Mazamure Maxaafa 21
LTW1 Abeet GODAWU! Kawoy ne immida wolqqa gishshas ufayettees; neni immida xoonon izi keehi hombocees. 2 Neni iza wozina amo izas immadasa; qasse izi nena ba doonan oychchidayssa neni diggabeekka. 3 Neni lo7o anjjora iza mokkaasa; geeshsha worqqa kallachcha iza hu7aan goxxisadasa. 4 Neni de7o izas immana mala nena woossides; nekka izas de7onne adussa layth immadasa. 5 Neni xoono immida gishshas izas bonchchoy darides; gitateththinne teema izas immadasa. 6 Neni izas mernaa anjjo immadasa; ne izara duussan iza ufayssadasa. 7 Kawozi GODAAN ammaneettes. Ubbaafe Dhoqqa Xoossa kiyateththi izara diza gishshas izi yayyenna. 8 Ne kushey ne morkketa ubbaa demmana; ne ushachchay nena ixxizayta oykkana. 9 Neni qoncciza wode coocen eexxiza tama mala ne istta xuuggana; GODAY ba hanqoza suulen istta xuuggana; iza tamaykka istta mi dhayssana. 10 Neni istta nayta biittafe diggana; istta zereththaaka dereppe denththa dhayssana. 11 Ne morkketi ne bolla genen duulateettes; iita miishshika maqetteettes; gido attiin isttas hanenna. 12 Nekka istta ne wondafeza yiishshan gooddaasa; istti guye simmidi baqatana mala ooththaasa. 13 Abeet GODAWU! Ne minoteththay dhoqqu dhoqqu go; ne gita wolqqaa gishshas galata mazamure yexxoos.