ህዝቄላ ማፃፋ 5

1 “ነኖ፥ አሳ ናአዉ፥ ኦጮ ማሽ ኤካዳ፥ ማቅላራ ሜድያዳ ነ ሁጵያነ ነ ቡቻ ሜዳ። ሄ ሁጵያ ምዛነን ማዛና፤ ነ ብናና ሄ በሳን ሻካ። 2 ኔኒ ተቅያ ጋላሳይ ዉርያ ዎደ፥ ነ ሻክዳ ብናናፐ ስኩዋ ነ ጊግስዳ ካታማ ምስልያስ ግዱን ዎዳ ታማን ፁጋ። ናምአን ስኩዋ ሄ ካታማ ዩሹዋ ኡባን ማሻን ቃንፀረ። ሄን ስኩዋ ጫርኮ ቦላ ላላ፤ ታ ኤንታ ማሻን የደና። 3 እያፐ ጉ ብናና ኤካዳ፥ ነ ማኡዋ ማጫራን ቃቻ። 4 ቃስ እያፐ ጉራ ኤካዳ፥ ታማን የጋዳ ፁጋ። ያን ዶምዳ ታማይ እስራኤለ አሳ ኡባ ጋካና” ያግስ። 5 ኡባ ሃርያ ጎዳይ፥ “ካዎተታ ኡባ እያ ዩሾን ኤሳዳ፥ እያ ግዶን ዎዳ፥ የሩሳላመ ካታማ ሀይሳ በአ። 6 ሽን እ ባ ኢታ ኦሱዋን ባ ዩሹዋን ደእያ ቢታታፐነ ካዎተታፐ አድ ታ ህግያነ ታ ዎጋ ቦላ ማካልስ። ቱማ እ ታ ህግያ መንስ፤ ታ ዎጋ ካልቤና” ያጌስ። 7 ሄሳ ግሾ፥ ኡባ ሃርያ ጎዳይ፥ “ነ ዩሹዋን ደእያ ካዎተታፐ አዳ መቶ መዳሳ፤ ታ ህግያ መንዳሳ፤ ታ ዎጋ ናጎና እፃዳሳ። ሀር አቶሽን፥ ነ ዩሹዋን ደእያ ካዎተታ ዎጋዳካ ደእቤከታ” ያጌስ። 8 ሄሳ ጋሶን፥ ኡባ ሃርያ ጎዳይ፥ “ነኖ፥ የሩሳላመ፥ ታኒ ነ ቦላ ደንዳና፤ ሀራ ካዎተት ኡባይ በእሽን፥ ነ ቦላ ታኒ ፕርዳ ኤሀና። 9 እፀትዳ ኤቃ ጎይኖ ኡባ ነ ኦዳ ግሾ፥ ሀይሳፈ ካሰ ኦቦና፥ ስንፈካ ዮና ፕርዳ ታ ነ ቦላ ኤሀና። 10 ሄሳ ጋሶን፥ ነ ግዶን አዋት ባንታ ናይታ ማና፤ ናይት ባንታ አዋታ ማና። ታ ህንተና ፕርዳና፤ አትዳይሳታ ጫርኮ ቦላ ላላና። 11 ሄሳ ግሾ፥ ኡባ ሃርያ ጎዳይ፥ ታኒ ታ ደኡዋን ጫቃይስ። ህንተ ኤቃታንነ እፀትዳ ኦሶታን ታ ኬ ቱንስዳ ግሾ፥ ታ ህንተና ቢታፈ ፕታዳ ይሳና። ታ ህንተዉ ቃትከ፤ ህንተና ማርከ። 12 ነ ግዶን ደእያ አሳፐ እስ ስኮይ ካታማ ግዶን ቦሻንነ ኮሻን ሀይቃና፤ ናምአን ስኮይ ማሻን ዉራና፤ ሄን ስኩዋ ጫርኮ ቦላ ላላዳ፥ ኤንታ ማሻን የደና” ያጌስ። 13 “ታ ይሎይ ኤንታ ቦላ ፖለታና፤ ታ ዎልቃማ ሀንቆይ እርፃና። ታኒ ታ ሀንቁዋ ኤንታ ቦላ ዉርስያ ዎደ ታኒ ቃናተን ኦድዳይሳ ኤንቲ ኤራና። 14 “ነ ዩሹዋን ደእያ ካዎተታ ግዶንነ ህንተ ማታራ አያ ኡባ ስንን ታ ህንተና ባይሳ ኦና፤ ህንተና ሚቻስ አጋና። 15 ታ ህንተና ታ ሀንቁዋን፥ ታ ይሉዋንነ፥ ቃይ ባይና ሴራን ፕርድያ ዎደ ህንተ ዩሹዋን ደእያ ካዎተታ ስንን ቀልቅሰስ፥ ጫሻስ፥ ህንተና በእዳ አስ ናገትያባነ ዳጋምያባ ኦና። 16 ዱክያ ዶንጌ ቶራዳ፥ ታ ህንተና ዎያነ ይስያ ኮሻ ህንተ ቦላ የዳና። ታኒ ዛራ ዛራ ኮሻ ህንተ ቦላ ኤሀና፤ ካ የሩሳላመ ገሎና መላ ተቃና። 17 ታኒ ኮሻነ ዶአ ህንተ ቦላ የዳና፤ ኤንቲ ህንተ ናይታ ይሳና፤ ቦሻነ ሸምፖ ዎ ህንተ ቦላ ኤሀና” ያጌስ ጎዳይ።