2 ፅሞትዮሳ ኪታ 2

1 ህዛ፥ ታ ናአዉ፥ ክርስቶስ የሱሳን ደእያ ማሮተን ምና። 2 ዳሮ ማርካታ ስንን ታኒ ነና ታማርስዳ ትምርትያ፥ ሀራታ ታማርሳናዉ ዳንዳእያ አማነትዳ አሳስ ሀዳራ እማ። 3 የሱስ ክርስቶሳስ አማንያ ዎታዳረ ግዳዳ ታራ መቶ ኤካ። 4 ኦላ ዎታዳረይ ባ ቶራ ሞጮና ኡፋይሳናዉ ጊገቴስፐ አትሽን፥ ሀራ ኦሶን ባና ፔሸና። 5 ሄሳዳካ፥ ጋደ ዎፅያ ኦንካ በሲያ ኦገራ ጋደቶና እፅኮ ዎይቶ ኤከና። 6 ጎሻን ዳቡርያ ጎሻንቾይ ባ ዳቡራ አይፍያፐ ምያ ኮይሮ አስ ግዳናዉ በሴስ። 7 ነ አኬካና መላ ጎዳይ ነና ማዳና ግሾ፥ ታ ነዉ ኦድዳባ ነ ዎዛናን ናጋ። 8 ታኒ ማርካትያ ዎንገላ መላ ሀይቆፐ ደንድዳ፥ ዳዊታ ኮቸ ግድዳ የሱስ ክርስቶሳ ቆፓ። 9 ታኒ ዎንገላ ኦድያ ግሾ፥ ኢታባ ኦዳ አሳዳ፥ ቃሸታዳ መቶ ኤካይስ። ሽን ፆሳ ቃላይ ቃሸተና። 10 ሄሳ ግሾ፥ ፆሳይ ዶርዳ አሳት ክርስቶስ የሱሳን ደእያ አቶተ መርና ቦንቹዋራ ኤካና መላ ኤንታ ግሾ ኡባባን ዋየታይስ። 11 ሀይሳዳ ግያ ቱማ ቃል ደኤስ፤ “ኑኒ እያራ ሀይቅዳባ ግድኮ፥ እያራ እስፈ ደአና። 12 ኑኒ ገንጭኮ፥ እያራ እስፈ ካዎታና። ኑኒ እያ ካድኮ፥ እ ኑና ካዳና። 13 ኑኒ አማነቶና እፅኮ፥ እ አማነትዳይሳ ግድድ ዳና። አይስ ጊኮ፥ እ ባና ካዳናዉ ዳንዳኤና” ያጌስ። 14 ኔኒ ኤንታ ሀይሳ አኬክሳ፤ ኤንቲ ቃላታ ጋሶን ፓላሞና መላ፥ ጎዳ ስንን ኤንታ ዞራ። ሄስ ስኤይሳታ ይሰስፐ አትሽን፥ አይኮካ ማደና። 15 ኔኒ ቱማ ቃላ ሱረተን ታማርሰይሳነ ዬላዮና ኦሳንቾ ግዳዳ፥ ፆሳይ ናሽያ አሳዳ፥ ነናተ እያዉ እማናዉ ምና። 16 ሽን ሀ አላምያስ እንጀትያ ጎኦና ኦዳፐ ባቃታ። ሄሳ መላ ኦዳይ አሰ ፆሳፈ ሃሴስ። 17 ሄሳ መላ ኦዳይ አሳተ ምድግያ ፓፆና ዎይዛዝረ ማዱን መላ። ሄሳ መላ ኦዳ ኦደተይሳታ ግዶፈ ሄመነዮስነ ፍልፆስ ደኦሶና። 18 ሀ አሳት ቱማ ኦግያ አግድ፥ “ሀይቅዳ አሳይ ሀይቆፐ በን ደንድዶሶና” ያግድ ጉ አሳታ አማኑዋ ይስዶሶና። 19 ግዶሽን፥ ፆሳይ ምኖ ዛላ ሂፅዳ ግሾ ቃፃናዉ ዳንዳኤና። እያ ቦላ፥ “ጎዳይ ባ አሳ ኤሬስ። ጎዳ ሱን ፄግያ ኦንካ ኢታ ኦሶፐ ሃኮ” ግያ ቃላይ ፃፈትስ። 20 እስ ግታ ኬን ዎርቃፈ ዎይኮ ብራፐ ኦሰትዳ ሚሸታ ፃላላ ግዶናሽን፥ ምፈ ዎይኮ ኡርቃፈ ኦሰትዳ ሚሸትካ ደኦሶና። ሄሳታፐ ባጋት ቦንቾ ኦሶስ፥ ቃስ ባጋት ቶሸትያ ኦሶስ ፔኦሶና። 21 ሄሳ ግሾ፥ ኦንካ ኢታ ኡባ አግኮነ ባና ጌሽኮ፥ ቦንቾ ኦሶ ኦያ ሚሸ ግዳና። ኤንታ ደኦይ ጌሽነ ጎዳ ኡፋይስያባ፥ ቃስ ኤንቲ ሎኦ ኦሶ ኡባ ኦናዉ ዳንዳኤይሳታ ግዳና። 22 ናአተ ኢታ አሙዋፐ ባቃታ። ጌሻ ዎዛናን ጎዳ ፄግያ አሳታራ እስፈ፥ ፅሎተ፥ አማኑዋ፥ ሲቆነ ሳሮተ ካላ። 23 ሽን ኦሽ መይሳ ኤራዳ ኤያተነ ሀዳ ግድዳ ፓላማፐ ሃካ። 24 ጎዳ ኦሳንቾይ አሳ ኡባስ ኬሀ፥ ሎኦ ታማርሰይሳነ ዳንዳአንቾ ግዳናዉ በሴስፐ አትሽን፥ ኦየታናዉ በሰና። 25 እ ባራ ኤቀተይሳታ አሽከተን ሴረይሳ ግዳናዉ በሴስ። ኤንቲ ባንታ ናጋራፐ ስሚድ ቱማ ኤራናዳ ፆሳይ ኦነኮ ኦን ኤር። 26 ኤንቲ ባንታ ዎዛናኮ ስሚድ ባ ሸንያ ኦና መላ ኤንታ ኦይክዳ ፃላሄ ፅህያፐ ከስ ኤካና።