1 ተሰሎንቀ ኪታ 5

1 ታ እሻቶ፥ ሀ ሀኖት ሀናና ዎድያነ አጌና ህንተዉ ፃፋናዉ ኮሸና። 2 ጎዳ ጋላሳይ ካይሶይ ቃማ የይሳዳ ያናይሳ ህንተ ሎይ ኤሬታ። 3 አሳይ፥ “ሳእ ሳሮ፥ አይኮይካ ሀነና” ያግሽን፥ ማጫስ እቀ ኦይከይሳዳ ዮይ ኤንቲ ቆፖና ኤንታ ቦላ ያና። ኤንቲ አይ ኦገንካ ከስ ኤኮኮና። 4 ሽን ኑ እሻቶ፥ ሄ ጋላሳይ ህንተዉ ካይሶይ የይሳዳ ያናዉ ህንተ ማን ደኤከታ። 5 ህንተ ኡባይ ፖኦ አስነ ጋላሳን ደእያ አስ፤ ኑኒ ቃማ አስ ዎይኮ ማ አስ ግዶኮ። 6 ሄሳ ግሾ፥ ኑኒ ሀራት ስከይሳዳ ስካናዉ በሰና፤ ኑኒ ባርካናዉነ ጊግድ ዳናዉ በሴስ። 7 ስከይሳት ቃማ ስኮሶና፤ ማተይሳት ቃማ ማቶሶና። 8 ሽን ኑኒ ጋላሳ አስ ግድያ ግሾ ጊግድ ዳናዉ በሴስ። አማኖነ ሲቆ ፁሩረዳ ትራን ማእድ፥ አቶተ ኡፋይሳ ሁጰን ዎያ ኦላ ብራታ ባርኔፃዳ ዎድ ዳናዉ በሴስ። 9 ፆሳይ ኑና ኑ ጎዳ የሱስ ክርስቶሳ ባጋራ ኩመ አቶተ ኤካና መላ ዶርስፐ አትሽን፥ ሀንቆስ ዶርቤና። 10 ኑኒ ፓፃ ደእን ዎይኮ ሀይቅን፥ ክርስቶስ ያ ዎደ እያራ እስፈ ዳና መላ ክርስቶስ ኑ ግሾ ሀይቅስ። 11 ሄሳ ግሾ፥ ህንተ ካሰ ኦይሳዳ፥ እሶይ እሱዋ ምንተነ ድችተ። 12 ኑ እሻቶ፥ ህንተ ግዶን ኦይሳታ፥ ህንተና ካለና መላነ ዞራና መላ ጎዳይ ዶርዳይሳታ ቦንቻና መላ ህንተና ዎሶስ። 13 ኤንቲ ኦያ ኦሱዋ ግሾ፥ ኤንታ ዳሮ ቦንችተነ ሲቅተ። እሶይ እሱዋራ ሳሮተን ደእተ። 14 ኑ እሻቶ፥ ኑኒ ህንተና ዞሮስ። ቦዛታ ሀንቅተ፤ ባበይሳታ ምንተ፤ ዳቡራንቾታ ማድተ፤ አሰ ኡባ ዳንዳእተ። 15 ኦንካ ኢታ ግሾ ኢታ ዛሮና መላ ናገትተ። ህንተ ዎልስነ አሳ ኡባስ ሎኦባ ኦናዉ ምንተ። 16 ኡባ ዎደ ኡፋይትተ። 17 ኡባ ዎደ ፆሳ ዎስተ። 18 ኡባባን ጋላትተ። ክርስቶስ የሱሳ ባጋራ ፆሳይ ህንተፈ ኮየይ ሄሳ። 19 ጌሻ አያና ኦሱዋ ቶይሶፕተ። 20 ትንብተ ቃላ ካፕተ። 21 ኡባባ ፓጭተ፤ ሎኦባ ኤክተ። 22 ኢታ ኦሶ ኡባፈ ሃክተ። 23 ሳሮ እምያ ፆሳይ ባ ሁጰን ህንተና ፖሎ ጌሾ። ኑ ጎዳይ የሱስ ክርስቶሲ ያና ጋላሳስ፥ ፆሳይ ህንተ አያና፥ ህንተ ሸምፑዋነ ህንተ ኩመ አሳተ ቦረይ ባይና ናጎ። 24 ህንተና ፄገይስ አማነትዳይሳ ግድያ ግሾ፥ ሄሳ እ ፖላና። 25 ኑ እሻቶ፥ ኑስ ፆሳ ዎስተ። 26 አማንያ አሳ ኡባ ጌሻ ዬረተን ሳሮተ። 27 ህንተ ሀ ኪታ አማንያ አሳ ኡባስ ናባባናዳ ጎዳ ሱንን ህንተና ዎሳይስ። 28 ኑ ጎዳ የሱስ ክርስቶሳ አ ኬሀተይ ህንተራ እስፈ ግዶ። አምንእ።