ያይቆባ ኪታ 1

1 ፆሳነ ጎዳ የሱስ ክርስቶሳ አይለይ፥ ያይቆብ፥ ቢታ ኡባን ላለትዳ ታማነ ናምኡ ሼሻታስ ኪትዳ ኪታ። ሳሮ፥ አይ መላ ደኤቲ? 2 ታ እሻቶ፥ ህንተና ዱማ ዱማ ፓጨይ ጋክያ ዎደ ህንተ ሎኦባ ደምዳዳ ኩመ ኡፋይሳን ኤክተ። 3 ህንተ አማኑዋ ፓጨተይ ዳንዳአ ህንተዉ እመይሳ ኤሬታ። 4 ህንተ ዉርሰ ጋካናዉ ዳንዳእኮ አይብ ፓጨይ ባይና ፖሎነ ኩመ ግደታ። 5 ህንተፈ ኦደስካ ጭንጫተ ይኮ ፆሳ ዎሶ። እያዉ እመታና። ፆሳይ ኦናካ ቦሮና ኡባስ ኬሀተን እምያ ፆሰ። 6 ሽን እ ዎስያ ዎደ ስና አማኖን ፆሳ ዎሶ። ስያ ኦንካ ጫርኮይ ሱግን ቃፅያ አባ ዙለ መላ። 7 ናምኡ ቆፍ ደኤይነ ባ ኦግያን ኤቆና ኦንካ ጎዳፐ አይኮካ ደማና ግድ ቆፖፎ። 9 አማንያ ማንቆ አሳት፥ ፆሳይ ኤንታና ቁ ኦያ ዎደ ኡፋይቶ። 10 ቃስ አማንያ ዱረ አሳት ፆሳይ ኤንታና ዝቅ ኦያ ዎደ ኡፋይቶ። ዱረ አሳት ጪሻዳ ያና። 11 አዋይ ባ ምሻራ ከይድ ማታ መልስን፥ ጪሻይ ቆለቴስ፤ እያ ሎኦተይካ ዬስ። ሄሳዳካ፥ ዱረ አሳት ባንታ ኦሱዋን ዳቡርሸ ያና። 12 መቱዋ ፆንድ አዳፐ ጉየ፥ ፆሳይ ባና ሲቀይሳታስ እማና ግድ ቃላ ገልዳ ደኦ ካላቻ ኤካና ግሾ፥ መቶን ገንጭያ አስ አንጀትዳይሳ። 13 ኦንካ ፓጨትያ ዎደ፥ “ታና ፆሳይ ፓጬስ” ጎፖ። ፆሳይ ኢታን ፓጨተና፤ ቃስ እ ኦናካ ፓጨና። 14 ሽን እስ እስ አስ ባ ኢታ አሙዋን ጎሸትያ ዎደነ ጭመትያ ዎደ ፓጨቴስ። 15 ሄሳፈ ጉየ፥ አሞተ ቃንትድ ናጋራ የሌስ፤ ቃስ ናጋር ድጭድ ሀይቆ የሌስ። 16 ታ ሲቆ እሻቶ፥ ጭመቶፍተ። 17 ሎኦ እሞይነ ኩመ አንጆ ኡባይ ሳሎፐነ ሳሉዋ ፖኡዋ መዳ ፆሳ አዋፐ ዬስ። ፆሳይ ኩያዳ ኡባ ዎደ ላመተና። 18 ኑኒ፥ እያ መተስ ኮይሮ ግዳና መላ ኑና ቱማ ቃላን ባ ሸነን የልስ። 19 ታ ሲቆ እሻቶ፥ ሀይሳ አኬክተ። አስ ኡባይ ስአናዉ ኤለሶ፥ ሽን ኦደታናዉነ ሀንቀታናዉ ኤለሶፖ። 20 አሳ ሀንቆይ ፆሳይ ኮይያ ፅሎተ ኤሄና። 21 ሄሳ ግሾ፥ ቱና ሀኖታነ ኢታተ ኡባ ድግድ፥ ፆሳይ ህንተ ዎዛናን ቶክዳ ህንተ ሸምፑዋ አሻናዉ ዳንዳእያ ቃላ አዳተን ኤክተ። 22 ሽን ፆሳ ቃላ ኦሶን ፔሽተፐ አትሽን፥ ስሳ ፃላላን ህንተና ጭሞፍተ። 23 ቃላ ስእድ ኦና አስ፥ እ ባ ሶምኡዋ ማስቶተን በእያ አሳ መላ። 24 እ ባ ሶምኡዋ በእድ ቤስ፥ ሽን እ አይ ዳንያኮ ኤለስ ዶጌስ። 25 ሽን ኦንካ አይለተፈ ከስያ ፖሎ ህግያ አኬካን በእድ፥ ካልድ ናገይ፥ ስእዳይሳ ዶጎና ኦሶን ፔሽያ ኡራይ፥ ባ ኦሶ ኡባን አንጀታና። 26 ባ እንፃርሳ ናጎና አማናይስ ግያ ኡራይ ባና ጭሜስ፤ እያ አማኖይ ሀዳ። 27 ፆሳ አዋ ስንን ቦረይ ባይና ጌሻ አማኖይ ሀይሳ፦ አይያ አዉ ባይና ናይታነ አምኤታ ማዶነ አላምያ ቱናፐ ባና ናጎ።