ኤርምያሳ ማፃፋ 27

1 እዮስያሳ ናአይ ሰደቅያስ፥ ይሁዳን ካዎቶ ዶምዳ ዎደ ሀ ቃላይ ጎዳፐ ኤርምያሳኮ ይስ። 2 “ዳፎ ጎነ ዎዶሮራ ደእያ ቃምባራ መዳ ነ ጋናን ዎ። 3 ይሁዳ ካዋ ሰደቅያሳኮ የሩሳላመ ኪተትዳ አሳ ባጋራ፥ ኤዶመ፥ ሞአበ፥ አሞነ፥ ፅሮሳነ ስዶና ኪታ። 4 ኤንቲ ባንታ ጎዳታስ ኦዳና መላ ኤንታ ኪታ። ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ 5 ‘ታ ግታ ዎልቃንነ ታ ምጨትዳ ኩሸን ሳኣ፥ ሳአን ደእያ አሳ፥ መሄነ ዶአታ መስ፤ ታኒ እያ፥ ታ ኮይያ ኦደስካ እማይስ። 6 ሀእ ታ ቢታ ኡባ ታ አይልያስ፥ ባብሎነ ካዋ ናቡካዳናፆራስ እማስ። ቃስ ታ ባዞ ዶአትካ እያዉ ሃረታና መላ ኦስ። 7 እያ ቢታይ ሀራታስ ሃረትያ ዎደይ ጋካናዉ ካዎተት ኡባይ እያዉ፥ እያ ናኣስነ እያ ናኣ ናኣስ ሃረታና። ሄሳፈ ጉየ፥ ዳሮ ካዎተትነ ግታ ካዎት እያ ሃራና።’ 8 “ሽን አይ ቢት ዎይኮ አይ ካዎተ ባብሎነ ካዋ ናቡካዳናፆራስ ኪተቶና እፅኮነ እያ ቃምባራን ገሎና እፅኮ፥ ሄ ካዎተይ እያ ኩሸን ያና ጋካናዉ ማሻን፥ ኮሻንነ ቦሻን ሴራና። 9 ሄሳ ግሾ፥ ‘ባብሎነ ካዋስ ሃረተከታ’ ግያ ህንተ ናበታ፥ ህንተዉ ካየይሳታ፥ ህንተ አሙሆ ብለይሳታ፥ ህንተ ማሮታነ ሞይትለ ፄገይሳታ ስኦፕተ። 10 ኤንቲ ህንተዉ ዎርዶ ኦዶሶና፤ ህንተና ህንተ ቢታፈ ሾዳና፤ ህንተና ጎዳዳ ከሳና፤ ህንተካ ያና። 11 ሽን አይ ካዎተካ ባብሎነ ካዋ ቃምባራን ገልድ፥ እያዉ ሃረትኮ፥ ታ ሄ ካዎተ እያ ቢታን አሻና፤ ኤንቲ ሄ ቢታ ጎያና፤ ያን ዳና” ያጌስ ጎዳይ። 12 ታኒ፥ ይሁዳ ካዋ ሰደቅያሳስካ ሀ ቃላ ኦዳስ፤ “ባብሎነ ካዋ ቃምባራን ገላዳ እያዉነ እያ አሳስ ሃረትኮ፥ ነ ደኦን ዳና። 13 ጎዳይ ባብሎነ ካዋስ ሃረቶና እፅያ ካዎተስ ኦድዳይሳዳ ማሻን፥ ኮሻንነ ቦሻን ነነ ነ አሳይ አይስ ሀይቄቲ? 14 ኤንቲ ኦደይ ዎርዶ ግድያ ግሾ፥ ‘ህንተ ባብሎነ ካዋስ ሃረተከታ’ ያግድ ኦድያ ናበታ ስኦፕተ። 15 ታ ኤንታ ኪታብከ፤ ሽን ኤንቲ ታ ሱንን ዎርዶ ትንብተ ኦዶሶና። ሄሳ ግሾ፥ ታ ህንተና ጎዳዳ ከሳና፤ ህንተነ ህንተ ናበት ያና” ያጌስ ጎዳይ። 16 ሄሳፈ ጉየ፥ ታ ካህነታስነ አሳ ኡባስ ሀይሳዳ ያጋዳ ኦዳስ፦ “ፆሳ ኬ ሚሸይ ባብሎነፐ ማታራ ስሚድ ያና” ያግድ ዎርዶ ኦድያ ናበታ ስኦፕተ። 17 ኤንቲ ግያባ ስኦና አግድ፥ ባብሎነ ካዋስ ሃረትተ፤ ህንተ ደኦን ዳና። ሀ ካታማይ አይስ ላለትዳ በሲ ግዳኔ? 18 ኤንቲ ቱማ ናበ ግድኮነ ጎዳ ቃላይ ኤንታን ደእኮ፥ ፆሳ ኬን፥ ይሁዳ ካዎ ጋንነ የሩሳላመን አትዳ ሚሸይ ባብሎነ ቦናዳ ኡባፈ ዎልቃማ ጎዳ ፆሳ ዎሶ። 19 “ኡባፈ ዎልቃማ ጎዳይ፥ ፆሳ ኬ ካረን ኤቅዳ ናምኡ ናሰ ብራታ ቱሳታባ፥ ግታ ከረታባ፥ ጫና ጋረታባነ ሀራ ሚሸታባ ሀይሳዳ ያጌስ፦ 20 ባብሎነ ካዎይ ናቡካዳናፆር እዮአቄማ ናኣ፥ ይሁዳ ካዋ እኮንያናነ ይሁዳንነ የሩሳላመን ደእያ ግታ አሳ ኡባ ድእድ ኤፍዳ ዎደ፥ 21 ኡባፈ ዎልቃማ ጎዳይ፥ እስራኤለ ፆሳይ፥ ፆሳ ኬን፥ ይሁዳ ካዎ ጋንነ የሩሳላመን አትዳ ሚሸታባ ሀይሳዳ ያጌስ፤ 22 ኤንቲ ባብሎነ ቢታ ጋዘታና፤ ታ ኤንታ ግሾ ያና ዎደይ ጋካናዉ፥ ኤንቲ ያን ዳና። ሄ ዎደ ታ ኤንታ ጉየ ዛራዳ ኤንታ በሳን ዎና” ያጌስ ጎዳይ።