አሞፀ 1

1 ኦዝያን ይሁዳ ቢታን፥ እዮኣሳ ናአይ እዮርባም እስራኤለ ቢታን ካዎትዳ ላይን ታቆሀ ቢታን መሄ ሄመይሳታፐ እሶይ፥ አሞፀይ፥ ቢት ቃፃናፐ ናምኡ ላይፈ ስን እስራኤለባ ኦድዳ ትንብተይ ሀይሳ፦ 2 እ፥ “ጎዳይ ፅዮነ ዙማ ቦላ ጉዴስ፤ የሩሳላመ ካታማን ደቼስ። መሄ ሄምያ በሳት መሎሶና፤ ቃርመሎሳ ዙማ ቦላ ደእያ እርፃይ ሹሌስ” ያግስ። 3 ጎዳይ፥ “ዳማስቆ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ጋላዳ ቢታ አሳ ብራታ አች ደእያ ጋረን ጎንዶርስድ የዶሶና። 4 ሄሳ ግሾ፥ ታኒ ካዋ ሀዛኤላ ኬን ታማ የዳና፤ ሄ ታማይ ካዋ በን-ሀዳዳ ሚፃታ ማና። 5 ታኒ ዳማስቆ ካታማ ፐንግያ መንና፤ አዌና ዛንጋራን ደእያ አሳ የደናነ ካዎታ ፃምኣ ኦይክዳይሳታ ቤት-ኤደናፐ ይሳና፤ ሶረ አሳይ ደኤትድ፥ ቂራ ባና” ያጌስ። 6 ጎዳይ፥ “ጋዛ ካታማ አሳይ ዛር ዛር ኦዳ ናጋራ ግሾ፥ ታ ኤንታ ሴሮና አግከ። ኤንቲ ቢታን ደእያ አሳ ኡባ ድእድ፥ ኤዶመ ቢታ አሳስ ባይዝዶሶና። 7 ሄሳ ግሾ፥ ታኒ ጋዛ ካታማ ድርሳን ታማ የዳና፤ ሄ ታማይ ካታማ ሚፃታ ማና። 8 አሽዶዳን ደእያ አሳ ታኒ የደናነ ካዎታ ፃምኣ ኦይክዳይሳታ አስቃሎናፐ ይሳና። ኤቅሮና ካታማን ደእያ አሳ ሴራና፤ ፍልስፄመ አሳፐ አትዳይሳት ሀይቃና። ታኒ ኡባ ሃርያ ጎዳይ ሄሳ ኦዳይስ” ያጌስ። 9 ጎዳይ፥ “ፅሮሳ ካታማ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ጫቅዳ እሻተ ጫቁዋ መንድ፥ ደኤትዳ አሳ ኡባ ኤዶመ አሳስ ባይዝዶሶና። 10 ሄሳ ግሾ፥ ታኒ ፅሮሳ ካታማ ድርሳን ታማ የዳና፤ ሄ ታማይ ካታማ ሚፃታ ማና” ያጌስ። 11 ጎዳይ፥ “ኤዶመ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ እሻ እስራኤለ ማሻን የደዶሶና፤ ኤንቲ ኤንታዉ ቃትቦኮና፤ ኤንታ ይሎይ መርናዉ እርፀና። 12 ሄሳ ግሾ፥ ታኒ ተማና ካታማ ቦላ ታማ የድን፥ ሄ ታማይ ቦሶራ ካታማ ሚፃታ ማና” ያጌስ። 13 ጎዳይ፥ “አሞነ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ ዛዋ አሳናዉ ጋላዳ ቢታን ደእያ ቃንትዳ ማጫሳታ ኡሉዋ ዳክዶሶና። 14 ሄሳ ግሾ፥ ታኒ ራባ ካታማ ድርሳን ታማ የዳና፤ ሄ ታማይ ካታማ ሚፃታ ማና። ሄሳፈ ጉየ፥ ኦላ ጋላስ ዋሶይ ዳራና፤ ኦላንቾት ጎተዳ ዎልቃማና። 15 ኤንታ ካዎይነ እያራ ኦያ ሀላቃት ኡባይ ደኤትድ ባና” ያጌስ።