እንባቆመ ማፃፋ 1

1 ናብያ እንባቆመስ ጎዳይ ቆንጭስዳ ቃላይ ሀይሳ። 2 እንባቆመይ፥ “አቤት ጎዳዉ፥ ታና ማዳና መላ ታኒ ነና ፄግያ ዎደ አዉደ ጋካናዉ ስኦና እፃይ? ታኒ ኡንኤታዳ ኔኮ ዋስያ ዎደ አዉደ ጋካናዉ አሾና እፃይ? 3 ኔኒ ሀ ኢታተ ኡባ ታና አይስ በሳይ? ኔኒ ባላ በአሸ አይስ ስእ ጋይ? ዮይነ ጌላተ ታ ስንና፤ ፓላምነ ኦሽ ቢታ ኡባን ዳርስ። 4 ሄሳ ግሾ፥ ህገይ ዶልእስ፤ ሱረ ፕርድ ካንና። ናጋራንቾት ፅሎ አሳታ ተቅድ ኦይክዳ ግሾ፥ ፕርድ ጌላትስ” ያግስ። 5 ጎዳይ ዛሪድ፥ “ህንተ ዩሹዋን ደእያ ካዎተታ ፄልድ ማላለትተ። ህንተዉ አስ ኦድን ህንተ አማኖና ኦሱዋ ታኒ ህንተ ዎድያን ኦና። 6 ታኒ ቃይ ባይናይሳታነ ድርግያ ባብሎነ አሳ ደንና። ኤንቲ ባንታባ ግዶና ቢታ ኦልድ ኦይካናዉ ቢታ ኡባን ዩዮሶና። 7 ኤንቲ ያሽሶሶናነ ዳጋንሶና፤ ባንታና ቦንችስያ ህገ ከሶሶና። 8 ኤንታ ፓራት ማሄፐ አድ ኤለሶሶና፤ ኮሻትዳ ኦማርሳ ሱመፐ አድ ዎዛና ምኖ። ኤንታ ፓራ አሳት ሃሆፐ ዮሶና፤ ኤንቲ አርጋን እስባ ኦይካናዉ ዎያዳ ፓሎሶና። 9 ኤንታ ኦላንቾት ኡባይ ኢታ ኦሶ ኦናዉ ባዞ ጫርኮዳ ጫርክሸ ዮሶና። አሳ ድእድ ሻፈዳ ሺሾሶና። 10 ኤንቲ ካዎታ ቦላ ቀልቅሶሶና፤ ሃረይሳታ ኤንቲ ቶቾሶና። ኤንቲ ሹቻ ድርሳን ድረትዳ ካታማታ ኡባ ቦላ ሚጮሶና። ሄ ድርሳታ ድአናዉ ኤንታ ዩሹዋን ቢታ ሺሾሶና። 11 ሄሳፈ ጉየ፥ ኤንቲ ኡባ ጫርኮ መላ ፕትድ ኤፋና። ሄ ጌላታስ ኤንታ ዎልቃይ ኤንታ ፆሳ” ያግስ። 12 አቤት ጎዳዉ፥ ታ ፆሳዉ፥ ታ ጌሻዉ፥ ኔኒ መርና ፆሳ ግድኪ? ኔኒ ኑ ዛላ ግድያ ግሾ ኑኒ ሀይቆኮ። አቤት ጎዳዉ፥ ባብሎነ አሳይ ኑና ፕርዳና መላ ኤንታ ደንዳ ዎልቃ ኤንታዉ እማዳሳ። 13 ነ አይፈት ዳሮ ጌሽ ግድያ ግሾ፥ ኢታባ ፄላናዉ ዶሶኮና፤ ኔኒ ኢታባይ ኦሰትያ ዎደ በአሸ ስእ ጋካ። ያትን፥ ሀ ኢታታ አይስ ስእ ጋዳ ፄላይ? ናጋራንቾት ባንታፈ አድ ፅልያ አሳታ ምትያ ዎደ አይስ ስእ ጋይ? 14 ኔኒ አሰ አባ ሞሎዳነ ካለይ ባይና ኡሎራ ጎሸትያ መተታ መዳሳ። 15 ባብሎነ አሳይ አሳ ኡባ ቃጰን ቆርድ ከሳና፤ ኤንታ ባንታ ግትያን ኦይካና፤ ኤንታ ባንታ ዳቹዋን ቡርድ ሺሻና፤ ሄሳ ኦድ ኤንቲ ኡፋይታናነ ሀሹ ጋና። 16 ሄሳ ግሾ፥ ኤንቲ ባንታ ግትያስ ያርሻና፤ ባንታ ዳቹዋስ እፃነ ጩይሳና። ኤንቲ ሻሎ ደመይነ እንጀትን ደኤይ ሄ ግተታና። 17 ያትን፥ ኤንቲ ባንታ ግትያ ቃይ ባይና የግሸነ ምሽ ካዎተታ ይስሸ ዋንድ ዳኔ?