መተ ማፃፋ 7

1 ሄሳፈ ጉየ ጎዳይ ኖሄ ሀይሳዳ ያግስ፤ “ኔኒ ነ ሶ አሳ ኡባራ ማርካብያ ግዶ ገላ። ሀ ዎድያ የለተ ግዶን ታ ሸንያ ፖልዳይ ነ ፃላላ ግድዳይሳ በአስ። 2 ኔኒ ቱና ግዶና መሄነ ዶአ ኡባፈ እያ ቆሞፈ ቆሞፈ አደነ ማጫ ላፑን ላፑን፥ ቱና መሄነ ዶአ ኡባፈ እያ ቆሞፈ ቆሞፈ እስ አደነ እስ ማጫ ገልሳ። 3 ቃስ ሳሎ ካፎታፐ እያ ቆሞፈ ቆሞፈ አደነ ማጫ ላፑን ላፑን ኦዳ፥ ቢታ ኡባ ቦላ ዱማ ዱማ ኮቻይ ደኦን ዳና መላ ኔራ ኤካዳ ገላ። 4 ላፑን ጋላሳፐ ጉየ፥ ታኒ ኦይታሙ ጋላስነ ኦይታሙ ቃማ ሀ ሳኣ ቦላ እራ ቡክሳና። ያታዳ ታኒ መዳ መተ ኡባ ቢታ ቦላፈ ቁቻና” ያግስ። 5 ያትን ኖሄይ ጎዳይ እያ ኪትዳ ኡባባ ኦስ። 6 ዮ ሃይ ሀ ሳኣ ቦላ ይዳ ዎደ ኖሄስ ላይ ኡሱፑን ፄታ። 7 ኖሄይ፥ እያ አደ ናይት፥ እያ ማችያነ እያ ናይታ ማቸት ዮ ሃፈ አታናዉ ማርካብያ ግዶ ገልዶሶና። 8 ቱና ግዶና መሄፐነ ዶአፐ፥ ቱና መሄፐነ ዶአፐ ካፎታፐነ ቢታራ ጎሸተይሳታ ኡባፈ 9 ፆሳይ ኖሄ ኪትዳይሳዳ አደነ ማጫስ ናምአ ናምአ ግድድ፥ ኖሄኮ ማርካብያ ግዶ ገልዶሶና። 10 ላፑን ጋላሳፐ ጉየ፥ ዮ ሃይ ሀ ሳአ ቦላ ይስ። 11 ኖሄይ ኡሱፑን ፄቱ ላይ ደእን፥ ናምአን አጌናን፥ ታማነ ላፑን ጋላሳን፥ ቢታ ግዶን ደእያ ግታ ጪሙዋ ፑልቶ ኡባይ ቅ አግስ። ሳሎን ደእያ ሃ ማስኮተት ዶየትዶሶና። 12 እራይ ሀ ሳኣ ቦላ ኦይታሙ ጋላስነ ኦይታሙ ቃማ ቡክስ። 13 እር ቡካ ዶምዳ ጋላስ ኖሄይነ እያ ማችያ፥ እያ አደ ናይት፥ ሴም፥ ካምነ ያፈት፥ እያ ናይታ ሄታ ማቸት እስፈ ማርካብያ ግዶ ገልዶሶና። 14 ዶአ ኡባፈ ባ ቆሞን ቆሞን፥ መሄ ኡባፈ ባ ቆሞን ቆሞን፥ ቢታራ ጎሸትያ ኡባፈ ባ ቆሞን ቆሞን፥ ካፎ ኡባፈ ባ ቆሞን ቆሞን ኤንታራ እስፈ ገልዶሶና። 15 ሸምፖራ ደኤይሳት ኡባይ ናምአ ናምአ ግድድ ኖሄኮ ማርካብያን ገልዶሶና። 16 ፆሳይ ኖሄ ኪትዳይሳዳ፥ መተ ኡባፈ አደነ ማጫ ግድድ ማርካብያ ግዶ ገልን ኖሄፐ ጉየራ ጎዳይ ማርካብያ ፐንግያ ጎርድስ። 17 ዮ ሃይ ኦይታሙ ጋላስ ሳአ ቦላ ቡክሸ ደእስ። ሃይ ዳርድ ማርካብያ ቢታፈ ፑደ ደንስ። 18 ሃይ ቢታ ቦላ ኬህ ዳርን፥ ማርካበይ ሃ ቦላ ቶከትስ። 19 ሳሎፐ ጋርሳን ደእያ ዙማት ኡባይ ምተታና ጋካናስ ሃይ ሳአ ቦላ ኬህ ዳርስ። 20 ሃይ ዙማታ ፄራፐ አድ፥ ታማነ እቻሹ ዋ ጋካናስ ድጭስ። 21 ያትን ሳአ ቦላ ዎፅ ቃፅያ መተት ኡባይ፥ ካፎት፥ መሄይ፥ ዶእነ፥ አስ ኡባይ ሀይቅስ። 22 ቢታ ቦላ ደእያ ባ ሲራ ደኦ ሸምፖ ሸምፕያ ኡባይካ ሀይቅስ። 23 ሳአ ቦላ ደኦይ ደእያ ኡባይ፥ አሳይ፥ መሄይ፥ ዶአይነ ሳሎ ካፎት ኡባይካ ሳአፐ ቁሸትዶሶና። ኖሄይነ እያራ ማርካብያ ግዶን ደኤይሳታ ፃላል አትዶሶና። 24 ሄ ሃይ ፓጮና ፄታነ እሻታሙ ጋላስ ሳአ ቦላ ጋምእስ።