ሀዋረታ ኦሶ 14

1 ካሰይሳዳካ፥ ጳዉሎስነ ባርናባስ እቆንዮነን አይሁደታ ዎሳ ኬ ገልድ ዳሮ አይሁደትነ አይሁደ ግዶናይሳት አማናና ጋካናዉ ቃላ ኦድዶሶና። 2 ሽን አማንቦና አይሁደት፥ አይሁደ ግዶናይሳታ ዎዛና ላምድ እሻታ ቦላ ደንዶሶና። 3 ሀዋረት ያን ዳሮ ዎደ ጋምእዶሶና። ኤንቲ ያዮና ጎዳባ ኦድዶሶና። ጎዳይ ማላታታነ ኦራባ ኤንቲ ኦና መላ ኤንታዉ ማታ እምድ፥ እ ባ አ ኬሀተ ቃላይ ቱማ ግደይሳ ቆንጭስስ። 4 ሽን ሄ ካታማ አሳይ ሻከትድ፥ ባጋይ አይሁደታራ ባጋይ ቃስ ሀዋረታራ ግድስ። 5 አይሁደ ግዶናይሳትነ አይሁደት ባንታ ሀላቃታራ እስፈ ግድድ ሀዋረታ ቆሀናዉነ ሹቻን ጫዳናዉ ኮይዶሶና። 6 ሀዋረት ሄሳ ኤርድ፥ ልስፅራነ ዳርበ ጌተትያ ልቃኦና ካታማታነ ኤንታ ሄራን ደእያ ቢታ ባቃትዶሶና። 7 ያን ዎንገላ ኦድዶሶና። 8 የለቶሳፐ ዶምድ ናምኡ ቶሆይ ዎቢን ሄመት ኤሮና እስ አደይ ልስፅራን ደኤስ። 9 ሄ አደይ ጳዉሎስ ኦድሽን ኡትድ ስኤስ። ጳዉሎስ እያ ትሽ ኦ ፄልያ ዎደ ፓፃናዉ እያዉ አማኖይ ደኤይሳ በእድ፥ 10 ባ ቃላ ቁ ኦድ፥ “ስት ጋዳ ነ ቶሁዋን ኤቃ” ያግስ። ያትን፥ ጉፕ ደንድ ኤቅድ ሄመ ዶምስ። 11 ጳዉሎስ ኦዳይሳ አሳይ በእድ ባንታ ቃላ ቁ ኦድ ልቃኦና ዶናን፥ “ፆሳት አሰ ዳንድ ኑኮ ዎዶሶና” ያግዶሶና። 12 ባርናባሳ፥ “ድያ” ግድ፥ ጳዉሎስ ኦዳን ዋናትያ ግሾ፥ እያ፥ “ሄርመና” ግድ ሱንዶሶና። 13 ካታማፐ ጋፃን ደእያ ኤቃ ድያ ኬ ካህነይነ አሳይ ኮርማታነ አሌቆ ጪሻታ ሀዋረታስ ያርሻናዉ ኮይድ ካታማ ፐንገ ኤህዶሶና። 14 ሽን ባርናባስነ ጳዉሎስ ሄሳ ስእዳ ዎደ ኤንቲ ኦናዉ ቆፕዳይሳ እፅድ፥ ባንታ ማኡዋ ፔዶሶና። አሳ ግዶ ዎፅ ገልድ፥ 15 ባንታ ቃላ ቁ ኦድ፥ “አሳዉ፥ ሀይሳ አይስ ኦቲ? ኑካ ህንተ መላ አሰ። ሀ ፓናባፐ ሳሎነ ሳአ፥ አባነ ኤንታ ግዶን ደእያ ኡባባ መዳ ደኦ ፆሳኮ ህንተ ስማና መላ ህንተዉ ኑኒ ዎንገላ ኦዶስ። 16 እ፥ በን አሳይ ባንታ ኦገ ባና መላ የድ አግስ። 17 ሽን እራ ሳሉዋፐ ቡክስስ፥ ካካ ዎድያን ዎድያን እሚስ፥ ካ እምድ ህንተና ዳሮ ኡፋይስስ፥ ያትድ ህንተዉ ሎኦባ ኦድ ባዉ ማርካ ይስቤና” ያግዶሶና። 18 ሀዋረት ሄሳ ግድ፥ ባንታዉ አሳይ ያርሾና መላ ዋይድ ድግዶሶና። 19 አንፆከፐነ እቆንዮነፐ ይዳ አይሁደት፥ አሳ ባንታ ባጋ ዛሪድ ሹቻን ጳዉሎሳ ጫድዶሶና። እ ሀይቅዳባ ዳንን ካታማፐ ጋፃ ጎች ኤፍድ የግዶሶና። 20 ሽን አማነይሳት ይድ፥ እያ ዩሾን ኤቅዳሽን እ ደንድድ ካታማ ገልስ። ዎንተ ጋላስ ባርናባሳራ እስፈ ዳርበ ብስ። 21 ኤንቲ ዳርበ ካታማን ዎንገላ ኦድድ ዳሮታ አማንዳፐ ጉየ ልስፅራ፥ እቆንዮነነ ጵስደን ደእያ አንፆከ ስምዶሶና። 22 ያን አማነይሳታ ምንሸነ ኤንቲ አማኖን ምንድ ደአና መላ ዞርሸ፥ “ፆሳ ካዎተ ገላናዉ ኑኒ ዳሮ ዋየ ኤካናዉ በሴስ” ያግድ ታማርስዶሶና። 23 ቃስ ዎሳ ኬታስ ሁጰን ሁጰን ጭማታ ዶርዶሶና። ፆምዳፐነ ዎስዳፐ ጉየ ኤንቲ አማንዳ ጎዳስ ኤንታ ሀዳራ እምዶሶና። 24 ጵስደ ቢታ ካን አድ ጵንፍለ ብዶሶና። 25 ጰርገን ቃላ ኦድዳፐ ጉየ አፃለ ብዶሶና። 26 ባንታ ኦሱዋ ፖልዳፐ ጉየ፥ አፃለፕ ፆሳ አ ኬሀተስ ኤንታ ሀዳራ እምዳ አንፆከ ማርካበራ ጉየ ስምዶሶና። 27 አንፆከ ጋክዳ ዎደ ዎሳ ኬ አሳ ሺሽድ ፆሳይ ኤንታራ ኦዳ ኦሱዋ ኡባነ አይሁደ ግዶና አሳይ አማናና መላ ኤንታዉ ዋት ፐንገ ዶይዳኮ ኦድዶሶና። 28 ሄሳን አማነይሳታራ ዳሮ ዎደ ጋምእዶሶና።