራ ባብሎነ ባና ጊኮ የ፤ ታ ነዉ ኮሽያባ ኡባ ኩንና። ባብሎነ ባናዉ ኮዮና እፅኮ አታናዉ ዳንዳኣሳ። ቢታ ኡባይ ነ ስንን ደኤስ፤ ነና ሎእዳ በሲ አዉካ ባ” ያግስ። 5 ኤርምያስ እያ ማታፐ ቦና ደእሽን፥ ናቡዛርዳን ጉጅድ ያግስ፤ “ሳፋና ናኣ፥ አክቃማ ናኣ ጎዶልያኮ ባ። ባብሎነ ካዎይ ናቡካዳናፆር እያ ይሁዳ ካታማታ ሃርያ አስ ኦድ ሹምስ። ሄሳ ግሾ፥ እያራ እስፈ ያን አሳራ ደአ፤ ዎይኮ ነና ሎእዳ በሲ አዉካ ባ” ያግስ። ካዋ ናገይሳታ ሀላቃይ እያዉ ሽንቀነ ሀራ እሞታ እምድ የድስ። 6 ኤርምያስ ምፅጳን ደእያ አክቃማ ናኣ ጎዶልያኮ ብስ። እ ያን አትዳ አሳራ እስፈ ደእስ። 7 ይሁዳ ቶራ ሞጮናታፐነ ኦላንቾታፐ ጉት ባብሎነ ካዋስ ኩሸ እምቦኮና። ኤንቲ ባብሎነ ካዎይ፥ አክቃማ ናአ ጎዶልያ ቢታ ሃረይሳ ኦድ ሹምዳይሳነ ባብሎነ ድኤትድ ቦና ይሁዳን አትዳ ማንቆታስ ሀላቃ ኦዳይሳ ስእዶሶና። 8 ናታና ናአይ እስማኤል፥ ቃረያ ናይት ዮሃንነ ዮናታን፥ ታንሁመታ ናአይ ሳራይ፥ ናፆፋ አድያ ዮፋ ናይትነ ማእካ አድያ ናአይ ያዛን ባንታ ኦላንቾታ ኡባራ ጎዶልያኮ ምፅጳ ይዶሶና። 9 ሳፋና ናአይ፥ አክቃማ ናአይ ጎዶልያ ኤንታዉ ሀይሳዳ ያግድ ጫቅስ፦ “ባብሎነታስ ኩሸ እማናዉ ያዮፍተ፤ ሄ ቢታን ደእተ። ባብሎነ ካዋስ ሃረትተ፤ ኡባባይ ህንተዉ እንጀ ግዳና። 10 ታ ምፅጳን ኡታዳ፥ ባብሎነ ቢታፈ ህንተራ ጋሄታናዉ ያ ኡባራ ህንተ ዶና ግዳዳ ኦደታና። ሽን ህንተ ደእያ በሳን ዎይነ፥ ሻማሆ ዛይተነ ሀራ ካ አይፈ ኡባ ሺሽድ ዳጋይተ” ያግስ። 11 ሞአበን፥ አሞነን፥ ኤዶመንነ ሀራ ቢታታን ደእያ አይሁደ ኡባይ ባብሎነ ካዎይ፥ ጉ ይሁዳ አሳት ይሁዳን አታና መላ ኦዳይሳነ ሳፋና ናአ አክቃማ ናአ ጎዶልያ ኤንታ ቦላ ሹምዳይሳ ስእዶሶና። 12 ኤንቲ ላለትድ ደእያ ባንታ ቢታፈ ይሁዳ ስሚድ፥ ጎዶልያ ደእያ በሳ ምፅጳ ይዶሶና። ያን ኤንቲ ዳሮ ዎይነነ ሀራ ካ አይፈ ሺሽድ ዳጋይዶሶና። 13 ሄሳፈ ጉየ፥ ቃራያ ናአይ ዮሃንነ ኩሸ እምቦና ቶራ ሞጮናት ኡባይ ጎዶልያኮ ምፅጳ ይድ፥ 14 “አሞነ ካዎይ ባአልስ ነና ዎና መላ ናታና ናኣ እስማኤላ የድዳይሳ ኤራይ?” ያግዶሶና። ሽን አክቃማ ናአይ ጎዶልያ ኤንታ ኦዳ አማኖና እፅስ። 15 ቃራያ ናአይ ዮሃን ምፅጳን ደእያ ጎዶልያኮ ይድ፥ “ኦንካ ኤሮና ደእሽን ባዳ፥ ናታንያ ናኣ እስማኤላ ታ ዎና። እ ነና ዎኮ፥ ነ ማታን ሺቅዳ አይሁደ ኡባይ ላለታና፤ ቃስ ይሁዳን አትዳ አሳ ኡባይ ዉራና” ያግስ። 16 ሽን አክቃማ ናአይ ጎዶልያ ዛሪድ፥ “እስማኤላባ ነ ኦድያ ኡባይ ዎርዶ ግድያ ግሾ ሄሳ መላባ ኦፋ” ያግስ።