ህዝቄላ ማፃፋ 42

1 ሄሳፈ ጉየ፥ ሄ ኡራይ ታና ፑደሀ ባጋ ፐንግያራ ካረ ዳባባኮ ካለድ ፆሳ ኬ ግዶ ዳባባ ግምብያራ ኦይከትዳ ኬኮ ታና ኤህስ። 2 ሄ ኬ ዉላይ ፑደሀ ባጋ ስምስ። ሀ ኬይ ፄቱ ዋ አዱሰነ እሻታሙ ዋ ዳልጋ። 3 ግዶ ዳባባፐ ላታሙ ዋ ሃክድ፥ ቃስ ስን ባጋራ ካረ ዳባባን ደእያ ሂፀትዳ ሹቻፈ ስን ባጋራ ዎልኮ ስምዳ ሄ ደ ደእያ ፖቀይ ደኤስ። 4 ሄ ክፍለታ ፐንገት ፑደ ፄሎሶና። ኤንታፈ ስን ባጋራ ታሙ ዋ ዳልጋነ ፄቱ ዋ አዱሰ ግድዳ ግዶራ አያ ኦገይ ደኤስ። 5 ሄ ኬስ ቦላ ሄን ፖቀይ ናምአን ፖቅያፐ ፁሜስ፤ ናምአንይ ኮይሩዋፐ ፁሜስ። ሄስ ሀንዳይ ኤንቲ እሶይ እሱዋፈ ጉየ ሺቅድ ግምበትዳ ግሾሳ። 6 ሄ ፖቅያስ ቦላ ባጋ ክፍለት ግዶ ክፍለታፐነ ጋርሳ ባጋ ክፍለታፐ ፁምያ ግሾ፥ ካረ ዳባባን ደእያ ሀራ ኬታዳ ኤንታዉ ቱስ ባዋ። 7 ሄ ክፍለታፐ ስን ባጋራ እሻታሙ ዋ አዱቅያ ካረ ዳባባ ባጋራ ደእያ እስ ግምበይ ደኤስ። 8 ካረ ዳባባ ባጋራ ደእያ ክፍለታ አዱሳተይ እሻታሙ ዋ ግድሽን፥ ፆሳ ኬ ስንን ደእያ ክፍለታ አዱሳተይ ፄቱ ዋ። 9 ካረ ዳባባፐ ጋ ገልያ ዎደ ዶሎሀ ባጋራ ጋርሳ ክፍለታ ገልያ ፐንገይ ደኤስ። 10 ዱገሀ ባጋራ ካረ ዳባባ ካልድ ፆሳ ኬ ዳባባራ ኦይከትድ ኬፀትዳ ካረ ዳባባኮ ስምዳ ክፍለይ ደኤስ። 11 ሄ ኬ ክፍለታ ስንን ኦገይ ደኤስ። ሄ ኬይ ቆሞ ባጋን ደእያ ኬራ እስ ግና፤ አዱሳተይ፥ ዳልጋተይ፥ ክፍለትነ ፐንገት ኡባይ እስ ግና። 12 ድርሳ ግምበይ ዉርያ ዶሎሀ ባጋ ጋፃ ዶምድ ግምብያስ ዱገሀ ባጋራ ደእያ ክፍለታ ገልያ ፐንገይ ደኤስ። 13 ሄ ኡራይ ታኮ፥ “ፆሳ ኬ ዳባባ ስንን፥ ፑደሀ ባጋንነ ዱገሀ ባጋን ደእያ ክፍለት ካህነታሳ። ሄ ክፍለታ ግዶን ጎዳ ስንን ኦያ ካህነት ኡባፈ ጌሻ ካ ማና። ሄ ክፍለት ጌሽ ግድያ ግሾ፥ ኡባፈ ጌሻ እሞታ፥ ሄስካ ካ ያርሾ፥ ናጋራ ያርሾነ ናቆ ያርሾ ኤንቲ ያን ዎና። 14 ካህነት እስ ቶሆ ኡባፈ ጌሻ በሳ ገልዳፐ ጉየ፥ ፆሳስ ኦያ ዎደ ማእያ ማኦት ጌሽ ግድያ ግሾ፥ ባንታ ኦሶ ማኡዋ ላሞናሽን ካረ ዳባባ ከያናዉ ዳንዳኦኮና። ኤንቲ አሳኮ ካረ ከይሸ ካሰ ማእያ ሀራ ማኦታ ማእድ ከያናዉ ኮሼስ” ያግስ። 15 ሄ ኡራይ ፆሳ ኬ ጋ ባጋ ዋድ ዉርስዳፐ ጉየ ዶሎሀ ባጋ ድርሳ ፐንግያራ ታና ካረ ከስድ፥ ፆሳ ኬ ካረ ባጋ ዩሹዋ ኡባ ዋስ። 16 ዋ ፃምአ ኤክድ፥ ዶሎሀ ባጋ ዋን፥ እቻሹ ፄቱ ዋ ግድስ። 17 ፑደሀ ባጋ ሄ ፃምአን ዋን፥ እቻሹ ፄቱ ዋ ግድስ። 18 ዱገሀ ባጋ ዋን፥ እቻሹ ፄቱ ዋ ግድስ። 19 ዉሎሀ ባጋ ዋን፥ እቻሹ ፄቱ ዋ ግድስ። 20 ሄሳዳ ኦድ፥ እ ኦይዱ ባጋ ኡባ ዋስ። እያ ዩሹዋን እቻሹ ፄቱ ዋ አዱቅያ፥ ቃስ እቻሹ ፄቱ ዋ ዳልግያ ድርሳ ግምበይ ደኤስ። ሄ ግምበይ ጌሻ በሳነ ጮ በሳ ሻካናሳ።