ዬ ማጻፋ 89

1 ኣቤት ጎዳዉ! ኔ ሜርና ሲቆ ጊሻስ ታኒ ሜርናስ ዬጻና፤ ኔ ኣማኔቴ ዬሌታ ኡባስ ታ ኣዋጃና። 2 ታኒ ኔ ሜርና ሲቆይ ሜርናስ ኤቂዳይሳኔ ኔኒ ኔ ኣማኔቴ ሳሎን ሚንዳ ኤሲዳይሳ ዮታና። 3 ኔኒ፥ «ታኒ ዶሪዳይሳራ ጫቆ ቃላ ጌላዲስ፤ ታ ኣይሌ ዳዊቴስ፥ 4 ‹ታኒ ኔ ዛሬታ ሜርናስ ካዎሳና፤ ኔ ካዎቴ ኣልጋ ዬሌታ ኡባስ ሚንና› ጋ ጫቃዲስ» ጋዳሳ። 5 ኣቤት ጎዳዉ! ሳሎቲ ኔኒ ኦዳ ማላሊሲዛ ኦሶታ ኣዋጄቴስ፤ ጌሻታ ዱላታይ ኔ ኣማኔቴ ሳቤስ። 6 ሳሎን ጎዳራ ሊኬታናስ ዳንዳይዛይ ኦኔ? ሳሎ ሜቴታ ጊዶንካ ጎዳ ማላይ ኦኔ? 7 ጌሻታ ሺቆን ጾሲ ያሺሲዛዴ፤ ባ ዩሾን ዲዛ ኡባፌ ኬሂ ያሺሲዛዴ። 8 ኣቤት ጎዳዉ! ኡባፌ ዎልቃማ ጾሳዉ! ኔ ማላ ዎልቃማይ ኦኔ? ኣቤት ጎዳዉ! ኔኒ ኡባ ሚሻን ኣማኔቲዳዴ። 9 ኔ ቡልኣኬቲዛ ኣባ ሴራሳ፤ ኣባ ዳምባላካ ጮኡ ኦሳ። 10 ኔኒ ኤራኣቤ ጌቴቲዛ ኣባ ዶኣዛ ቆጼሬ ዎዳሳ፤ ኔ ሞርኬታ ኔ ዎልቃማ ቄሴን ላላዳሳ። 11 ሳሎቲ ኔይታ፤ ሳኣይካ ኔሳ፤ ቢታኔ ኢዛን ኩሚዳ ኡባ ኔኒ ሜዳሳ። 12 ፑዴሃኔ ዱጌሃ ኔኒ ሜዳሳ፤ ታቦሬኔ ሄርሞኔ ዙማቲ ኡፋይሳን ኔ ሱንን ዬጼቴስ። 13 ኔስ ዎልቃማ ቄሴይ ዴስ፤ ኔ ቄሴይ ሚኖ፤ ኔ ኡሻቻ ቄሴይ ያሼስ። 14 ጺሎቴኔ ሱሬ ፒርዳይ ኔ ካዎቴ ኣራታስ ዮቻ፤ ማሮቴኔ ኣማኔቴ ኔፔ ሲንራ ቤቴስ። 15 ኣቤት ጎዳዉ! ኢሊሊሳን ኔና ሳቢዛይቲኔ ኔ ፖኦን ሄሜቲዛይቲ ኣንጄቲዳይታ። 16 ኔ ሱንን ኩሜ ጋላስ ኡፋዬቴቴስ፤ ኔ ጺሎቴ ጊሻስ ኢስቲ ኔና ቁ ቁ ሂስቴቴስ። 17 ኢስቲ ጬቄቲዛ ዎልቃይ ኔና፤ ኔ ቴማን ኢስታ ካጬይ ቁ ቁ ጌስ። 18 ኑ ጎንዳሌይ ጎዳ ኩሼና፤ ኑ ካዎይካ ኢስራኤሌ ጌሻ ኩሼና። 19 ቤኒ ኔኒ ኔ ኣማኔቲዳ ኣሳታስ ኣጁታን፥ «ታኒ ኦላ ቃራ ማዳዲስ፤ ዴራ ጊዶፌ ዶሬቲዳ ዬላጋ ቁ ቁ ሂስታዲስ። 20 ታ ኣይሌ ዳዊቴ ዴማዲስ፤ ታ ጌሻ ዛይቴንካ ቲያዳ ኢዛ ካዎዲስ። 21 ታ ኩሼይ ኢዛ ማዳና፤ ታ ቄሴይካ ኢዛ ሚንና። 22 ኢዛ ኣይ ሞርኬይ ሃሪዲ ጊሪሴና፤ ኣይ ኢታ ኣሲካ ኢዛ ቆሄና። 23 ታኒ ኢዛ ሞርኬታ ኢዛ ሲንን ቲንቼሬና፤ ኢዛ ኢጺዛይታካ ሾጫ ኒፊፊ ሂስታና። 24 ታ ኣማኔቴይኔ ታ ሜርና ሲቆይ ኢዛራ ኢሲፌ ጊዳና፤ ታ ሱንን ኢዛ ካጬይ ቁ ቁ ጋና። 25 ታኒ ኢዛ ካዎቴ ሜዲቴራኔ ኣባ ጋካናስ ኣሳና። ኢዛ ዛዋካ ኤፊራጺሴኔ ጼግሮሴ ሻፋታ ጋካናስ ኣሳና። 26 ዳዊቲ ታና፥ ‹ኔኒ ታ ኣዋ፤ ታ ጾሳኔ ታና ኣሺዛ ዎጋ ዛላ› ጊ ጼይጋና። 27 ታኒ ኢዛ ታስ ባይራ ና ሂስታና፤ ሳኣን ዲዛ ካዎታ ኡባፌ ታ ኢዛ ጊታሳና። 28 ታኒ ታ ሲቆ ኢዛስ ሜርናስ ናጋና፤ ታኒ ኢዛስ ጌሊዳ ጫቆ ቃላ ሚንና። 29 ታኒ ኢዛ ዛሬታ ሜርናስ ሚን ኤሳና፤ ኢዛ ካዎቴ ኣራታካ ሳሎ ማላ ሜርናስ ሚን ቶካና። 30 «ጊዶ ኣቲን ኢዛ ዜሬቲ ታ ዎጋ ኣጊኮ፥ ቃሴ ኢስቲ ታ ኣዛዞካ ናጎንታ ኢጺኮ፥ 31 ኢስቲ ታ ዎዳ ማራ ሞሪኮ፥ ታ ኣዛዞካ ቦንቾንታ ኢጺኮ፥ 32 ታኒ ኢስታ ናጋራ ጊሻስ ኢስታ ጉፌን ቃጻያና፤ ኢስታ ሞሮ ጊሻስ ኢስታ ጹርቃፌን ሾጫና። 33 ጊዶ ኣቲን ታኒ ታ ሲቆ ኢዛፔ ሃሲኬ፤ ዎይኮ ታ ኣማኔቴ ኢዛስ ፓጪንቺኬ። 34 ታኒ ጫቂዳ ጫቆ ቃላ ሚኬ፤ ታ ዶናፔ ኬኢዳ ቃላ ላሚኬ። 35 ታኒ ኢሲቶ ታ ጌሻ ሱንን ጫቂዳ ቃላ ዳዊቴስ ዎርዶቲኬ። 36 ኢዛ ዛሬቲ ሜርናስ ሚኒዲ ዳና፤ ኢዛ ካዎቴ ኣልጋይካ ኣዋ ኣርሼ ማላ ታ ሲንን ሜርናስ ዳና። 37 ሳሎ ቦላ ኣማኔቲዳ ማርካ ጊዳዳ ዲዛ ኣጊና ማላ ኢዚ ሜርናስ ሚኒ ዳና» ጋዳሳ። 38 ጊዶ ኣቲን ሃኢ ኔኒ ቲያዳ ካዎዳይሳ ቦላ ኬሃ ሃንቄታዳሳ፤ ኢዛ ካዳሳኔ ዬጋ ኣጋዳሳ። 39 ኔኒ ኔ ኣይሌዛስ ጫቂዳ ጫቆ ቃላ ላላዳሳ፤ ኢዛ ካላቻ ባናን ኦላዳ ቱኒሳዳሳ። 40 ኔኒ ካታማ ጊምቤዛ ኡባ ላላዳሳ፤ ኢዛ ሚጻ ኡባ ይሳዳሳ። 41 ኦጌራ ኣዛ ኡባቲ ኢዛ ቦንቂዳ፤ ኢዚ ባ ሾሮታስ ቂስ ኣቲዴስ። 42 ኔኒ ኢዛ ሞርኬታስ ኡሻቻዳሳ፤ ኢስታ ኡባ ኡፋይሳዳሳ። 43 ኔኒ ኢዛ ማሻ ቃራዛ ዱንኢሳዳሳ፤ ኦላንካ ኢዛ ማዳቤካ። 44 ኔኒ ኢዛ ካዎቴ ጉፋ ኢዛ ኩሼፔ ዎ ኤካዳሳ፤ ቃሴ ኢዛ ካዎቴ ኣራታ ቢታን ኦላዳሳ። 45 ኔኒ ኢዛ ዬላጋቴ ላይ ቃንዳሳ፤ ዬላካ ማይዛዳሳ። 46 ኣቤት ጎዳዉ! ኣዉዴ ጋካናስ ኔና ጌንኔ? ኔኒ ሜርናስ ጌማኔ? ኔ ሃንቆይ ታማ ማላ ኣዉዴ ጋካናስ ኤጻኔ? 47 ታ ላይይ ኣይ ኬና ቃንኮ ቆፓ፤ ኔ ኣሳ ና ጮ ሃዳ ሜዲ! 48 ኣሲ ሃይቆንታ ሜርናስ ሼምፖራ ፓጻ ዳናስ ዳንዳይዜ? ቃሴ ዱፎን ጌሎንታ ማላ ባና ኣሻናስ ዳንዳይዛ ኣሲ ዲዜ? 49 ኣቤት ጎዳዉ! ዳዊቴስ ኔ ኣማኔቴን ጫቂዳ ጫቆይኔ ካሴ ኔ ሜርና ሲቆይ ኣዋን ዲዜ? 50 ኣቤት ጎዳዉ! ታኒ ኔ ኣይሌይ ኣይ ማላ ቦሬቲዳኮ ኔኒ ሃሳያ፤ ታኒ ኣሳ ኡባ ቦሬዛ ዎስታ ዳንዳይዳኮ ኣኔ ኔ ቆፓ። 51 ኣቤት ጎዳዉ! ኔ ሞርኬቲ ኔ ዶራዳ ቲይዳ ካዎዛ ጫዪዛይሳ፥ ኢዚ ቢዳሶ ኡባን ኢዛ ቂልጪዛይሳ ቆፓ። 52 ጎዳይ ሜሪ ሜርናስ ጋላቴቶ! ኣሚን! ኣሚን።