2 ካዎታ ማፃፋ 19

1 ካዎይ ህዝቅያስ ሄሳ ስእዳ ዎደ፥ ባ ማኡዋ ዳክድ፥ ካዮ ማኦ ማእድ፥ ፆሳ ኬ ገልስ። 2 ካዎ ጋ አዋተን አይስያ ኤልያቄም፥ ዋና ፃፈይ ሳምናስነ ጭማ ካህነት ካዮ ማኦ ማእድ፥ አሞፀ ናኣ ናብያ እሳያሳኮ ባና መላ ኪትስ። 3 ኤንቲ እሳያሳኮ ብድ፥ “ህዝቅያስ ሀይሳዳ ያጌስ፤ ‘ሀች ጋላሳይ መቶ ጋላስ፥ ሴራ ጋላስነ ዬላ ጋላስ። ሄስካ ናእ የለታናዉ ዎደይ ጋክን፥ ባናካዳ የላናዉ ዎልቅ ይዳ ማጫሳ መላ። 4 ደኦ ፆሳ ጫያና መላ፥ እያ ጎዳይ፥ አሶረ ካዎይ፥ ኪትዳ ቶራ ሞጮና ቃላ ኡባ፥ ጎዳይ ነ ፆሳይ ስኦና አገና። ቃስ ጎዳይ፥ ነ ፆሳይ ሄ ስእዳ ቃላ ጋሶን እያ ሴሮና አገና። ሄሳ ግሾ፥ ኑ አሳ ግዶፈ ፓላህድ አትዳይሳታስ ዎሳ’ " ያግዶሶና። 5 ካዋ ህዝቅያሳ አይለት እሳያሳኮ ብዳ ዎደ፥ 6 እሳያስ ኤንታ ሀይሳዳ ያግስ፤ “ህንተ ጎዳስ ሀይሳዳ ያግድ ኦድተ፤ ‘አሶረ ካዋ አይለት ታና ጫይሽን፥ ኔኒ ስእዳ ጫሻ ቃላስ ያዮፋ። 7 ሄኮ፥ ታኒ እያ ግዶ እስ አያና የዳና፤ እ ሄ ዎርያ ስእድ ባ ቢታ ስማና። እ ባ ቢታ ብድ፥ ያን ማሻን ሀይቃናዳ ኦና’ " ያግስ። 8 አሶረ ካዎይ ላክሶ ካታማፐ ደንድድ ብዳይሳ አሶረታ ቶራ ሞጮናይ ስእድ፥ ጉየ ስሚድ ካዎይ ልብና ካታማን ኦለተይሳ ደምስ። 9 ካዎይ ሳናክሬም፥ “ሄኮ፥ ቶጰ ካዎይ ትርሃቅ ነና ኦላናዉ ይስ” ግያ ዎርያ ስእድ፥ ህዝቅያሳስ ሀይሳዳ ያግድ ኪትስ። 10 “ይሁዳ ካዋዉ ህዝቅያሳ፥ ኔኒ አማነትያ ፆሳይ፥ ‘የሩሳላመይ አሶረ ካዋ ኩሸን ገለና’ ያግድ ጭሞፎ። 11 አሶረ ካዎት ቢታ ኡባ ይስድ፥ ኦዳባ ኔኒ ስአዳሳ። ያትን፥ ኔኒ አታና ዳኒ? 12 በን ታ ማይዛት ይስዳ ቢታ ፆሳት፥ ሄሳትካ፥ ጎዛና፥ ካራነነ ራፌሳ ቢታ ፆሳትነ ታላሳራን ደእያ ኤደነ ፆሳት ሄ ቢታ ዮፐ አሽዶና? 13 ሀማታ ካዎይ፥ አርፋዳ ካዎይ፥ ሳፋርዋይማ ካዎይ፥ ሄና ካዎይነ እዋ ካዎይ አዉን ደኦና?” ያግድ ኪትስ። 14 ህዝቅያስ ዳብዳብያ ኪተትዳ አሳፐ ኤክድ ናባብስ። ዳብዳብያ ፆሳ ኬ ኤፍድ፥ ጎዳ ስንን ምጭስ። 15 ያትድ፥ ጎዳ ሀይሳዳ ያግድ ዎስስ፤ “አቤት ጎዳዉ፥ ክሩበታፐ ግዶን ኡትያ እስራኤለ ፆሳዉ፥ ሳኣ ካዎተታ ኡባ ቦላ ነ ፃላል ፆሰ፤ ሳሉዋነ ሳኣ ኔኒ መዳሳ። 16 አቤት ጎዳዉ፥ ነ ሀይ ሃ ዛራዳ ስአ። አቤት ጎዳዉ፥ ነ አይፍያ ዶያዳ ፄላ። ነና፥ ደኦ ፆሳ ጫያናዉ ሳናክሬም የድዳ ቃላ ስአ። 17 አቤት ጎዳዉ፥ አሶረ ቢታ ካዎት ካዎተታነ ኤንታ ቢታ ይሰይስ ቱማ። 18 ኤንታ ፆሳታ ታማን ፁግድ ይስዶሶና፤ ኤንታ ፆሳት ካሰካ አሳ ኩሸይ ማስድ ከስዳ ምነ ሹቹ ግድያ ግሾ፥ ቱማ ፆሳታ ግዶኮና፤ ሄሳ ግሾ፥ ኤንቲ ኤንታ ይስዶሶና። 19 አቤት ጎዳዉ፥ ነ ፃላል ፆሰ ግደይሳ ሳኣ ካዎተት ኡባይ ኤራና መላ፥ ሀእ ዛራዳ፥ ጎዳዉ፥ ኑ ፆሳዉ፥ ኔኒ ኑና እያ ኩሸፐ አሻ” ያግድ ዎስስ። 20 ሄሳፈ ጉየ፥ አሞፀ ናአይ እሳያስ ህዝቅያሳኮ ሀይሳዳ ያግድ ኪትስ፤ “ጎዳይ እስራኤለ ፆሳይ ሀይሳዳ ያጌስ። ኔኒ አሶረ ካዋ ሳናክሬማ ጋሶን ታና ዎስዳ ዎሳ ስአስ።" 21 ጎዳይ ሳናክሬማባ ሀይሳዳ ያጌስ። “ፅዮነ ጌላእያ ነና ካዉሱ፤ ነና ቦራዉሱ፤ የሩሳላመ ማጫ ናእያ ባ ሁጵያ ቃዳ ነና ቀልቅሳዉሱ። 22 ኔኒ ጫይዳይነ ቶችዳይ ኦኔ? ኔኒ ነ ቃላ ኦደ ቦላ ቁ ኦዲ? ኦቶሮን ቁ ጋዳ ኦና ፄላዲ? ሄሳ ኔኒ ኦዳይ ታ ቦላ፥ እስራኤለ ጌሻ ቦላ ግደነ! 23 ኔኒ ኪትዳ አሳ ባጋራ ጎዳ ጫያዳሳ። ቃስ ሀይሳዳ ያጋዳሳ፤ ታኒ ታዉ ደእያ ዳሮ ፓራ ጋረታን ቃ ደረታ ሁጰ፥ ልባኖሰ ዙማ ሁጵያ ከያስ። ከያዳ ኡባፈ አዱቅያ ዝጋታነ ኡባፈ ሎእያ ፂዳታ ቃንፃስ። ታኒ እያዉ ዉርሰ ጋፃነ ስክዳ ዎራ ጋካስ። 24 ታኒ አላጋ ቢታታን ሃ ኦላ ቦካዳ፥ ሃ ያፐ ኡያስ። ግብፀ ቢታን ጎግያ ሃ ኡባ ታኒ ታ ቶሁዋን የዳ መልሳስ” ያጋዳሳ። 25 “ዳሮ ዎደፐ ካሰ ኔኒ ግምበትዳ ካታማታ ላላዳ፥ ላለ ዶረ ከሳና መላ፥ ታኒ ቆፋ ቃችዳይሳ ኔኒ ስአብኪ? ታኒ ሀእ ፖልያ ሀልቾታ በን ሀልቻ ዎስ። 26 ሄሳ ግሾ፥ ኤንታ አሳስ ዎልቅ እፅን፥ ኤንቲ ካዉይዶሶናነ ዬላትዶሶና። ኤንቲ ጋደ ማታ መላ፤ ጎሻን ሞክዳ ጫርሻ መላ። ኤንቲ ኬ ሁጰን ዶልያ ሻራፋ መላ ካፆና ደእሽን፥ ሌገይ ምዳ ካዳ ሀንዶሶና። 27 ሽን ኔኒ ኡትያ በሳ፥ ከይያነ ገልያ በሳ፥ ታ ቦላ ኔኒ ሸነትዳ ሸንያ ታኒ ኤራይስ። 28 ኔኒ ታ ቦላ ይሎትዳ ግሾነ ነ ኦቶሩዋካ ታኒ ስእዳ ግሾ፥ ታኒ ነ ሲያን ዳፎ አና፤ ነ ዶናን ብፃላ ባርሳና። ያታዳ ነ ይዳ ኦግያራ ታኒ ነና ጉየ ዛራና” ያግስ። 29 እሳያስ ካዋ ህዝቅያሳኮ ሀይሳዳ ያግስ፤ “ሀይስ ፖለታናይሳስ ማላታይ ሀይሳ፤ ሀ ላይ ህንተ አሰቦ ካፅዳ ካ ማና፤ ላይ ቃስ ሀ ላይ ካፅዳ አሰቦ ማና። ሽን ካልያ ላይ ህንተ፥ ህንተዉ ዘርተነ ጫክተ፤ ዎይነ ቶክተነ እያ ሚተ። 30 ይሁዳ አሳፐ አትዳይሳት ፃጶ የድድ፥ አይፈ አይፍያ ም መላ ግዳና። 31 አትዳይሳት የሩሳላመፐ ከያና፥ ፓላህዳይሳት ፅዮነፐ ያና። ኡባፈ ዎልቃማ ጎዳ ምሻይ ሄሳ ኦና። 32 “ሄሳ ግሾ፥ አሶረ ካዉዋባ ጎዳይ ሀይሳዳ ያጌስ፤ ‘አሶረ ካዎይ ሀ ካታማ ገለና፤ ዎይኮ ሀይሳን ባ ዶንገ ዱከና። እ ባ ጎንዳልያ ኦይክድ፥ ሀ ካታማ ስን አና፤ ዎይኮ ካታማ ዩሹዋ ቢታ ዶረን ተቀተና። 33 አሶረ ካዎይ ባ ይዳ ኦግያራ ጉየ ስማና፤ እ ሀ ካታማ ገለና። ታኒ ጎዳይ ሀይሳ ኦዳስ።’ 34 ታኒ ታ ቦንቹዋ ግሾነ ታ አይልያ ዳዊታ ግሾ፥ ሀ ካታማ ተቃዳ አሻና” ያግስ። 35 ሄ ቃማ ጎዳ ኪታንቾይ ከይድ፥ አሶረ አሳይ ዱንካንዳ በሳን እስ ፄታነ ሆስፑን ታማነ እቻሹ ሙኩሉ አደታ ዎስ። ያትን አሳይ ዎንታ ደንድድ በእያ ዎደ፥ ሄኮ፥ አህ ሄራን ኩምስ። 36 አሶረ ካዎይ ሳናክሬም ደንድድ፥ ጉየ ስም ብድ፥ ናናወ ካታማን ኡትስ። 37 እስ ጋላስ ሳናክሬም ባ ፆሳ ናሳራካ ኤቃ ኬን ጎይንሽን፥ እያ ናይት አድራመለክነ ሳርሳር ማሻን እያ ዎድ፥ አራራተ ቢታ ባቃትዶሶና። እያ ናአይ አስራዶን እያ በሳን ካዎትስ።