ዬ ማጻፋ 85

1 ኣቤት ጎዳዉ! ኔኒ ኔ ቢታስ ኪያቴ ቤሳዳሳ፤ ያቆቤ ዲኤቲዳሶፔ ዛራዳሳ። 2 ኔኒ ኔ ኣሳ ናቆ ኣቶ ጋዳሳ፤ ኢስታ ናጋራ ኡባ ካማዳሳ። 3 ኔኒ ዪሎቲዛይሳ ኡባ ኣጋዳሳ፤ ሱሊዛ ኔ ሃንቆፌካ ሲማዳሳ። 4 ኣቤት ኑና ኣሺዛ ጾሳዉ! ኔ ኑና ዛራ፤ ኔኒ ኑ ቦላ ላንጬቲዳይሳ ኣጋ። 5 ኔኒ ኑና ሜርናስ ሃንቄታኔ? ኔ ሃንቆይ ዬሌታፔ ዬሌታ ጋካናዉ ጋምኣኔ? 6 ኔ ኣሳይ ኔናን ኡፋዬታና ማላ፥ ኔ ኑና ኦራጺሲኪ! 7 ኣቤት ጎዳዉ! ኔ ሜርና ሲቆዛ ኑና ቤሳ፤ ኔኒ ኑና ኣሻ። 8 ታኒ ጎዳ ጾሲ ዮቲዛይሳ ሲያና፤ ኢስቲ ሲሚዲ ባላ ኦጌን ቦንታ ኣጊኮ፥ ባ ጌሻ ዴራስ ሳሮቴ ኤሃናስ ሂዶታ ኢሚዴስ። 9 ኢዛ ቦንቾይ ኑ ቢታን ዳና ማላ ኣቶቴይ ኢዛስ ያዪዛይታስ ማታን ዴስ። 10 ሲቆይኔ ቱማቴ ኢሲፌ ሲጌቴቴስ፤ ጺሎቴኔ ሳሮቴ ኢሲፌ ኢዲሜቴቴስ። 11 ኣማኔቴ ሳኣፔ ፑዴ ኬዛና፤ ጾሳ ጺሎቴ ሳሎፔ ዱጌ ዎና። 12 ቤኢቴ! ጎዳይ ሎኦ ሚሽ ኢማና፤ ኑ ቢታይካ ሎኦ ካ ሞኪሳና። 13 ጺሎቴ ኢዛፔ ሲንራ ባና፤ ኢዚ ባናሶካ ኢዛስ ጊጊሳና።