እሳያሳ ማፃፋ 56

1 “ሱረ ፕርዳ ናግተ፤ ፅሎ ኦተ፤ ታ አቶተይ ኤለስድ ያና፤ ታ ፅሎተይ ማታን ቆንጫና። 2 ሀይሳ ኦያ ኡራይ፥ ሳምባታ ቱንሶና ቦንችያ ኡራይነ ባ ኩሸይ ኢታባ ኦና መላ ተቅያ ኡራይ አንጀትዳይሳ” ያጌስ ጎዳይ። 3 ጎዳኮ ሺቅዳ በተ አስ፥ “ጎዳይ ታና ባ አሳፐ ሻካና” ጎፖ፤ ሹፋይ፥ “ታኒ መልዳ ም” ጎፖ። 4 “ታ ሳምባታ ቦንችያ፥ ታና ኡፋይስያባ ዶረይነ ታ ጫቁዋ ምንድ ናግያ ሹፋታስ፥ 5 ኤንታዉ ታኒ ታ ኬንነ ታ ድርሳ ግምብያ ግዶን ኤንቲ ሀሳየትያባ እማና። ኤንቲ ማጫ ናአነ አደ ናአ የልድ፥ ደምያ ቦንቹዋፈ አያ ሱን ታኒ ኤንታዉ እማና፤ ታኒ መርናዉ ዮና ሱን ኤንታዉ እማና። 6 ጎዳ ሀጋዛናዉ፥ ጎዳ ዶሳናዉነ እያ አይለ ግዳናዉ ባንታና እያኮ ሺሽያ፥ ሳምባታ ቱንሶና ቦንችያነ ታ ጫቆ ቃላ ምንድ ናግያ በተ አሳታ፥ 7 ታኒ ታ ጌሻ ዙማ ቦላ ኤሀዳ ታ ዎሳ ኬን ኤንታ ኡፋይሳና። ኤንቲ ታ ያርሾ በሳን ሺሽያ ፁሳ ያርሾይነ ሀራ ያርሾይ ኤከታና፤ ታ ኬይ አሳ ኡባይ ፆሳ ዎስያ ኬ ጌተታና” ያጌስ። 8 “ሽቅዳይሳታ ቦላ ጉጃዳ ሀራታካ ታኒ ሺሻና” ያጌስ እስራኤለፐ ላለትዳይሳታ ሺሽያ፥ ኡባ ሃርያ ጎዳይ። 9 ህንተኖ ባዞ ዶአቶ፥ ህንተኖ ዎራ ዶአቶ፥ ኡባይ ሃ ይድ ሚተ። 10 እስራኤለ አሳ ናገይሳት ቆቀ፤ ኤንታዉ ኤር ባዋ፤ ኤንቲ ኡባይ ቦጫናዉ ዳንዳኦና ቡታለ ካናታ፤ ኤንቲ ዝንእድ ኤልሞቶሶና፤ ስኮ ዶሶሶና። 11 ኤንቲ ምድ ካሎና ያራምባ ካና መላ፤ ኤንቲ አኬክ ፓጭዳ ሄንንቾ። ኤንቲ ኡባይ ባንታ ኦገ ብዶሶና፤ ኡባይ ባንታ ጎአ ፃላላ ኮዮሶና። 12 ኤንቲ፥ “ሃ ዪተ፤ ዎይነ ኡሻ አነ ኡዮስ፤ ማይያ ኡሻ አነ ጋኖስ! ዎንቶይ ሀች መላ ግዳና፤ ሀችፈካ አድ ሎአና” ያጎሶና።