2 ታርከ ማፃፋ 35

1 እዮስያስ የሩሳላመን ጎዳ ፓስካ ባኣለ ቦንችስ። ኮይሮ አጌናን ታማነ ኦይዳን ጋላስ ፓስካ ዶርሳ ሹክዶሶና። 2 እዮስያስ ካህነታ ኦሶን ሹምድ፥ ኤንታ ፆሳ ኬ ኦሶን ምንስ። 3 ባንታና ጎዳስ ዱማይዳ፥ እስራኤለ ኡባ ታማርስያ ሌወታ ሀይሳዳ ያግስ፤ “ጌሻ ታቦትያ ዳዊታ ናአይ፥ እስራኤለ ካዎይ ሶሎሞነይ ኬፅዳ ፆሳ ኬን ዎተ። ህዛፐ ጉየ ታቦትያ ህንተ ሀሸን ቶካናዉ ኮሸና። ሀእ ጎዳስ፥ ህንተ ፆሳስነ፥ እያ አሳ እስራኤለስ ኦተ። 4 እስራኤለ ካዎይ ዳዊቲነ እያ ናአይ ሶሎሞነይ ፃፍዳይሳዳ ህንተ ጩጋን ጩጋንነ ህንተ ሶ አሳን አሳን ህንተና ጊግስተ። 5 ሌወት ህንተ ዳቦታ፥ እስራኤለ ኮቻታ ማዳናዉ ህንተ ያራን ያራን ፆሳ ኬን ኤቅተ። 6 ጎዳይ ሙሰ ባጋራ ኦድዳ ቃላ እስራኤለ አሳይ፥ ህንተ ዳቦት ናጋና መላ ግግስተ፤ ህንተካ ህንተናተ ጌሽተ ፓስካ ዶርሳ ሹክተ” ያግስ። 7 እዮስያስ ሄ በሳን ደእያ አሳስ፥ ፓስካ ያርሾ ግዳና መላ 30,000 ዶርሰነ ዴሸ እሚስ፤ ቃስ 3,000 ኮርማታ እሚስ። ሄ ኡባ ካዎይ ባ ሻሉዋፐ እሚስ። 8 ካዎ ሹማት ባንታ ሸነን አሳስ፥ ካህነታስነ ሌወታስ ያርሾ መሄ እምዶሶና። ፆሳ ኬ ሀላቃት ካልቀይ፥ ዛካርያስነ ይኤል ፓስካ ያርሾስ ግድያ ናምኡ ሙኩሉነ ኡሱፑን ፄቱ ማራዘታ፥ ሄ ፄቱ ኮርማታ እምዶሶና። 9 ሌወታ ሀላቃት ኮናነይነ እያ እሻት፥ ሻማየይነ ናትናኤል፥ ቃስ ሀሻብ፥ ይኤልነ ዮዛባት ፓስካ ያርሾስ ሀንያ እቻሹ ሙኩሉ ማራዘታነ ኮለታ፥ እቻሹ ፄቱ ኮርማታ እምዶሶና። 10 ፓስካ ባልያስ ኡባባይ ጊግስ፤ ካዋ ኪታን፥ ካህነት ባንታ በሳን በሳን፥ ሌወት ባንታ ጩጋን ጩጋን ኤቅዶሶና። 11 ፓስካ ዶርሳት ሹከትዶሶና፤ ሌወት ጋልባ ቃርዶሶና፤ ካህነት ሱ ያርሾ በሳ ቦላ ርጮሶና። 12 ሙሰ ማፃፋን ፃፈትዳይሳዳ አሳይ ጎዳስ ያርሻና መላ ፁሳ ያርሾስ ጊግዳ ዶርሳታ አሹዋ ሌወት ባንታ ሶ አሳን አሳን ሻከትድ ኡትዳ እስራኤለ ያራታስ እምዶሶና፤ ኮርማታካ ሄሳዳ ኦዶሶና። 13 ሌወት ዎጋይ ኪተይሳዳ ሹከትዳ ፓስካ ዶርሳ አሹዋ ታማን ጫጭዶሶና፤ ጌሻ ያርሾታ ፃሮን፥ ኦቶንነ ድስተን ዶይስድ፥ እስራኤለ አሳ ኡባስ ኤሶን ሻክድ ሻክድ እምዶሶና። 14 ሄሳፈ ጉየ፥ ሌወት ባንታዉነ አሮና ኮቸ ግድዳ ካህነታስ ፓስካ ያርሾ ጊግስዶሶና። ሄሳ ኤንቲ ኦዳይ፥ ካህነት ፁሳ ያርሾነ ሞዋ ያርሽሸ ቃማ ጋካናዉ ኦያ ግሾሳ። 15 ዳዊቲ፥ አሳፍ፥ ሄማንነ ካዋ ናበይ ኤድታም ካሰ ኪትዳይሳዳ አሳፋ ያራት፥ ማዝሙረ የፀይሳት ባንታ በሳን ደኦሶና። ፐንገ ናገይሳት ባንታ በሳን ደኦሶና። ኤንታ ዳቦት፥ ሌወት ኤንታዉ ጊግስዳ ግሾ ኤንቲ ባንታ ኦሱዋ አግቦኮና። 16 ጎዳስ ኦያ ኦሶ ኡባይ፥ ፓስካ ባኣለ ቦንቾይነ ፁሳ ያርሾይ፥ ካዎይ እዮስያስ ኪትዳይሳዳ ሀንድ ሄ ጋላስ ጊግስ። 17 ያን ሺቅዳ እስራኤለ አሳይ ሄ ጋላስ ፓስካ ባልያ ቦንችዶሶና፤ ኤንቲ ኡይ ባኣለ ላፑን ጋላስ ቦንችዶሶና። 18 ናብያ ሳሜላ ዎድያፐ ዶምን፥ ሄሳ መላ ፓስካ ባለይ እስራኤለን ቦንቸትቤና። እዮስያስ፥ ካህነት፥ ሌወት፥ ይሁዳ አሳይ፥ እስራኤለ አሳይነ የሩሳላመ አሳይ ቦንችዳይሳዳ ፓስካ ባኣለ ካሰ እስራኤለ ካዎታፐ ቦንችዳ እሶይካ ባዋ። 19 ፓስካ ባለይ እዮስያስ ካዎትዳ ታማነ ሆስፑን ላይን ቦንቸትስ። 20 እዮስያስ ፆሳ ኬ ጊግስዳፐ ጉየ ግብፀ ካዎይ ናኮይ ኤፍራፂሳ ሻፋ ማታን ደእያ ካርካምሻን ኦለታናዉ ብስ። እዮስያስ እያ ተቃናዉ ከይስ። 21 ሽን ናኮይ እዮስያሳኮ አሰ ኪትድ፥ “ይሁዳ ካዋዉ፥ ታናነ ነና ካችያባይ አይቤ? ታኒ ይዳይ ታ ሞርከታ ኦላናሳፈ አትሽን፥ ነና ኦላናሳ ግደና። ታ ሞርከታ ታኒ ኤሶን ኦላናዳ ፆሳይ ታና ኪትስ። ፆሳይ ነና ይሶናዳ ታራ ደእያ ፆሳራ ኤቀተይሳ አጋ” ያግስ። 22 ግዶሽን፥ እዮስያስ ጎዳይ ናኮ ባጋራ ኦድዳይሳ ስኦናነ ጉየ ስሞና እፅስ። ባ ካዎ ማኡዋ ላምድ ማግዶ ደንባን ኦለታናዉ ብስ። 23 ዶንገን ዱከይሳት ካዋ እዮስያሳ ጫድን፥ ካዎይ ባ አይለታኮ፥ “ታኒ ኢታ ጫደትዳ ግሾ ታና ኦላ ግዶፈ ከስተ” ያግስ። 24 እዮስያሳ ፓራ ጋርያፐ ዎስድ፥ እያ ፓራ ጋርያን ዎድ፥ እያ የሩሳላመ ኤህዶሶና። እ ያን ሀይቅድ ባ ማይዛታ ዱፎን ሞገትስ። ይሁዳ አሳይነ የሩሳላመ አሳ ኡባይ እያዉ ዬክዶሶና። 25 ናበይ ኤርምያስ እዮስያሳስ ዘለልስ ከስድ ፃፍስ። ዘሌልድ ዬክያ ማጫሳይነ አደ ኡባይ ሀች ጋካናዉ እዮስያሳስ ቆፖሶና። ሄ ዘለልሳይ እስራኤለ ዬሆ ዘለልሳ ማፃፋን ፃፈትስ። 26 እዮስያስ ኦዳ ሀራባይ፥ ጎዳ ህገን ማፃፋን ፃፈትዳይሳ መላ እ ኦዳ ሎኦ ኦሶይነ 27 ኮይሮፐ ዉርሰ ጋካናዉ እ ኦዳ ኡባይ፥ ሄኮ፥ እስራኤለ ካዎታነ ይሁዳ ካዎታ ታርከ ማፃፋን ፃፈትስ።