2 ካዎታ ማፃፋ 10

1 አካባስ ሳማረ ካታማን ላፑን ታሙ አደ ናይት ደኦሶና። እዩይ ሳማረ ካታማ ሀላቃታስ፥ ጭማታስነ አካባ ኮቻታ ድቸይሳታስ ሀይሳዳ ያግድ ዳብዳበ ፃፍስ። 2 “ህዛ ህንተ ጎዳ ኮቻት፥ ፓራት፥ ፓራ ጋረት፥ ዩሾይ ግምበትዳ ካታማትነ ኦላ ሚሸት ህንተዉ ደእያ ግሾ፥ ሀ ዳብዳበይ ህንተና ጋክዳ መላ፥ 3 ህንተ ጎዳ ናይታፐ ሎኦ ግድዳይሳ ዶርድ፥ እያ አዋ አራታን ኡትስተ፤ ህንተ ጎዳ ኬስ ኦለትተ” ያግስ። 4 ሽን ኤንቲ ዳሮ ያይድ፥ “ሄኮ፥ ናምኡ ካዎት እያ ስንን ኤቃናዉ ዳንዳእቦኮና፥ ሽን ኑኒ ዋንድ ኤቃኔ?” ያግዶሶና። 5 ሄሳ ግሾ፥ ካዎ ጋ አዋተን አይሰይስ፥ ካታማ ሀላቃይ፥ ጭማትነ አካባ ኮቻታ ድቸይሳት፥ እዩኮ ሀይሳዳ ያግድ ኪትዶሶና፤ “ኑኒ ነ አይለታ፤ ኔኒ ግያባ ኡባ ኑኒ ኦና። ኑ ቦላ ኦናካ ካዎዮኮ። ነና ሎእዳባ አይባካ ኦ” ያግድ ኪትዶሶና። 6 እዩይ ኤንታዉ ናምአን ዳብዳበ ፃፍሸ፥ “ህንተ ታ ባጋ ግድድ፥ ታዉ ኪተታናዉ ጊግዳባ ግድኮ፥ ህንተ ጎዳ ናይታ ቆያ ሙጭተ፤ ኤንታ ጉግያ ኤክድ፥ ዎንቶ ሀኖደ እዝራኤለ ዪተ” ያግስ። ላፑን ታሙ ካዋ ኮቻት ባንታና ድችያ፥ ካታማን ኤረትዳ አሳታራ ደኦሶና። 7 ሄ ካዋ ኮቻታ ድችያ አሳታኮ ዳብዳበይ ጋክዳ ዎደ፥ ላፑን ታሙ ካዋ ኮቻታ ዎዶሶና። ኤንታ ቆያ ሙጭድ፥ ኤንታ ጉግያ ኬሸን ኤክድ፥ እዝራኤላን ደእያ እዩስ የድዶሶና። 8 ኪተትዳ አሳይ፥ “ኤንቲ ካዋ ኮቻታ ጉግያ ኤክድ ይዶሶና” ያግድ እዩስ ኦድዶሶና። እዩይ፥ “ዎንቶ ዎንታ ጋካናዉ፥ ካታማ ገልያ ፐንግያን ኤንታ ናምኡ በሳን ዶርድ ዎተ” ያግድ ኪትስ። 9 ዎንተ ጋላስ ዎንታ እዩይ ካረ ከይድ፥ አሳ ኡባ ስንን ኤቅድ፥ “ህንተ ፅሎ፤ ሄኮ፥ ታ ጎዳ ቦላ ማቀታዳ ዎዳይ ታና። ሽን ሀይሳታ ኡባ ዎዳይ ኦኔ? 10 ጎዳይ አካባ ኮቻታ ቦላ ኦድዳ ቃላፐ እሶይካ ሳአን ዎናይሳ ህንተ ኤርተ። ጎዳይ ባ አይልያ ኤልያሳ ባጋራ ኦድዳባ ፖልስ” ያግስ። 11 ሄሳ ግሾ፥ እዩይ እዝራኤላን አትዳ አካባ ኮቻታ፥ እያ ግታ አሳታ፥ እያ ላገታነ እያ ካህነታ ኡባ፥ እሶይካ አቶና ዎስ። 12 ሄሳፈ ጉየ፥ እዩይ ደንድድ፥ ሳማረ ብድ ሄንንቾታ ሞ ጋክድ፥ 13 ይሁዳ ካዋ አካዝያሳ ዳቦታራ ጋሄትድ፥ “ህንተ ኦኔ?” ያግድ ኦይችስ። ኤንቲ፥ “ኑኒ አካዝያሳ ዳቦታ፤ ካዋ ኮቻታነ ካወ ኤልዛቤል ናይታ ሳሮናዉ ቦስ” ያግዶሶና። 14 እዩይ ባ አሳታ፥ “ኤንታ ፓፃ ኦይክተ” ያግድ ኪትን፥ ኤንታ ፓፃ ኦይክድ፥ ሄንንቾታ ሞን ደእያ ሃ ኦላ ማታን ኤንታ ኦይታማነ ናምአታ ዎዶሶና፤ እ ኤንታፈ እሱዋካ አሽቤና። 15 እዩይ ሄ በሳፈ ደንድድ፥ ራካባ ናኣ እዮናዳባራ ጋሄትድ፥ እያ ሳሮድ፥ “ታ ቆፋይነ ነ ቆፋይ እስኖ። ኔኒ ታ ባጋ ግዳኔ?” ያግስ። እዮናዳብ፥ “ኤ ግዳና” ያግድ ዛርስ። እ “አነ ታ ኩሽያ ኦይካ” ያግስ። እያ ኩሽያ ኦይክን ፑደ ጋርያ ቦላ ከስስ። 16 “ታራ የ፤ ታኒ ጎዳስ ዋናዳ ምሸትያኮ በአ” ያግስ፤ እያ ባ ጋርያ ቦላ ኡትስስ። 17 እዩይ ሳማረ ይዳ ዎደ፥ አካባ ኮቻፈ አትዳ ኡባ ዎስ፤ ጎዳይ ኤልያሳስ ኦድዳ ቃላዳ ኤንታ ይስስ። 18 ሄሳፈ ጉየ፥ እዩይ አሳ ኡባ እስፈ ሺሽድ፥ “አካብ ባኣለ ኤቃ ጉራ ጎይንስ፤ ሽን ታኒ እያፐ ዳሮ ጎይናና። 19 ሀእ ባኣለ ናበታ፥ እያ ጎይነይሳታ፥ እያ ካህነታ ኡባ ፄግድ ሺሽተ። ኤንታፈ እስ አስካ ፓጮናዳ ናግተ። ታኒ ባኣለ ኤቃስ ዳሮ ያርሾ ያርሻና ሀናይስ። ሄ በሳ ዮና አስ ፓፃ አተና” ያግስ። ሽን እዩይ ባኣለ ኤቃ ጎይነይሳታ ጭምድ ይሳናዉ ሄሳ ኦስ። 20 እዩይ፥ “ባኣለ ኤቃ ጎይናና ጋላሳ አዋጅተ” ያግን፥ ኤንቲ አዋጅዶሶና። 21 ሄሳፈ ጉየ፥ እዩይ እስራኤለ ቢታ ኡባ ኪትን፥ ባኣለ ኤቃ ጎይነይሳታፐ እስ አስካ አቶና ኡባይ ይዶሶና። ኡባይ ባኣለ ኤቃ ኬ ጋፃፐ ጋፃ ጋካናዉ ቅልፅ ግድ ኩምስ። 22 እዩይ፥ ማኦ ኬ ናግያ አድያኮ፥ “ባኣለ ጎይነይሳታ ኡባስ ማኦ ከሳ” ያግስ። አደይ ኤንታዉ ማኦ ኤህስ። 23 ሄሳፈ ጉየ፥ “እዩይነ ራካባ ናአይ እዮናዳብ ባኣለ ኤቃ ኬ ገልዶሶና። እዩይ፥ ባኣለ ኤቃ ጎይነይሳታፐ አትሽን፥ ጎዳ አይለታፐ እስ አስካ ህንተ ግዶን ዶናዳ ፄልተ” ያግስ። 24 ሄሳፈ ጉየ፥ ኤንቲ ፁሳ ያርሾታነ ሀራ ያርሾታ ያርሻናዉ ግዶ ገልዶሶና። እዩይ ባኣለ ኤቃ ኬፈ ካረራ ሆስፑን ታሙ አሳታ ጊግስድ ዎስ። ኤንታኮ፥ “ህንተፈ እስ አደይ ታኒ ህንተ ኩሸን እምያ አሳፐ እሱዋ የድኮ፥ እያ ሸምፖይ ሄ አድያ ሸምፑዋ በሳን ገላና” ያግስ። 25 እዩይ ፁሳ ያርሹዋ ፖልዳፐ ጉየ፥ ናገይሳታነ ሀላቃታ፥ “ግዶ ገልድ፥ ኤንታ ዎተ። ኤንታፈ እስ አስካ ከስ ኤኮና መላ” ያግድ ኪትን፥ ኤንታ ማሻን ዉርስዶሶና። ኤንታ አሀ ካረ ጎችድ ከስዶሶና፤ ባኣለ ኤቃ ኬ ቆልአ ገልዶሶና። 26 ባኣለ ኤቃ ኬፈ ኤቃ ቱሳታ ከስድ ፁግዶሶና። 27 ባኣለ ኤቃ ሹቻታ ትንቸረዶሶና፤ ባኣለ ኤቃ ኬካ ላልዶሶና። ሄ በሳ ሼሻ ኬ ከስዶሶና፤ ሀች ጋካናዉ ሄ በሳይ ሼሻ ኬ ግድድ አትስ። 28 ሄሳዳ ኦድ፥ እዩይ ባኣለ ኤቃ እስራኤለፐ ይስስ። 29 ግዶሽን፥ ናባፃ ናአይ እዮርባም እስራኤለ አሳ ኦስስዳ ናጋራ ኦሶ አግቤና። ቤተለንነ ዳነን እዮርባም ኤስዳ ዎርቃ ማራ ምስለታ ጎይንስ። 30 ጎዳይ እዩኮ፥ “ኔኒ ታ ስንን ሱረባ ኦዳ ግሾነ ታ ቆፋን ደእያባ ኡባ ኔኒ አካባ ኮቻታ ቦላ ፖልዳ ግሾ፥ ነ ኮቻት ኦይዳን የለታ ጋካናዉ፥ እስራኤለ አራታን ኡታና” ያግስ። 31 እዩይ ጎዳ እስራኤለ ፆሳ ህግያ ባ ኩመ ዎዛናፐ ምንድ ናግቤና፤ ቃስ እስራኤለ አሳ ናጋራ ኦስስዳ እዮርባማ ናጋራፐ ሃክቤና። 32 ሄ ዎደ ጎዳይ እስራኤለ ቢታፈ ባጋ ሻኮ ዶምስ። አራመ ካዎይ አዛሄል እስራኤለ ቢታፈ ዳሮ በሳታ ፆንድ ኦይክስ። 33 ዮርዳኖሰ ሻፋፐ ዶሎሀ ባጋራ ደእያ ጋላዳነ ባሳነ ቢታ ኡባ ኦይክስ። ሄ ቢታይ አርኖና ሻፋ ማታን ደእያ አሮኤራ ካታማፐ ዶምድ፥ ሮቤላ ቢታ፥ ጋደ ቢታነ ምናሰ ቢታ ጋኬስ። 34 እዩይ ሀንዳ ሀራባይ፥ ኦዳባ ኡባይነ እያ ምኖተይ ኡባይ እስራኤለ ካዎታ ታርከ ማፃፋን ፃፈትስ። 35 ሄሳፈ ጉየ፥ እዩይ ሀይቅድ፥ ባ ማይዛታን ጋሄትስ፤ እ ሳማረን ሞገትስ። እያ በሳን እያ ናአይ እዮአካዝ ካዎትስ። 36 እዩይ ሳማረን ኡትድ እስራኤለ ቦላ ላታማነ ሆስፑን ላይ ካዎትስ።