1 ፅሞትዮሳ ኪታ 4

1 ያና ዎድያን ባለያ አያናታነ ቱና አያናታ ትምርተ ካልድ፥ እስ እስ አሳይ አማኑዋ ካዳናይሳ ጌሻ አያናይ ቆንጭስድ ኦድስ። 2 ሄሳ መላ ትምርተይ ኤንታ ካሀይ ዶጭን፥ አሳ ባለያ ዎርዳንቾ አስታማረታፐ ዬስ። 3 ሄሳ መላ አሳት ኤኮነ ገሎ ቃስ እስ እስ ካታ ሞና መላ ድጎሶና። ሽን አማነይሳትነ ቱማ ኤረይሳት ፆሳ ጋላት ዎስድ ማና መላ ፆሳይ ካ መስ። 4 ፆሳይ መዳ ኡባባይ ሎኦ። ፆሳ ጋላትድ ሚኮ ዎራ ዎያባይ አይብካ ባዋ። 5 ኡባባይ ፆሳ ቃላንነ ዎሳን ጌሽ ግዴስ። 6 ሄሳ ግሾ፥ ኔኒ ሀ ትምርትያ አማነይሳታ ታማርስኮ፥ ኑ አማኑዋንነ ሎኦ ትምርትያ ኪተታዳ ድጭዳ፥ ክርስቶስ የሱሳ ሎኦ አይለ ግዳና። 7 ሽን ጎእ ባይና ቱማ ግዶና ኦዳፐነ ጭማ ማጫሳ ሀይሰፐ ባቃታ። ቱማ አያና ደኦን ዳናዉ ነና ሎህሳ። 8 አስ ባ አሳተ ምንናዉ ኦያ ኦሶይ ጉስ ማዴስ። ሽን ቱማ አያና ደኦን ባና ሎህሶይ ሀእስካ መርናዉካ ደኦ እምያ ኡፋይስ ደእያ ግሾ፥ ኡባስ ማዴስ። 9 ሀ ቃላይ አሳ ኡባይ ኤካናዉ በሲያ ቱማ ኦዳ። 10 ኑኒ አሳ ኡባ፥ ኡባፈ አድ አማነይሳታ አሽያ ደኦ ፆሳፈ ኤካና ግድ ኡፋይሳን ናግያ ግሾ፥ ሄሳስ ኑኒ ኦሶን ዳቡሮስነ ባፀቶስ። 11 ሀይሳ ኪታነ ታማርሳ። 12 ኔኒ ያላጋ ግድያ ግሾ፥ ነና ኦንካ ካፖ። ሽን አማነይሳታስ ኔኒ ኦዳን፥ ኦሶን፥ ሲቆን፥ አማኖንነ ጌሻተን ሌምሶ ግዳ። 13 ታኒ ያና ጋካናዉ አሳስ ጌሻ ማፃፋ ናባቦን፥ ሳባኮንነ ታማርሶን ምና። 14 ትንብተይ ኦደትን፥ ጭማት ባንታ ኩሽያ ነ ቦላ ዎዳ ዎደ ኔኒ ኤክዳ፥ ነናን ደእያ ጌሻ አያና እሞታ ካፓ። 15 ነ ድቻይ አሳ ኡባስ ቆንጫና መላ ሄሳ ምን ቆፓ፤ ሀይሳ ኡባ ዎደ ኦ። 16 ነ ሁጵያስነ ነ ትምርትያስ ናገታ። ኔኒ ሄሳ ኡባ ዎደ ኦኮ ነናነ ነና ስኤይሳታ አሻሳ።