ዛረ ማፃፋ 31

1 ሙሰይ ባ ኦዳ ዉርስዳፐ ጉየ እስራኤለ አሳኮ ሀይሳዳ ያግስ፤ 2 “ሀእ ታዉ ፄታነ ላታሙ ላይ ግድዳ ግሾ፥ ህዛፐ ጉየ ካለናዉ ዳንዳእከ። ጎዳይ ታኮ፥ ‘ነ ዮርዳኖሰ ፕናካ’ ያግስ። 3 ጎዳይ፥ ነ ፆሳይ ነ ስን አድ ነና ካለና። ያን ደእያ ካዎተታ እ ይሳና ግሾ፥ ኤንታ ቢታ ነ ላታና። ጎዳይ ግዳይሳዳ እያሱይ ህንተና ካለና። 4 ጎዳይ አሞረ ካዎታ ስሆናነ ኦገ ፆንድ፥ ኤንታ ቢታ ይስዳይሳዳ ህንተ ሞርከታ ሄሳዳ ኦና። 5 ጎዳይ ኤንታ ህንተዉ አድ እምን፥ ህንተ ኤንታ ቦላ ታ ህንተና ኪትዳይሳዳ ኦና። 6 ምንተ፤ ገንጭተ፤ ያዮፍተ። ኤንታ በእድ ዳጋሞፕተ። ጎዳይ ህንተ ፆሳይ ህንተራ ግዳና፤ እ ህንተና የገና፥ አገና” ያግስ። 7 ሙሰይ እያሱ ፄግድ፥ እስራኤለ አሳ ኡባ ስንን ሀይሳዳ ያግስ፤ “ምና፤ ገንጫ። ነ ሀ አሳራ እስፈ ጎዳይ ኤንታ ማይዛታስ እማና ግድ ጫቅዳ ቢታ ገላሳ፤ ሄ ቢታ ኤንታ ላትሳሳ። 8 ጎዳይ፥ እ ባ ሁጰን ኔራ ግድድ ነና ካለና። እ ነና የገና፤ አገና። ሄሳ ግሾ፥ ያዮፋ፤ ኡፋይስ ቃንፆፋ” ያግስ። 9 ሙሰይ ሀ ህግያ ፃፍድ፥ ጎዳ ቃላ ጫቆ ታቦትያ ቶክያ ካህነ ግድዳ ሌወ ናይታስነ እስራኤለ ጭማታስ እሚስ። 10 ሙሰይ ኤንታኮ፥ “አጮ ኡባይ አቶ ጌተትያ ላፑን ላይ ዉርሰን፥ ሻቃራ ባለይ ቦንቸትያ ጋላስ፥ ሀ ህግያ ቁ ኦድ ናባብተ። 11 ጎዳ፥ ህንተ ፆሳ ስንን፥ እ ዶርዳ በሳን፥ እያ ጎይናናዉ እስራኤለ አሳ ኡባይ ሺቅያ ዎደ ኤንታዉ ናባብተ። 12 ኤንቲ ኡባይ ስእድ፥ ጎዳ፥ ህንተ ፆሳስ ያሽ ታማራና መላ ሀ ህገ ቃላ ኡባ ናጋና መላ አደታ፥ ማጫሳታ፥ ናይታነ ህንተ ቢታን ደእያ ሀራ ቢታ አሳ እስፈ ሺሽተ። 13 ሀ ህገ ቃላ ኤሮና ኤንታ ናይትካ ዮርዳኖሰ ፕንድ፥ ህንተ ላታናዉ ብያ ቢታን፥ ህንተ ደእያ ላይ ኡባን ሀ ህግያ ስኦ፤ ጎዳስ፥ ህንተ ፆሳስ፥ ያሽ ታማሮ” ያግድ ኪትስ። 14 ጎዳይ ሙሰኮ፥ “ነ ሀይቅያ ዎደይ ማትስ። እ ካለና ዎጋ ታ እያዉ እማና መላ እያሱ ፄጋዳ፥ እያራ እስፈ ዱንካንያ ፐንገ ሺቅተ” ያግን፥ ሙሰይነ እያሱይ ዱንካንያ ፐንግያኮ ሺቅዶሶና። 15 ጎዳይ ዱንካንያ ፐንገን ኤቅዳ ሻራ ቱሳን ኤንታዉ ቆንጭስ። 16 ጎዳይ ሙሰኮ፥ “ኔኒ ማታ ዎደ ሀይቃዳ ነ አዋታን ጋሄታሳ። ኔፐ ጉየ፥ ሀ አሳይ ታዉ አማነቶናይሳታ ግዳና፤ ታ ኤንታራ ገልዳ ጫቁዋ መንና። ኤንቲ ታና አግድ፥ ባንታ ላትያ ቢታን ደእያ ኤቃታ ካላና። 17 ሄስ ሀንያ ዎደ ታ ሀንቆይ ኤንታ ቦላ ኤፃና፤ ታ ኤንታ አጋጋና፤ ታ ሶምኡዋ ኤንታፈ ሀራ ሶ ዛራና። ኤንቲ ያና፤ ኢታ መቶይነ ዮይ ኤንታ ቦላ ያና። ሄ ዎደ ኤንቲ፥ ‘ቱማ ሀ መቶይ ኑና ጋክዳይ ኑ ፆሳይ ኑ ግዶን ባይና ግሾ ግደኔ?’ ያጋና። 18 ሀራ ፆሳታ ጎይንድ፥ ኤንቲ ኦዳ ኢታ ኦሱዋ ግሾ፥ ታ ሄ ጋላስ ታ ሶምኡዋ ኤንታፈ ሀራ ሶ ዛራና። 19 “ሀእ ሀ ማዝሙርያ ፃፋዳ፥ እስራኤለ አሳ ኡባ ታማርሳ። ሀ ማዝሙረይ ታዉ እስራኤለ አሳ ቦላ ማርካ ግዳና መላ ኤንታ የፅሳ። 20 ኤንታ ማይዛታስ ገልዳ ቃላዳ፥ ማነ ኤስ ጎግያ ቢታ ታ ኤንታ ገልሳ ስምን፥ ኤንቲ ም ካልድ ጎብዳፐ ጉየ፥ ሀራ ፆሳታ ጎይንድ፥ ታና ካና፤ ታ ጫቁዋ መንና። 21 ዳሮ መቶይነ ዮይ ኤንታ ቦላ ጋክዳ ዎደ ሀ ማዝሙረይ ኤንታ ናይታፐ ባለቶና ግሾ፥ ኤንታ ቦላ ማርካ ግዳና። ታኒ ጫቅዳ ቢታ ኤንታ ቡሮ ገልሶና ደእሽን፥ ሃራ ኤንቲ ቆፕያ ቆፋ ታኒ ኤራይስ” ያግስ። 22 ሙሰይ ሄ ጋላስ ማዝሙርያ ፃፍድ፥ እስራኤለ አሳ ታማርስስ። 23 ሄሳፈ ጉየ፥ ጎዳይ ናወ ናኣ እያሱኮ፥ “ምና፥ ገንጫ፤ ታ ኤንታዉ እማናዉ ቃላ ገልዳ ቢታ እስራኤለ አሳ ኤፋዳ ገልሳ። ታ ኔራ ግዳና” ያግስ። 24 ሙሰይ ሀ ህገታ ኮይሮፐ ዉርሰ ጋካናዉ ፃፍድ ዉርስዳፐ ጉየ፥ 25 ጎዳ፥ ቃላ ጫቆ ታቦትያ ቶክያ ሌወታ ሀይሳዳ ያግድ ኪትስ፤ 26 “ጎዳ ህገይ ፃፈትዳ ሀ ማፃፋ ኤፍድ፥ ጎዳ፥ ህንተ ፆሳ ቃላ ጫቆ ታቦትያ ማታን ዎተ። ያን እ ህንተ ቦላ ማርካ ግዳና። 27 ህንተ አይ መላ ጌለኮነ ዎዛና ኢተኮ ታ ኤራይስ። ቱማ፥ ታ ህንተራ ደእዳ ላይ ኡባን ህንተ ጎዳስ ማካላታ፥ ሽን ታ ሀይቅን፥ ኡባ ዋንድ ማካላንደቲ? 28 ሄሳ ግሾ፥ ሀይሳ ኡባ ታ ኤንታዉ ኦዳናዉነ ሳሎነ ሳአ ታ ኤንታ ቦላ ማርካያናዉ ህንተ ኮቻ ሀላቃታነ ደርያ ካለያ አሳ ኡባ ታዉ ሺሽተ። 29 ታ ሀይቅዳፐ ጉየ፥ ህንተ ቱማ ኢታ አሰ ግዳናይሳነ ታኒ ህንተና ታማርስዳ ኪታፐ ሀራ ሶ ስማናይሳ ታኒ ኤራይስ። ህንተ እያ ስንን ኢታባ ኦድ፥ ጎዳ ይሎይያ ግሾ፥ ዎደፐ እ ህንተ ቦላ ኢታ ጋዶ ኤሀና” ያግስ። 30 ሄሳፈ ጉየ፥ ሙሰይ ሀ ማዝሙረ ቃላታ ዉራና ጋካናዉ ሺቅዳ እስራኤለ ማባራ ኡባ ናባብድ ስስስ።