ከሳ ማፃፋ 35

1 ሙሰይ እስራኤለ አሳ ኡባ ፄግድ፥ “ህንተ ኦና መላ ጎዳይ ኪትዳባይ ሀይሳ፤ 2 ሳምንታ ግዶን ኡሱፑን ጋላሳ ፃላላን ኦሶ ኦተ፤ ሽን ላፑን ጋላሳይ ህንተዉ ጌሻ ጋላስ፤ ጎዳስካ ዱማትዳ ሸምፖ ሳምባታ። ሄ ጋላሳን ኦሶ ኦያ ኦንካ ሀይቃናዉ በሴስ። 3 ሳምባታ ጋላስ ህንተ ሶን ታማ ኤፍተ” ያግስ። 4 ሙሰይ እስራኤለ አሳኮ፥ “ጎዳይ ሀይሳዳ ያግድ ህንተና ኪትስ፤ 5 ጎዳስ ህንተ ዎዛናይ እሞ ግያባ እማናዉ ኤህተ። ህንተ እማናዉ ኤህያባት ዎርቃ፥ ብራ፥ ናሰ ብራታ፥ 6 ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭናነ አልኦ ሊኖ፥ ዴሻ እክሰ፥ 7 ዞኦ ቃላመን የግ ከስዳ ዶርሳ እተ፥ ሎኦ ዶአ እተ፥ ሶቃላ ም፥ 8 ፆምፐስ ሻማሆ ዛይተ፥ ሹማተ ዛይተ፥ እያን የገትያ ሳዋነ እፃነ ሳዎ፥ 9 ኤፉድያስነ ትራን ማኤትያ ማኡዋስ ሀንያ ማርግደ ጌተትያ ሹቻነ ሀራ አሌቆታ ኤሆ። 10 “ህንተ ግዶን ደእያ ኩሸ ሂላንቾ ኡባይ ይድ፥ ጎዳይ ኪትዳይሳ ኡባ ኦ። 11 ጌሻ ዱንካንያ፥ እያ ጋ ካማነ ካረ ካማ፥ ካቆታ፥ ቱቀታ፥ ልዮታ፥ ቱሳታነ ኤንቲ ኤቅያ ቶሆታ፤ 12 ታቦትያነ እያ ቶክያ ካሶ ምታ፥ ናጋራ አቶተ ካማነ ታቦትያ ገንያ ማጋራጁዋ፤ 13 ፃርጴዛ፥ እያ ቶክያ ካሶ ምታነ፥ እያ ሚሸታ ኡባነ ጎዳ ስንን ዎያ ጌሻ ኡይ፤ 14 ፆምፐ ዎያ ኮጫ፥ እያ ሚሸታ፥ ፆምፕያነ ፆምፐ ዛይትያ፤ 15 እፃነ ጩይስያ ፃርጴዛነ እያ ቶክያ ካሶታ፥ ሹማተ ዛይትያነ ሳውያ እፃነ፥ ጌሻ ዱንካንያ ፐንገ ማጋራጁዋ፤ 16 ፁሳ ያርሾ በስነ እያ ናሰ ብራታ ዛርዛርያ፥ እያ ቶክያ ካሶታነ እያ ሚሸታ ኡባ፥ ናሰ ብራታፐ ኦሰትዳ ሜቻ ከርያነ እያ ቶሁዋ፤ 17 ዳባባ ጎዳ ገሸታ፥ ቱሳታነ ኤንታ ቶሆታ፥ ዳባባ ፐንገ ማጋራጁዋ፥ 18 ጌሻ ዱንካንያነ ዳባባ ዱንካንያ ቶለ ሸታነ ኤንታ ዎዶሮታ፤ 19 አሮንነ እያ ናይት ጌሻ በሳን ሀጋዝሸ ማአናዉ አሌቀትድ ኦሰትዳ ቦንቾ ማኦታ ኦ” ያግስ። 20 ሄሳፈ ጉየ፥ እስራኤለ አሳ ኡባይ ሙሰ ስንፈ ከይዶሶና። 21 አሳ ኡባይ ባ ዎዛናን እሞ እሞ ግዳባ ጌሻ ዱንካንያስ፥ እያ ግዶን ኦሰትያ ኦሶ ኡባስነ ቦንቾ ካህነ ማኦታስ ኮሽያባ ኡባ ኤህዶሶና። 22 እማናዉ ኮይዳ ማጭ አደ ኡባይ ዎርቃ አሌቆታ፥ ሲ ዎርቃታ፥ ምግዶታ፥ ቆ ዎርቃ ኤህድ፥ ጎዳስ እሞ ኦድ እምዶሶና። 23 ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭና፥ አልኦ ሊኖ፥ ዎይኮ ዴሻ እክሰ፥ ዎይኮ ዞኦ ቃላመን የግ ከስዳ ዶርሳ እተ ዎይኮ፥ ሎኦ ዶአ እተይ ደእያ አስ ኡባይ ኤህስ። 24 ብራ ዎይኮ ናሰ ብራታ እማናዉ ዳንዳእያ ኡባይ ባንታ እሞታ ጎዳስ እምዶሶና። ቃስ ሶቃላ ም ደእያ አስ ኡባይ ዱማ ዱማ ኦሱዋስ ኤህስ። 25 ኩሸ ሂላ ማጫሳ ኡባይ ባንታ ኩሸን ሱቅዳ ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭናነ አልኦ ሊኖ ኤህዶሶና። 26 ቃስካ እሞታ እማናዉ ኮይዳ ማጫሳ ኡባይ ዴሻ እተፐ ዶቀትዳ ዎዶሮ ኤህዶሶና። 27 ሀላቃት ኤፉድያስነ ትራን ማኤትያ ማኡዋስ ሀንያ ማርግደነ ሀራ ሎኦ ሹቻታ፥ 28 ቃስካ ኤንቲ እፃነን፥ ሹማተስነ ፆምፐስ ማድያ ሻማሆ ዛይተን የገትያ ሳዎ ኤህዶሶና። 29 እስራኤለ አሳ ኡባይ፥ ኦና መላ ጎዳይ ሙሰ ባጋራ ኪትዳ ኦሱዋስ ሀንያ እሞታታ ኡባ ባንታ ዶሳን ጎዳስ ኤህዶሶና። 30 ሙሰይ እስራኤለ አሳኮ ሀይሳዳ ያግስ፤ “ጎዳይ ይሁዳ ሼሻፐ ግድዳ ሁራ ናኣ ናኣ፥ ኡረ ናኣ፥ ባስልኤላ ዶርስ። 31 ጎዳይ እያ ባ አያናን፥ ሂላን፥ አኬካንነ ኦሶ ኡባ ኦያ ኤራን ኩንስ። 32 ሄስካ፥ ሂላን ኦና ኦሶታ ሀልችድ ዎርቃፈ፥ ብራፐነ ናሰ ብራታፐ ዱማ ዱማባ ከስድ ኦናሳ። 33 ሄሳዳካ፥ አልኦ ሹቹ ማስድ ጊግሶ፥ ም ማሰነ ሀራ ኦሶ ኡባ ኦና መላ ጭንጫተ እሚስ። 34 ቃስ እያስነ ዳነ ሼሽ ግድዳ አህሳማካ ናኣ ኤልያባስ፥ ባንታ ሂላ ሀራታ ታማርሳና መላ ኤራተ እሚስ 35 ኤንቲ ዱማ ዱማ ኦሶ ኦና መላ ኦሶ ሀልቾ ከሳና መላ፥ ካሎሰን፥ ኦቻ ቴራ ዳነይሳንነ ዞኦ ሱፈ ቃጭናን አልኦ ሊኖ አሌቅስድ፥ ዳድያ ሂላተ እሚስ። ጎዳይ ኤንታ፥ ኤራተን ኩንስ። ኤንቲ ኡባይ ዱማ ዱማ ኦሶን ሉፅዳ ሂላንቾ ግድዶሶና።