2 ካዎታ ማፃፋ 23

1 ካዎይ እዮስያስ ይሁዳ ጭማታነ የሩሳላመ ጭማታ ኡባ ሺሽስ። 2 ካዎይ ፑደ ፆሳ ኬ ከይስ፤ ይሁዳ አሳይ፥ የሩሳላመን ደእያ አሳይ፥ ካህነትነ ናበት፥ ጉፈ ግታ ጋካናዉ ኡባይ እያራ እስፈ ፑደ ፆሳ ኬ ከይዶሶና። ፆሳ ኬፈ በንትዳ ጫቆ ቃላ ማፃፋ ኡባ ካዎይ ኤንታዉ ናባብስ። 3 ካዎይ ቱሳ ማታን ኤቅድ፥ ኤንቲ ጎዳ ኦግያን ሄመታናነ፥ እያ ህግያ፥ እያ ዎጋነ እያ ኪታ ኩመ ዎዛናንነ ኩመ ቆፋን ናጋናዉ፥ ቃስ ሀ ማፃፋን ፃፈትዳ ጫቁዋ ኦናዉ ጎዳ ስንን ጫቅስ። አሳ ኡባይካ እያራ ጫቅዶሶና። 4 ካዎይ ካህነ ሀላቃ ካልቀ፥ እያፐ ጋርሳራ ደእያ ካህነታነ ፐንገ ናገይሳታ ባኣለ፥ አሼራነ ሳሎ ፆልንቶታ ጎይናናዉ ጊግስዳ ሚሸታ ኡባ ፆሳ ኬፈ ከሳናዳ ኪትስ። ካዎይ ሄሳታ የሩሳላመፐ ጋፃ ከስድ፥ ቀድሮና ዛንጋራን ፁግድ፥ ብዱዋ ቤተለ ኤፍስ። 5 ይሁዳ ካታማታንነ የሩሳላመ ዩሹዋን ደእያ ቃ ጎይኖ በሳ ኡባን እፃነ ጩይሳናዉ ይሁዳ ካዎት ሱንዳ ኤቃታ ካህነታ ኡባ ኦሶፐ ከስስ። ባኣለስ፥ አዋስ፥ አጌናስ፥ ፆልንቶታስነ ሳሎን ደእያ ሀራ መተታስ እፃነ ጩይሰይሳታ ኡባ ድግስ። 6 አሼራ ፆሰ ምስልያ ፆሳ ኬፈ ከስድ፥ የሩሳላመ ካታማፐ ጋፃ ኤፍድ፥ ቀድሮና ዛንጋራ ኤፍድ፥ ያን ፁግስ። ፁገትዳይስ ጋጭድ፥ ለ ከስስ፤ ባና ደርያ ዱፎ ቦላ ላልስ። 7 ፆሳ ኬ ግዶን ጎይኖ ዎጋ ኦድ፥ አደይ አደራ ላይማትያ ኬታ ላልስ፤ ሄ ኬታን ማጫሳት አሼራ ኤቄስ ገሸ ሱቆሶና። 8 እዮስያስ ካህነታ ኡባ ይሁዳ ካታማታፐ ኤህድ፥ ካሰ ካህነት እፃነ ጩይስያ ቃ ጎይኖ በሳታ፥ ግብአፐ ብድ በርሳበ ጋካናዉ ደኤይሳታ ቱንስስ። ካታማ ሃርያ እያሱ ፐንግያፈ ሀድርሳ ባጋራ ደእያ ቃ ጎይኖ በሳካ ላልስ። 9 ቃ ጎይኖ በሳ ካህነት የሩሳላመን ጎዳ ያርሾ በሳ ፑደ ዮኮና፤ ሽን ኤንቲ ሀራ ካህነታራ እስፈ እርሾይ ገልቦና ዳቦ ሞሶና። 10 ካዎይ እዮስያስ ሄኖማ ዛንጋራን ደእያ ቶፈታ ያርሾ በሳ ቱንስስ። ሞሎካ ፆሳስ እስ አስካ ባ አደ ናኣ ዎይካ ማጫ ናአ ታማ ግዶራ አና መላ ድግስ። 11 ይሁዳ ካዎት ፆሳ ኬ ገልያ ፐንግያን አዋስ ዱማይድ ዎዳ ፓራታ ድግስ። አዋ ፓራት ናታን-መለካ ሀላቃ ክፍልያ ማታን ደእያ ዳባባን ደኦሶና። ሄሳፈ ጉየ፥ አዋስ ዱማይድ ዎዳ ፓራ ጋረታ እዮስያስ ታማን ፁግስ። 12 አካዛ ኬ ፖቅያ ቦላ ይሁዳ ካዎት ጊግስዳ ያርሾ በሳታን ምናሰይ ፆሳ ኬን ደእያ ናምኡ ዳባባታ ግዶን ጊግስዳ ያርሾ በሳታ ካዎይ እዮስያስ ላልስ። ኤንታ ሄ በሳፈ ድግድ ትንቸረድ፥ ቀድሮና ዛንጋራን ሆልስ። 13 ካዎይ የሩሳላመ ካታማፐ ዶሎሀ ባጋራ፥ ቱናተ ዙማፐ ዱገሀ ባጋን ደእያ ቃ ጎይኖ በሳታ ቱንስስ። ሄ ቃ በሳት እስራኤለ ካዎይ ሶሎሞነይ፥ ቱና ፆሳታ፥ ስዶና ፆሰ አስታሮቶ፥ ሞአበ ፆሳ ካሞሻነ አሞነ ፆሳ ሞሎካ ጎይናናዉ ጊግስዳ ቃ በሳታ። 14 ካዎይ እዮስያስ ጎይኖ ሹቻ ቱሳታካ መንረድ፥ አሼራ ፆሰ ምስለታካ ቃንፀረስ። ኤንቲ ኤቅዳ በሳን ሀይቅዳ አሳ መቀ ኩንስ። 15 እስራኤለ አሳ፥ ናጋራ ኦስስዳ ናባፃ ናአይ እዮርባም ቤተለን ቃ በሳን ጊግስዳ ያርሾ በሳ ካዎይ እዮስያስ ላልስ። ላልድ ሄ ያርሾ በሳ ሹቻታካ መንረድ፥ ለ ከስስ፤ አሼር ምስልያካ ፁግስ። 16 ሄሳፈ ጉየ፥ እዮስያስ ዩሹዋ ፄልድ፥ ዙማ ላንቀን ደእያ ዱፎታ በእስ፤ መቀታ ዱፎታፐ ከስድ፥ ያርሾ በሳ ቦላ ዎድ፥ ታማን ፁግስ። ያትድ ያርሾ በሳ ቱንስስ። ሄስ ሀንዳይ ፆሳ አስ ካሰ አዋጅዳ ጎዳ ቃላ ማራና። 17 ሄሳፈ ጉየ ካዎይ፥ “ሀ በንተይስ ኦደ ዱፎ?” ያግድ ኦይችስ። ቤተለ አሳይ፥ “ይሁዳፐ ይድ፥ ቤተለ ያርሾ በሳ ቦላ ሀእ ኔኒ ኦዳባይ ፖለታናይሳ ካሰትድ ኦድዳ ናብያ ዱፎ” ያግዶሶና። 18 ካዎይ፥ “ደኦ ጊተ፤ ኦንካ እያ መቀ ሀይሳፈ ቃፎ” ያግስ። ሄሳ ግሾ፥ ሳማረፐ ይዳ ናበት አድያ መቀራ እስፈ እያ መቀ ቦቾና አጋግዶሶና። 19 እስራኤለ ካዎት ሳማረ ካታማታን ኦስስድ፥ ጎዳ ሀንቀዳ፥ ቃ ጎይኖ በሳታ እዮስያስ ድግስ፤ ቤተለን ኦዳይሳዳ፥ ኤንታ ቦላካ ኦስ። 20 እ ጎይኖ ቃ በሳን ኦያ ካህነታ ኡባ ያርሾ በሳ ቦላ ዎስ፤ ቃስ ሄ ያርሾ በሳ ቦላ አሳ መቀ ፁግስ። ሄሳ ኡባ ኦድ፥ የሩሳላመ ስምስ። 21 ካዎይ አሳ ኡባ፥ “ሀ ጫቆ ማፃፋን ፃፈትዳይሳዳ ጎዳስ፥ ህንተ ፆሳስ ፓስካ ባኣለ ቦንችተ” ያግድ ኪትስ። 22 እስራኤለ ሃርያ ዳይናታ ዎደፐ ዶምድ፥ እስራኤለ ካዎታ ዎደነ ይሁዳ ካዎታ ዎደ ኡባን ሀይሳ መላ ፓስካ ባኣለ ኩመ ቦንቸት ኤረና። 23 ሽን ካዎይ እዮስያስ ካዎትዳ ታማነ ሆስፑን ላይን የሩሳላመ ካታማን ጎዳ ቦንቻናዉ ፓስካ ባለይ ቦንቸትስ። 24 ካህነ ሀላቃይ ካልቅያስ ፆሳ ኬን በንትዳ ማፃፋን ፃፈትዳ ህግያ ቃላ ምንናዳ፥ ቱና አያና ፄገይሳታነ ማሮታ፥ ሶ ግዶ ኤቃ ምስለታ፥ ኤቃ ሚሸታነ ይሁዳ ቢታንነ የሩሳላመ ካታማን በንትዳ ሀራ እፀትዳባታ ኡባ እዮስያስ ይስስ። 25 ሙሰ ህግያዳ ባ ኩመ ዎዛናን፥ ባ ኩመ ሸምፑዋንነ፥ ባ ኩመ ዎልቃን ጎዳኮ ስምዳ እዮስያሳ መላ ካዎይ፥ እያፐ ካሰ ግድን፥ እያፐ ጉየ ደንድቤና። 26 ምናሰይ ጎዳ ሀንቀናዉ ኦዳ ኢታ ኦሶ ኡባ ግሾ፥ ጎዳይ ይሁዳ ቦላ ሀንቀትዳ ባ ሸንያፐ ስምቤና። 27 ጎዳይ፥ “ታኒ እስራኤለ ታ ስንፈ ድግዳይሳዳ፥ ይሁዳካ ታ ስንፈ ድጋና፤ ታኒ ዶርዳ ካታማ፥ የሩሳላመነ ‘ታ ሱንይ ሀይሳን ዳና’ ግዳ ሀ ኬ ድጋና” ያግስ። 28 እዮስያስ ሀንዳ ሀራባይነ እ ኦዳባይ ኡባይ ይሁዳ ካዎታ ታርከ ማፃፋን ፃፈትስ። 29 እዮስያሳ ዎደ ግብፀ ካዎይ ናኮይ፥ አሶረ ካዋ ኦላን ማዳናዉ ኤፍራፂሳ ሻፋ ብስ። ካዎይ እዮስያስ እያራ ኦለታናዉ ባ ኦላንቾታ ኤክድ ከይስ። ሽን ካዎይ ናኮይ እያራ ማግዶን ጋሄትድ፥ እያ ዎስ። 30 አይለት እያ አሀ ፓራ ጋረ ቦላ ዎድ፥ ማግዶፐ የሩሳላመ ኤህድ፥ እያ ቡዞ ዱፉዋን ሞግዶሶና። ሄ ቢታ አሳይ እዮስያሳ ናኣ እዮአካዛ ዶርድ፥ እያ አዋ በሳን እያ ትይድ ካዎዶሶና። 31 እዮአካዝ ካዎትያ ዎደ፥ ላይ እያዉ ላታማነ ሄ፤ እ የሩሳላመን ሄ አጌና ካዎትስ። እያ አየ ሱንይ ሀሙፃሎ፤ እያ ልብና ካታማ ደእያ ኤርምያሳ ናአ። 32 እያ ማይዛት ኦዳይሳዳ፥ እዮአካዝ ጎዳ ስንን ኢታባ ኦስ። 33 እዮአካዝ የሩሳላመን ካዎተናዳ ግብፀ ካዎይ ናኮይ ሀማታ ቢታን እርብላን እያ ቃችድ ሄ ሙኩሉነ ኦይዱ ፄቱ ክሎ ግራመ ዴፅያ ብራነ ሀስታማነ ኦይዱ ክሎ ግራመ ዴፅያ ዎርቃ ይሁዳ አሳ ጊርስስ። 34 ካዎይ ናኮይ እዮስያሳ ናኣ ኤልያቄመ እያ አዋ በሳን ካዎስ፤ እያ ሱን እዮአቄማ ያግድ ላምስ። ሽን እዮአካዛ ግብፀ ኤፍን፥ እ ያን ሀይቅስ። 35 እዮአቄም፥ ካዎይ ናኮይ ኦይችዳ ብራነ ዎርቃ ጊራ እያዉ እሚስ። ሄ ጊራ ቃንፃናዉ እዮአቄም ሄ ቢታ አሳይ ደምያ ኬና ብራፐነ ዎርቃፈ ጊራ ሺሽስ። 36 እዮአቄም ካዎትያ ዎደ ላይ እያዉ ላታማነ እቻሻ፤ እ የሩሳላመን ታማነ እስ ላይ ካዎትስ። እያ አየ ሱንይ ዛብዶ፤ እያ ሩማ ካታማን ደእያ ፓዳያ ናአ። 37 እዮአቄም ባ ማይዛት ኦዳይሳዳ፥ ጎዳ ስንን ኢታባ ኦስ።