ዛረ ማፃፋ 4

1 ሀእካ እስራኤለ አሳዉ፥ ህንተ ደኦን ዳና መላነ ጎዳይ፥ ህንተ ማይዛታ ፆሳይ፥ ህንተዉ እምያ ቢታ ህንተ ላታና መላ ታ ህንተና ታማርስያ ዎጋነ ህግያ ስእተነ ኦተ። 2 ታ ህንተና ኪትያ፥ ጎዳ ህንተ ፆሳ ኪታ ናግተፐ አትሽን፥ እያ ቦላ አይኮካ ጉጆፍተ፤ እያፐ አይኮካ ፓጭሶፕተ። 3 ብኤል-ፋጎራ ዙማ ቦላ ጎዳይ ኦዳባ ህንተ፥ ህንተ አይፈን በእደታ። ጎዳይ፥ ህንተ ፆሳይ ብኤል-ፋጎራ ኤቃ ጎይንዳይሳታ ኡባ ህንተ ግዶፈ ይስስ። 4 ሽን ህንተ ጎዳስ፥ ህንተ ፆሳስ አማነትዳ ግሾ፥ ሀች ጋካናዉ ኡባይካ ደኦን ደኤታ። 5 ሄኮ፥ ህንተ ላታናዉ ገልያ ቢታን ኦና መላ ጎዳይ፥ ታ ፆሳይ ታና ኪትዳ ዎጋነ ህግያ ታ ህንተና ታማርሳስ። 6 ህንተ ኤንታ ናግተነ ኦተ። ህንተ ሄሳ ኦኮ፥ ህንተ አይ መላ ጭንጨኮ ሀራ አሳይ ህንተና በአና። ኤንቲ ሀ ዎጋባ ስእያ ዎደ፥ “ቱማካ ሀ ግታ ካዎተይ ጭንጫነ አኬካንቾ ካዎተ” ያጋና። 7 ኑኒ እያ ፄግያ ዎደ ኡባን ጎዳይ፥ ኑ ፆሳይ ኑስ ማታ ግደይሳዳ ፆሲ ማታ ግድዳ ሀራ አይ ዎልቃማ ካዎተ ደኢ? 8 ታኒ ሀች ህንተ ስንን ዎያ ሀ ህገ ኡባ መላ ፅሎ ግድዳ ዎግነ ህገይ ደእያ ሀራ አይ ግታ ካዎተ ደኢ? 9 ህዛ ነ ደኦ ላይ ኡባን ሀ ነ በእዳባ ኡባ ዶጎና መላነ ነ ዎዛናን ዎና መላ ናገታ። ነ ናይታነ ነ ናይታ ናይታ ታማርሳ። 10 ኮሬባ ዙማ ቦላ ጎዳ፥ ህንተ ፆሳ ስንን ህንተ ኤቅዳ ዎደ ጎዳይ ታኮ፥ “ታ ቃላ ኤንቲ ስእድ፥ ባንታ ላይ ኡባን ታዉ ያያና መላነ ባንታ ናይታ ሄሳ ታማርሳና መላ አሳ ታኮ ሺሻ” ግዳይሳ አኬክተ። 11 ሄ ዎደ ህንተ ሺቅድ ዙማ ፃጶን ኤቅደታ፤ ሳሎ ጋካናዉ ታም ኤፅስ። ሄ ዙማ ፃጶይ ሳካና ማንነ ሻራን ጎዘትስ። 12 ጎዳይ ታማ ግዶን ግድድ ህንተዉ ኦድስ። ህንተ እያ ግርሳ ስእደታፐ አትሽን፥ እያ ማላ በእቤከታ። 13 ህንተ ኦና መላ እ ህንተና ኪትዳ ባ ጫቁዋ ህንተዉ ኦድስ፤ ሄስካ ታሙ ኪታታ። እ ኤንታ ናምኡ ሎቸ ሹቻታ ቦላ ፃፍስ። 14 ህንተ ላታናዉ ብያ ቢታን ኦና መላ ዎጋነ ህግያ ህንተና ታማርሳና መላ ጎዳይ ታና ሄ ዎደ ኪትስ። 15 ጎዳይ ኮሬባ ዙማ ቦላ ታማ ግዶን ግድድ ህንተዉ ኦድዳ ጋላስ ህንተ እያ ማላ በእቦና ግሾ ሎይ ናገትተ። 16 አደ ዎይኮ ማጫ መን ኦሰትዳባ ግድን፥ 17 ሳአን ደእያ ዶአ ኡባ ሌምሶን ግድን፥ ሳሎራ ፓልያ ካፎ ኡባ ሌምሶን ግድን፥ 18 ሳአ ቦላ ኡሎራ ጎሸትያ መተ ሌምሶን ግድን፥ ሃ ግዶን ደእያ ሞሎ ሌምሶን ግድን፥ ህንተ ቱኖና መላ ህንተዉ ፆሰ ኦድ መፍተ። 19 ሳሎ ፑደ ፄልዳ፥ ጎዳይ ነ ፆሳይ ሳሎፐ ጋርሳን ደእያ ካዎተታስ እምዳ አዋ፥ አጌና፥ ፆልንቶታነ ሳሎ መተታ ኡባ በእዳ፥ ነ ኤንታዉ ጎይናዳ ባሎና መላ ናገታ። 20 ሽን ጎዳይ ህንተና ሀች ህንተ ሀንዳይሳዳ ባዉ ዱማትዳ አሰ ኦናዉ ብራታ ሴርስያ ጮጨ መላ ግድዳ ግብፀፈ ከስድ ኤህስ። 21 ህንተ ጋሶን ጎዳይ ታና ሀንቀትድ፥ ዮርዳኖሰ ፕኖና መላነ ጎዳይ ህንተ ፆሳይ፥ ላታ ኦድ ህንተዉ እምያ ሎኦ ቢታ ታኒ ገሎና መላ ጫቅስ። 22 ሄሳ ግሾ፥ ታኒ ዮርዳኖሰ ሻፋ ፕኖና ሀ ቢታን ሀይቃና፥ ሽን ህንተ ፕንድ ሄ ሎኦ ቢታ ላቴታ። 23 ህዛ ጎዳይ፥ ህንተ ፆሳይ ህንተራ ጫቅዳ ጫቁዋ ዶጎፕተ። ጎዳይ፥ ነ ፆሳይ ነና ኦፋ ግዳ አይ መን ኦሰትዳ ምስለ ነዉ ኤቃ ኦና መላ ናገታ። 24 ጎዳይ፥ ነ ፆሳይ ምያ ታማነ ቃናትያ ፆሲ። 25 ነ ናይታነ፥ ናይታ ናይታ የላዳ ሄ ቢታን አዱሳ ዎደ ደእያ ዎደ አይ መን ኦሰትዳ ምስለ ጎይናዳ ቱንኮ፥ ቃስ ጎዳ፥ ነ ፆሳ ሀንቀናዉ እያ ስንን ኢታባ ኦኮ፥ 26 ህንተ ዮርዳኖሰ ሻፋ ፕንድ ላታናዉ ብያ ቢታፈ እሶይካ አቶና ኤለ ያናዉ ደኤይሳስ፥ ታ ሀች ህንተ ቦላ ሳሎነ ሳአ ማርካያይስ። ህንተ ፖሎ ያናፐ አትሽን፥ ሄ ቢታን አዱሳ ዎደ ደኤከታ። 27 ጎዳይ ህንተና ሀራ አሳ ግዶን ላላና፤ ህንተና እ ላልያ ካዎተታ ግዶን ህንተ ታይቦይ ጉ ግዳና። 28 ያን ህንተ ምፈነ ሹቻፈ አሳ ኩሸን ጊግዳ በኦና፥ ስኦና፥ ሞናነ ስንጎና ፆሳታ ጎይናና። 29 ሽን ያን ደአሸ ነ ጎዳ፥ ነ ፆሳ ኮያና፤ ነ እያ ኩመ ዎዛናፐነ ኩመ ሸምፖፈ ኮይኮ ደማና። 30 ሄ መቶ ኡባ ግዶን ነ ኡንኤታዳ ደእያ ዎደ ዉርሰን ጎዳኮ፥ ነ ፆሳኮ ስማናነ እያ ቃላስ ኪተታና። 31 ጎዳይ፥ ነ ፆሳይ ማሮተን ኩምዳ ፆሰ ግድያ ግሾ፥ እ ነና አገና ዎይኮ ይሰና፤ ነ ማይዛታስ ጫቅዳ ጫቁዋ ዶገና። 32 ጎዳይ ቢታን አሰ መዳ ጋላሳፐ ዶምድ፥ ህንተፈ ካሰ አዳ ዎድያ አነ ፕልግተ፤ ሄሳ መላ ግታባይ ፖሎ ሀን ኤርያኮ ዎይኮ ስኤትድ ኤርያኮ ሳሉዋስ ሀ ጋፃፐ ያ ጋፃ ጋካናዉ አነ ኦይችተ። 33 ታማ ላጮ ግዶን ጎዳይ ሃሳይን ስእድ፥ ህንተ ዮና ደኦን ደኤይሳዳ ጎዳይ ኦድሽን ስእድ፥ ደኦን ደእዳ ሀራ አስ ደኢ? 34 ዎይኮ ጎዳይ፥ ህንተ ፆሳይ ህንተ ፄልሽን፥ ግብፀ ቢታን ህንተዉ ኦዳይሳዳ ፓጨን፥ ማላታን፥ ማላልስያባን፥ ኦላን፥ ዎልቃማ ኩሸንነ ምጨትዳ ቀሰን፥ ግታ ያሻን ሀራ ካዎተ ግዶ ገልድ፥ እስ ካዎተ ባዉ ኤካናዉ ቡተትዳ ሀራ ፆሲ ደኢ? 35 ጎዳይ፥ ፆሰ ግደይሳ ህንተ ኤራና መላ ሄሳ እ ህንተና በስስ፤ እያፐ አትሽን፥ ሀራ ፆሲ ባዋ። 36 እ ህንተና ታማርሳናዉ ኮይዳ ግሾ፥ ባ ግርሳ ሳሎፐ ስስስ። ቃስ ሀ ሳአን ባ ግታ ታማ ህንተና በስስ፤ ሄ ታማ ግዶፈ ህንተ እያ ቃላ ስእደታ። 37 እ ሄሳ ኦዳይ ህንተ አዋታ ሲቅድ፥ ኤንታፈ ጉየ የለትያ ኤንታ ሼሻታ ዶርዳ ግሾ፥ ህንተና ግብፀፈ ባ ግታ ዎልቃን ከስስ። 38 ሀች ህንተ በኤይሳዳ፥ ህንተና ገልሳናዉነ ኤንታ ቢታ ህንተዉ ላታ ኦድ እማናዉ፥ ህንተፈ ዳርያነ ዎልቃምያ ካዎተታ ህንተ ስንፈ የደድ ከስስ። 39 ህዛ፥ ቦላ ሳሎን ግድን፥ ጋርሳ ሳአን ግድን፥ ጎዳይ ፆሰ ግደይሳ ኤርተ፤ ህንተ ዎዛናን ዎተ፤ ሀራ ፆሲ ባዋ። 40 ሄሳ ግሾ፥ ህንተዉነ ህንተፈ ጉየ ህንተ ናይታስ ኡባባይ ሎኦ ግዳና መላ፥ ቃስ ጎዳይ ህንተ ፆሳይ ህንተዉ መርናዉ እምያ ቢታን ህንተ ላይይ አዱቃና መላ፥ ታኒ ሀች ህንተና ኪትያ ዎጋነ ህግያ ናግተ። 41 ሄሳፈ ጉየ፥ ሙሰይ ዮርዳኖሰ ሄፍንን ዶሎሀ ባጋራ ሄ ካታማታ ዱማይስ። 42 ሄሳ እ ዱማይዳይ ካሰ ሞርከተ ባይና ደእሽን፥ ኤሮና ደእሸ አሰ ዎዳ አስ ያ ባቃታና መላሳ። ሄ ኡራይ ሄ ካታማታፐ እሱዋኡ ባቃትድ ባ ሸምፑዋ አሻናዉ ዳንዳኤስ። 43 ሄሳ ግሾ፥ ሮቤላ ኮቻስ ጋን ደረ ቦላ ደእያ ቦሶራ ካታማ፥ ጋደ ኮቻስ ጋላዳን ደእያ ራሞታነ ምናሰ ኮቻስ ባሳነን ደእያ ጎላና ካታማታ ዱማይስ። 44 ሙሰይ እስራኤለ አሳስ እምዳ ጎዳ ህገይ ሀይሳ፤ 45 ሙሰይ ሀ ዎጋ፥ አዋጁዋነ ህግያ ኤንቲ ግብፀፈ ከይዳ ዎደ እሚስ። 46 ሄስ ኤንታዉ እመትዳይ ኤንቲ ቤት-ፓኦራ ካታማ ስንን ደእያ ዮርዳኖሰፐ ዶሎሀ ባጋራ ደእያ ዛንጋራን ደእሽና። ሄ በሳይ ሙሰይነ እስራኤለ አሳይ ግብፀፈ ከይዳ ዎደ ኦልድ ፆንዳ፥ ሀሰቦናን ኡትድ አሞረ ሃርያ ካዋ ስሆና ቢታ። 47 ሄ ዎደ ኤንቲ እያ ቢታነ ባሳነ ካዋ ኦገ ቢታ፥ ሄስካ ዮርዳኖሰፐ ዶሎሀ ባጋን ደእያ ናምኡ አሞረ ካዎታ ላትዶሶና። 48 ሄ ቢታይ አርኖና ዛንጋራን አሮኤራ ካታማፐ ብድ፥ ስርዮና ደርያ ጋኬስ፤ ስርዮና ጌተትድ ፄገትያ ደረይ አርሞና ዙማ። 49 ሄ ቢታይ ዮርዳኖሰፐ ዶሎሀ ባጋራ ደእያ አራባ ቢታ ኡባ ኤክድ ብድ፥ ፕስጋ ደርያ ፃጶን ደእያ ማፅነ አባ ጋኬስ።